អ្នក​ធ្វើ​ការ​ខាង​ផ្នែក​ប្រែ​ប្រួល​អាកាស​ធាតុ​ប្រមាណ​៧០​នាក់​បាន​ជួប​ប្រជុំ​គ្នា​នៅ​ព្រឹក​ថ្ងៃ​ចន្ទ​នេះ ​ដើម្បី​បង្ហាញ​ពី​បញ្ហា​ប្រឈម​ និង​រក​ដំណោះ​ស្រាយ​ទាក់​ទង​នឹង​ការ​ប្រែ​ប្រួល​អាកាសធាតុ​ជាពិសេស​ប្រទេស​កម្ពុជា​។ ​កម្ពុជា​ដែល​ស្ថិត​ក្នុង​ចំណាត់​ថ្នាក់​​ដែល​ងាយ​រង​គ្រោះ​បំផុត​ ពី​ការ​ប្រែប្រួល​អាកាស​ធាតុ​ នៅ​ក្នុង​តំបន់​អាស៊ី​អាគ្នេយ៍​។ ​ លោក​ ហុក​ ម៉េងហ៊ាន់ ​ប្រធាន​កម្មវិធី​បរិស្ថាន​ នៃ​NGO​ Forum​ ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​ បាន​ថ្លែង​ថា ​ការ​ប្រែ​ប្រួល​អាកាស​ធាតុ​មាន​ផល​ប៉ះពាល់​ច្រើន​ទៅ​លើ​សហគមន៍​មូលដ្ឋាន។ ​ដូចនេះ​ថវិកា​ថ្នាក់​ឃុំ​ទាក់​ទង​ការ​ប្រែប្រួល​អាកាសធាតុ​នៅ​មាន​កម្រិត​ គួរ​តែ​ត្រូវ​បាន​បង្កើន​បន្ថែម​។

«យប់​មិញ​បង​ឃើញ​អូន​ញញឹម» គឺ​ជា​ចំណង​ជើង​ខ្សែ​ភាពយន្ត​ឯកសារ​របស់​សមិទ្ធករ​ភាពយន្ត​វ័យ​ក្មេង លោក នាង កាវិច ដែល​ត្រូវ​បង្ហាញ​ខ្លួននៅ​មហោស្រព​ភាពយន្ត​អន្ដរជាតិ Rotterdam នៅ​ថ្ងៃ​ចន្ទ​ស្អែក​នេះ​។ ជា​ខ្សែ​ភាពយន្ត​ដែល​រំឭក​ពីអនុស្សាវរីយ៍​នៃ​អ្នក​រស់​នៅ​អគារ​ប៊ូឌីង​ស មុន​ពេល​អគារ​នេះ​ត្រូវ​កំទេច​ចោល​ដើម្បី​អភិវឌ្ឍ​ថ្មី​។ សមិទ្ធករ​ភាពយន្ត លោក នាង កាវិច បាន​ថ្លែង​ប្រាប់​វិទ្យុ​បារាំង​អន្ដរជាតិ​ថា លោក​ជ្រើស​ផលិត​ភាពយន្ត​ឯកសារ​រឿង​នេះ គឺ​ដើម្បី​ឆ្លុះ​បញ្ចាំង​ពី​បច្ចុប្បន្នភាព​នៅ​កម្ពុជា ខណៈ​ភាពយន្ត​ភាគ​ច្រើន​ស្ដី​ពី​កម្ពុជា ច្រើន​តែ​រំឭក​ពី​របប​ខ្មែរ​ក្រហម​ដ៏​ជូរ​ចត់។

ភ្ញៀវ​ប្រចាំ​ថ្ងៃ​របស់​យើង​នៅរាត្រី​នេះ ​គឺ​លោក​ សឹង​ សែនករុណា ​អ្នក​នាំ​ពាក្យ​សមាគម​អាដហុក​។​ លោក​ ករុណា ​បាន​ចូល​មក​ឆ្លើយ​នឹង​សំណួរ​ទាក់​ទង​នឹង​កិច្ច​ប្រជុំ​ត្រួត​ពិនិត្យ​របាយការណ៍​សកល​តាម​កាល​កំណត់ ​ឬ​ (UN-UPR)​ របស់​ក្រុម​ប្រឹក្សា​សិទ្ធិ​មនុស្ស​នៃ​អង្គការ​សហប្រជា​ជាតិ​ នឹង​ធ្វើ​នៅ​ថ្ងៃ​ទី៣០​ ខែ​មករា​ ខាង​មុខ​នេះ។ ​តាម​មន្រ្តី​សិទ្ធិ​មនុស្ស​រូប​នេះ ​បញ្ហា​សិទ្ធិ​មនុស្ស​នៅ​កម្ពុជា​គឺ​មិន​ទាន់​មាន​លក្ខណៈ​ល្អ​នៅ​ឡើយ​ទេ​ ហើយ​ក៏​មាន​ការ​រិត​ត្បិត​សេរីភាព​ថែម​ទៀត​ផង​។

