ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ គឺ​លោក​ឡែមឌឿន ដាឡឹម អនុ​ប្រធាន​សមាគម​អ្នក​ជំនាញ​អចលន​ទ្រព្យ​កម្ពុជា និង​ជា​នាយក​ប្រតិបត្តិ​ក្រុមហ៊ុន អេត​សឺ​លូ​សិន រៀល​អ៊ី​ស្តេត​។ ចំពោះ​ស្ថាន​ភាព​អចលន​ទ្រព្យ​នៅ​ក្នុង​ឆ្នាំ​ថ្មី​នេះ លោក​ឡែម​ឌឿន ដា​ឡឹម បាន​មើល​ឃើញ​ថា នឹង​បន្ត​មាន​ភាព​ល្អ​ប្រសើរ ដោយ​សារ​តែ​ស្ថិរភាព​នយោបាយ និង ការ​យល់​ដឹង​លើ​ផ្នែក​នេះ​កាន់​តែ​ច្រើន​ពី​សំណាក់​ប្រជាពលរដ្ឋ​កម្ពុជា​។

ភ្ញៀវប្រ​ចាំថ្ងៃ​របស់​វិទ្យុ​បារាំង​អន្តរជាតិ​RFI​នៅរាត្រីនេះ គឺ លោក ឈឹម​ ផលវរុណ អ្នកនាំ ពាក្យ​គណបក្ស​ប្រជាជន​កម្ពុជា ។ គណបក្ស​កាន់​អំណាច​នេះ បាន​រំឭក​ខួប​លើក​ទី​៤០​ឆ្នាំ​នៃ​ការ​ដួល​រលំ​របបខ្មែរ​ក្រហម។ ត្បិត​នៅឆ្នាំ​នេះ ​ថ្ងៃ​៧មករា ត្រូវបាន​រៀប​ចំ​ឡើង​ទ្រង់​ទ្រាយធំក៏ដោយ ប៉ុន្តែ​នៅ​តែមានការ​លើក​ឡើង​ខុសគ្នា​ពី អត្ថន័យ​នៃថ្ងៃនេះ ដោយ​បក្សកាន់អំណាច​ថា​វៀតណាមជាអ្នកមានគុណ តែខាងអ្នកប្រឆាំងថាជាថ្ងៃដែល​វៀត​ណាម​ឈ្លានពានទឹកដីខ្មែរ​។ សម្រាប់​អ្នកនាំពាក្យ ​គណបក្ស​ប្រជាជនកម្ពុជា ​ ​ អ្នក​ដែល​ថា​​វៀតណាម​ជាអ្នក​ឈ្លាន​ពាន​កម្ពុជា​ ក៏​គួរ​តែ​ហ៊ាន​និយាយថា ​អាមេរិក​ និង​វៀតណាម​ខាង​ត្បួងជា​អ្នកឈ្លាន​ពាន​កម្ពុជា​ផងដែរ​។

លោក ញឹក ប៊ុនឆៃ ប្រធាន​គណបក្ស​ខ្មែរ​រួបរួម​ជាតិ កាល​ពី​ម្សិលមិញ បាន​អំពាវនាវ​ឲ្យ​មាន​ការ​រួប​រួម​គ្នា​ជា​ថ្មី​ទៀត ជាមួយ​គណបក្ស​ហ្វ៊ុនស៊ិនប៉ិច របស់​សម្ដេច​ក្រុម​ព្រះ នរោត្តម រណឫទ្ធិ​។ នៅ​ក្នុង​បទ​សម្ភាស​ជាមួយ​វិទ្យុ​បារាំង​អន្ដរជាតិ លោក ញឹក ប៊ុនឆៃ បាន​ឲ្យ​ដឹង​ថា ការ​អំពាវនាវ​​របស់​លោក​​​នេះ ធ្វើ​ឡើង​ដើម្បី​រក្សា​កេរដំណែល​គណបក្ស​ហ្វ៊ុនស៊ិនប៉ិចឲ្យ​បាន​យូរ​អង្វែង​។ ក្រៅ​ពី​នោះ លោក​ក៏​ចង់​រៀបចំ​ត្រួស​ត្រាយ​ផ្លូវ​សម្រាប់​អ្នក​ជំនាន់​ក្រោយ​នៅ​ក្នុង​ជួរ​គណបក្ស ខណៈ​លោក ក៏​ដូច​ជា​សម្ដេច​ក្រុម​ព្រះ មាន​វ័យ​កាន់​តែ​ជរា​ទៅ​ហើយ​។