នៅ​ថ្ងៃ​ទី២៧ មករា ប្រតិភូ​នៃ​គណៈ​កម្មាធិការ​សិទ្ធិ​មនុស្ស​កម្ពុជា​នឹង​ត្រូវ​ចេញ​ទៅ​ការពារ​របាយការណ៍​សិទ្ធិ​មនុស្ស​កម្ពុជា​នៅ​អង្គការ​សហ​ប្រជាជាតិ ក្នុង​ទីក្រុង​ហ្សឺណែវ ប្រទេស​ស្វីស​។ ដូច្នេះ​នៅ​រាត្រី​នេះ វណ្ណ សុគន្ធា បាន​ជួប​សម្ភាសន៍​ជាមួយ​លោក​ជិន ម៉ាលីន អ្នក​នាំ​ពាក្យ​គណៈ​កម្មាធិការ​សិទ្ធិ​មនុស្ស​កម្ពុជា ។ លោក​ជិន​ ម៉ាលីន​ បាន​អះអាង​ថា ក្រៅ​ពី​ផ្ញើ​របាយការណ៍​ស្តី​ពី​បញ្ហា​សិទ្ធិ​មនុស្ស​នៅ​កម្ពុជា​ទៅ​កាន់​ក្រុម​ប្រឹក្សា​សិទ្ធិ​មនុស្ស​នៃ​អង្គការ​សហ​ប្រជាជាតិ ប្រតិភូ​នៃ​គណៈ​កម្មាធិការ​សិទ្ធិ​មនុស្ស​កម្ពុជា​ក៏​បាន​ត្រៀម​ខ្លួន​រួច​រាល់​ហើយ​ដែរ ដើម្បី​ឡើង​ការពារ​នូវ​របាយការណ៍​នោះ​។

រយៈ​ពេល​មួយ​សប្តាហ៍​ចុង​ក្រោយ​នេះ តម្លៃ​ស្រូវ​ត្រូវ​គេ​កត់​សម្គាល់​ថា បាន​ធ្លាក់​ចុះ​ហើយ​។ ទាំង​អ្នក​ជំនាញ​លើ​វិស័យ​ស្រូវ អង្ករ និង​សហគមន៍​ផលិត​ស្រូវ​នា​នា បាន​ទទួល​ស្គាល់​ថា​ស្ថាន​ភាព​បែប​នេះ បាន​កើត​ឡើង​ជា​រៀង​រាល់​ឆ្នាំ​។ ក៏​ប៉ុន្តែ​ប្រធាន​សម្ព័ន្ធ​សហគមន៍​កសិករ​កម្ពុជា លោក ថេង សាវឿន ថ្លែង​ថា​បញ្ហា​ស្រូវ​ធ្លាក់​ថ្លៃ​ប៉ុន្មាន​ថ្ងៃ​មក​នេះ ក៏​អាច​ជា​ការ​ប៉ះ​ពាល់​បឋម នៃ​ការ​យក​ពន្ធ​អង្ករ​ខ្មែរ​នាំ​ចូល​ទីផ្សារ​អឺរ៉ុប​ផង​ដែរ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ RFI នា​រាត្រី​នេះ គឺ​លោក​បណ្ឌិត គី សិរីវឌ្ឍន៍ ប្រធាន​មជ្ឈមណ្ឌល​សិក្សា​ចិន​នៃ​រាជ​បណ្ឌិត​សភា​កម្ពុជា។ លោក​បណ្ឌិត គី សិរីវឌ្ឍន៍ បានចាត់​ទុក​ដំណើរ​ទស្សនកិច្ច​របស់​លោក​នាយករដ្ឋ​មន្ដ្រី​ ហ៊ុន សែន នៅ​ប្រទេស​ចិន