ភ្ញៀវប្រចាំថ្ងៃ​របស់​វិទ្យុ​បារាំង​អន្តរជាតិ​RFI​នៅរាត្រីនេះ​ គឺ​ លោក​ វ៉ាត់ ​ចំរើន ​អគ្គលេខាធិការ​​នៃ​គណៈកម្មាធិការ​ជាតិ​អូឡាំពិក​កម្ពុជា ​។​ លោក​ វ៉ាត់ ​ចំរើន​ ដែល​បាន​ដឹក​នាំ​កីឡា​ថ្មើរ​ជើង​ជាង​មួយពាន់នាក់ ​ដើរ​ទស្សនា​តំបន់​ចុង​ក្រោយ​របស់​ខ្មែរ​ក្រហម​នៅស្រុក​អន្លង់វែង​ខេត្ត​ឧ​ត្ត​រ​មានជ័យ​។ បើតាម​លោក ​វ៉ាត់ ​ចំរើន​ ព្រឹត្តិការណ៍នេះ​ ក្រៅពី​ទាក់​ទាញ​ភ្ញៀវទេសចរ​ឲ្យ​មក​ទស្សនា​តំបន់​ទេសចរណ៍​ ក៏​ជា​ផ្នែក​មួយ​អបអរ​ខួប​លើក​ទី​៤០​នៃ​ជ័យជម្នះ​៧​មករា ​និង​ខួប​២០​ឆ្នាំ​នៃ​ការបញ្ចប់​សង្គ្រាម​ស៊ីវិល​នៅ​កម្ពុជា​។

លោក ផៃ ស៊ី​ផាន បាន​ឆ្លើយតប​នឹង​សេចក្តី​ព្រួយបារម្ភ​នានា បន្ទាប់ពី​រដ្ឋាភិបាល​ក​ម្ពុ​ជា​បានសម្រេច​យល់ព្រម​ជាគោលការណ៍​កាត់​ដី​ចំនួន២០ហិកតា​នៅ​បឹង​តា​មោក ដើម្បី​សាងសង់​ជា​ផ្សារ​ផ្គត់ផ្គង់​បន្លែ ផ្លែឈើ និង​ជា​ចំណតរថយន្ត និង​អនុញ្ញាត​រើ​ផ្សារ​បន្លែ​ពីសារ​ដើម​គរ ទៅ​ផ្សារ​ថ្មី​នៅ​បឹង​តា​មោក​នេះ។ សូម​ជម្រាបជូន​ថា បឹង​តា​មោក​ឬ​បឹង​ទំនប់​កប់​ស្រូវ ជា​បឹង​ធម្មជាតិ​មួយ ស្ថិតនៅក្នុង ខណ្ឌ​ព្រែក​ព្នៅ រាជធានី​ភ្នំពេញ។ កាលពី​ខែកុម្ភៈ ឆ្នាំ២០១៦ រដ្ឋាភិបាល​កម្ពុជា បានចេញ​អនុក្រឹត្យ​ស្ដីពី​ការកំណត់​ផ្ទៃ​បឹង​តា​មោក​ជាស​ម្ប​តិ្ត​របស់​រដ្ឋ ដែលមាន​ផ្ទៃដី​សរុប​ប្រមាណ ៣២៣៩ ហិកតា សម្រាប់​ស្តុក​ទឹក​កខ្វក់ និង​រំដោះ​ទឹក​ចេញពី​រាជធានី​ភ្នំពេញ។ បើតាម​លោក ផៃ ស៊ី​ផាន តាមរយៈ​គម្រោង​ខាងលើនេះ នឹង​ប្រែក្លាយ​តំបន់​បឹង​តា​មោក ទៅជា​តំបន់​សេដ្ឋកិច្ច និង​ទេសចរណ៍​ថ្មី​របស់​កម្ពុជា។