ថា​ជា​ការបង្ហាញ​អំពី​ភាព​ជា​ដៃ​គូ​ល្អ​រវាង​ចិន​និង​កម្ពុជា ក្នុង​វិស័យ​សេដ្ឋកិច្ច​និង​ពាណិជ្ជកម្ម​ ខណៈ​ពេល​ដែល​ទំនាក់​ទំនង​រវាង​កម្ពុជា​ជាមួយ​ប្រទេស​លោក​ខាង​លិច​កំពុង​ជួប​ភាព​រកាំរកូស។ បើ​ទោះ​បី​ជា​យ៉ាង​ដូច្នេះ​ក៏​ដោយ លោក​បណ្ឌិត គី សិរីវឌ្ឍន៍ ក្រើន​រំឭក​ឲ្យ​កម្ពុជា​បង្កើត​ភាព​ជា​ដៃគូ​ក្នុង​វិស័យ​សេដ្ឋកិច្ច​ឲ្យ​បាន​ច្រើន ដើម្បី​កាត់​បន្ថយ​ហានិភ័យ​នៃ​ការ​ដាច់​ដង្ហើម​សេដ្ឋកិច្ច ក្នុង​ករណី​មហាយក្ស​ចិន​ងាក​ចេញ​ពី​កម្ពុជា​នា​ពេល​អនាគត​។

ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ គឺ​លោក​សុខ ឥសាន ដែល​ជា​អ្នក​នាំ​ពាក្យ​គណបក្ស​ប្រជាជន​កម្ពុជា​។ ឆ្លើយ​តប​នឹង​ផែន​ការ​ចង់​ឲ្យ​លោក​សម រង្ស៊ី ចូល​មក​ប្រទេស​កម្ពុជា​វិញ​ពី​សំណាក់​គណៈ​កម្មាធិការ​អចិន្ត្រៃយ៍​របស់​អតីត​គណបក្ស​សង្រ្គោះ​ជាតិ លោក​សុខ ឥសាន បាន​ចាត់​ទុក​ថា វា​គ្រាន់​តែ​ល្បិច​កល​ថ្មី​របស់​ក្រុម​លោក​សម រង្ស៊ី ដើម្បី​ស្ដារ​ប្រជា​ប្រិយភាព​ឡើង​វិញ​តែ​ប៉ុណ្ណោះ​។ សម្រាប់​លោក​សុខ ឥសាន នេះ​ក៏​ជា​ការ​បោក​បញ្ជោត​ទៅ​កាន់​សកម្មជន និង​អ្នក​គាំទ្រ​អតីត​គណបក្ស​សង្រ្គោះជាតិ​ទាំង​ក្នុង និង​ក្រៅ​ប្រទេស​ផង​ដែរ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅរាត្រីនេះ​ គឺ​លោក​ អេង​ ឆៃអ៊ាង​ អនុប្រធាន​អតីត​គណ​បក្ស​សង្រ្គោះជាតិ​។​ លោក​ អេង​ ឆៃអ៊ាង​ បាន​ចូល​ខ្លួន​មក​ឆ្លើយ​សំណួរ ​ជុំ​វិញ​ការ​ប្រកាសរបស់​គណៈកម្មាធិការ​អចិន្ត្រៃយ៍​នៃ​​អតីត​បក្សប្រឆាំង​នេះ​ ចំពោះ​ការ​​វិល​ត្រឡប់​របស់​ លោក​ សម រង្ស៊ី​ មក​កាន់​កម្ពុជា​វិញ​នៅពេល​ខាង​មុខ​។​ បើ​តាម​ លោក ​អេង ​ឆៃអ៊ាង ​ការ​វិល​ត្រឡប់​របស់​លោក ​សម ​រង្ស៊ិី​គឺ​ត្រូវ​តែ​ប្រាប់​បរទេស​ដែល​កាន់​លទ្ធិ​ប្រ​ជាធិប​តេយ្យ​ឲ្យ​បាន​ដឹង​ជា​មុន​ ដើម្បី​ដឹងថា​តើ​អ្នក​ណា​នឹង​អម​ដំណើរ ​លោក ​សម ​រង្ស៊ី!