ទោះជា​មាន​ការ​រារាំង​ពី​សំណាក់​អាជ្ញាធរ​ដែន​ដី ​ដោយ​មិន​ឲ្យ​សង់​រោង​នៅលើ​ផ្លូវ​សាធារណៈ​ក៏ដោយ ​ក៏​កម្មវិធី​ប្រារព្ធ​ខួប​៥​ឆ្នាំ ​នៃ​ព្រឹត្តិការណ៍​ហឹ​ង្សា​រ​នៅ​រោងចក្រ​យ៉ាក​ជីន ​និង​ផ្លូវ​វ៉េងស្រេង​ ដែល​រៀបចំ​ឡើង​ដោយ​ក្រុម​សហជីព​នៅ​តែ​ប្រព្រឹត្តិ​ទៅ​ដូច​បាន​គ្រោង​ទុក​។ ​លោក ​វន់ ពៅ ​ប្រធាន​សមាគម​ប្រជាធិបតេយ្យ​ឯករាជ្យ ​នៃ​សេដ្ឋកិច្ច​ក្រៅ​ប្រព័ន្ធ ​ថ្លែង​ឲ្យ​ដឹង​ថា ​ការ​រំលឹក​ព្រឹត្តិការណ៍​នេះ ​គឺ​ជា​ការ​បង្ហាញ​នូវ​វីរៈភាព​របស់​បាតុករ ​ក្នុង​ការ​ទាមទារ​សិទ្ធិ​សេរីភាព ​និង​ទាមទារ​លក្ខខណ្ឌ​ការងារ​សមរម្យ​ផង​ដែរ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ គឺ​លោក ​ម៉ម​ សូណង់ដូ​។​ ប្រធាន​គណ​បក្ស​សំបុក​ឃ្មុំ សង្គម​ប្រជាធិបតេយ្យ​រូបនេះ ក៏​ជា​ប្រធាន​​ប្តូរវេន​នៃ​ ឧត្តម​ក្រុម​ប្រឹក្សា​ពិគ្រោះ និង​ផ្តល់​យោបល់​សម្រាប់​ខែ​មករា​ឆ្នាំ​២០១៩​នេះ​ផងដែរ​។​ ក្នុង​តួនាទី​នេះ លោក​ ម៉ម​ សូណង់ដូ​ បានអះអាងថា​ លោក​នឹង​កោះ​ហៅ​រដ្ឋមន្រ្តី​ក្រសួង​កសិកម្ម​មក​សួរ​នាំ​ជុំ​វិញ​រឿង​បទ​ល្មើស​នេសាទ​ទូទាំង​ប្រទេស​។​ បញ្ហា​នេសាទ​ដែល ​លោក ​ម៉ម​ សូណង់ដូ​ ប្តេជ្ញា​ចិត្ត​ថា​នឹង​ធ្វើ​ឲ្យ​បាន​ជោគជ័យ​នៅ​អាណត្តិ​នេះ​។