ចាប់​ពី​ឆ្នាំ​២០១៩​ត​ទៅ លែង​មាន​ទៀត​ហើយ អង្គការ​អម្រឹតា​សិល្បៈ​។ អង្គការ​អម្រឹតា​សិល្បៈ បាន​សម្រេច​ចិត្ត​បញ្ចប់​អាណត្តិ​បេសកកម្ម​របស់​ខ្លួន ក្នុង​វិស័យ​ទស្សនីយភាព​ខ្មែរ បន្ទាប់​ពី​បើក​ដំណើរការ​អស់​រយៈពេល​១៥​ឆ្នាំ​​។ រយៈ​ពេល​១៥​ឆ្នាំ​កន្លង​មក​នេះ អង្គការ​អម្រឹតា​សិល្បៈ​បាន​រួម​ចំណែក​យ៉ាង​សកម្ម និង​កសាង​សមិទ្ធផល​យ៉ាង​ច្រើន​នៅ​ក្នុង​វិស័យ​សិល្បៈ​នៅ​កម្ពុជា​។ ប៉ុន្តែ​សម្រាប់​លោក កង ឫទ្ធីសាល នាយក​ប្រតិបត្តិ​នៃ​អង្គការ​អម្រឹតា​សិល្បៈ អ្វី​ដែល​សំខាន់​ជាង​នេះ​ទៅ​ទៀត​គឺ​ដំណើរជីវិត​នៃ​ការ​រីក​ចម្រើន​របស់​សិល្បករ។ ​ ដំណើរជីវិត​នៃ​ការ​រីក​ចម្រើន​របស់​សិល្បករ បើ​តាម​លោក កង ឫទ្ធីសាល គឺ​ជា​សមិទ្ធផល​ប្រកប​ដោយ​មោទកភាពរបស់​អម្រឹតា​សិល្បៈ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិRFI​នៅពេល​នេះ​ គឺ​លោក​ ថេង​ សាវឿន ​ប្រធាន​សម្ព័ន្ធ ​សហគមន៍ កសិករ​កម្ពុជា​។​ កសិករ​កម្ពុជា​ដែល​កំពុងតែ​បារម្ភ​ពីតម្លៃ​ស្រូវ​ធ្លាក់​ចុះ ​ខណៈ​សហភាព​អឺរ៉ុប​តម្រូវ​ឲ្យ​កម្ពុជា​បង់​ពន្ធ​លើ​ការ​នាំ​អង្ករ​ទៅ​លក់​លើ​ទី​ផ្សារ​​នៃ​បណ្តុំ​ប្រទេស​លោក​សេរីទាំងនេះ​។​ បើ​តាម​ លោក ​ថេង ​សាវឿន ​ដើម្បី​ដោះ​ស្រាយ​បញ្ហា​នេះ​ គឺ​លោក​ចង់​ឲ្យ​កសិករ​ងាក​ទៅ​ដាំ​ដំណាំ​ផ្សេងៗ​បន្ថែម​ពី​លើ​ស្រូវ​តែ​មួយ​មុខ​។​ លើស​ពី​នេះ ​លោក​ ថេង​ សាវឿន​ ក៏​ចង់​ឲ្យ​រដ្ឋាភិបាល​បញ្ចេញ​ប្រាក់​ខ្លះ​ដើម្បី​ទប់​ទល់​ការ​ធ្លាក់​ចុះ​នៃ​តម្លៃ​ស្រូវ​អង្ករ​ផងដែរ​។