រយៈពេល​ពេញ​ឆ្នាំ​២០១៨ ​ករណី​ជួញដូរ​គ្រឿង​ញៀន​នៅ​ប្រទេស​កម្ពុជា ​មាន​ការ​ថយ​ចុះ ​បើ​ធៀប​ទៅ​នឹង​ឆ្នាំ​២០១៧ ​ដោយ​ឆ្នាំ​២០១៨ ​សមត្ថកិច្ច ​បាន​ធ្វើ​ការ​បង្ក្រាប​សរុប​ជាង​៨​ពាន់​ករណី​ និង​ឃាត់​ខ្លួន​មនុស្ស​បាន​ជាង​១៦ ០០០​​នាក់ ​ខណៈ​គ្រឿងញៀន​ជាង​កន្លះ​តោន​ត្រូវ​បាន​រឹបអូស​។ ​អគ្គ​លេខាធិការ​អាជ្ញាធ​រ​ជាតិ​ប្រយុទ្ធ​ប្រឆាំង​គ្រឿងញៀន​លោក ​មាស វី​រិ​ទ្ធ ​ថ្លែង​ថា​គឺ​ជា​លទ្ធផល​ដ៏​វិជ្ជមាន​មួយ​ក្នុង​ការ​បង្ក្រាប​គ្រឿងញៀន​ឆ្នាំ​២០១៨​។​ទោះយ៉ាងណា ​លោក​ថា ​លទ្ធផល​នេះ​ គឺ​បាន​មក​ដោយសារ ​ការ​ចូលរួម​ពី​ផ្នែក​ពាក់ព័ន្ធ​និង​​សហគមន៍​​ប្រជា​ពលរដ្ឋ​ផង​ដែរ​។

ភ្ញៀវ​ប្រចាំ​ថ្ងៃ​របស់​យើង​នា​រាត្រី​នេះ​គឺ កញ្ញា លី ពិសី អ្នក​សម្រប​សម្រួល​សហគមន៍​ឥន្ទធនូ​កម្ពុជា​។ សហគមន៍​ឥន្ទធនូ​កម្ពុជា នា​ថ្ងៃ​អាទិត្យ​នេះ បាន​ប្រារព្ធ​ខួប​១០​ឆ្នាំ នៃ​ការ​ដំណើរការ​របស់​ខ្លួន​នៅ​កម្ពុជា​។ ក្នុង​រយៈ​ពេល​១០​ឆ្នាំ​នេះ កញ្ញា លី ពិសី បាន​អះអាង​ពី​ការ​រីក​ចម្រើន​នៃ​ការ​យល់​ដឹង​អំពី​សិទ្ធិ​របស់​អ្នក​ស្រឡាញ់​ភេទ​ដូច​គ្នា​នៅ​កម្ពុជា​ និង​ការ​ទទួល​ស្គាល់​ពី​សំណាក់​រដ្ឋាភិបាល​។ ប៉ុន្តែ​យ៉ាង​ណា​ក៏​ដោយ កញ្ញា ចង់​ឃើញ​រដ្ឋាភិបាល​បង្ហាញ​សកម្មភាព​បន្ថែម​ទៀត ពិសេស​ការ​តាក់​តែង​ច្បាប់​ដើម្បី​ការពារ​និង​គាំទ្រ​​អ្នក​ស្រឡាញ់​ភេទ​ដូច​គ្នា​។

មជ្ឈ​មណ្ឌល​សិទ្ធិ​មនុស្ស​កម្ពុជា​ បាន​ចេញ​កំណត់​ត្រា​សង្ខេប​មួយ​នៅ​ថ្ងៃ​ទី​២០​ធ្នូ ​ដោយ​ធ្វើ​ការ​សិក្សា​ទៅ​លើ​ករណី​ជម្លោះ​ដីធ្លី​៣​កន្លែង​សំខាន់​ៗ​ ក្នុង​នោះ​ពាក់ព័ន្ធ​នឹង​តំបន់​សេដ្ឋកិច្ច​ពិសេស​ផងដែរ​។​ ប៉ុន្តែ ​វណ្ណ ​សុផាត​ អ្នក​សម្រប​សម្រួល​គម្រោង​ធុរកិច្ច ​និង​សិទ្ធិ​មនុស្ស​នៃ​មជ្ឈមណ្ឌល​សិទ្ធិមនុស្ស​កម្ពុជា ​បាន​លើក​ឡើង​ថា​ តាំង​ពី​លោក ​ជា ​សុផារ៉ា​ ឡើង​មក​ធ្វើ​ជា​រដ្ឋមន្រ្តី​ក្រសួង​រៀប​ចំដែនដី​មក​ ជម្លោះ​ដីធ្លី​ត្រូវ​បាន​កាត់​បន្ថយ ​តែ​លោក​ថា​ពិបាក​ស្វែង​រក​តួលេខ​មក​បញ្ជាក់​។