ជុំវិញ​វិធាន​ការ​ការពារ​ទីផ្សារ​របស់​សហភាព​អឺរ៉ុប ដែល​ធ្វើ​ឲ្យ​មាន​ការ​សម្រេច​ដក​ពន្ធ​គយ​អនុ​គ្រោះ​ពី​កម្ពុជា ក្នុង​ការ​នាំ​អង្ករ​កម្ពុជា​ទៅ​សហភាព​អឺរ៉ុប​រយៈ​ពេល​៣​ឆ្នាំ ក្រសួង​ពាណិជ្ជកម្ម​កម្ពុជា នឹង​ធ្វើ​ការ​សិក្សា​អំពី​លទ្ធភាព​ធ្វើ​ការ​តវ៉ា​នាំ​យក​ទីផ្សារ​អឺរ៉ុប​សម្រាប់​អង្ករ​កម្ពុជា​ឡើង​វិញ​។ លោក ឡុង កែមវិចិត្រ អ្នក​នាំ​ពាក្យ​រង​ក្រសួង​ពាណិជ្ជ​កម្ម ថ្លែង​ថា​កម្ពុជា​អាច​នៅ​មាន​ច្រក​ចេញ​ដោយ​សារ​របាំង​ពន្ធ​គយ​សហភាព​អឺរ៉ុប បាន​រាប់​បញ្ចូល​ទាំង​អង្ករ​ក្រអូប​កម្ពុជា ដែល​ប្រទេស​ជា​សមាជិក​អឺរ៉ុប​អត់​មាន​ផលិត​។

របាំ​ព្រះ​រាជ​ទ្រព្យ​រឿង​នាង​វឌ្ឍនា​ទេវី នឹង​ចាប់​សម្ដែង​ជូន​ទស្សនិកជន​នៅ​សាល​មហោស្រព​ចតុមុខ ពី​ថ្ងៃ​សៅរ៍​ស្អែក​នេះ​រហូត​ដល់​ថ្ងៃ​អាទិត្យ។ កញ្ញា សុខ ណាលីស និង​ លោក នួន ឆៃលត ដែល​ជា​នាដក​និង​នាដកា បានឲ្យ​ដឹង​​នៅ​ក្នុង​បទ​សម្ភាស​ជាមួយ​វិទ្យុ​បារាំង​អន្ដរជាតិ​ថា អ្នក​របាំ​ទាំង​អស់ នឹង​រាំ​របាំ​រឿង​នាង​វឌ្ឍនាទេវី​នេះ តាម​របៀប «ភ្លូក»​។ ជា​ចលនា​រាំ​​តាំង​ពី​ឆ្នាំ ១៩០៦ ​ដែល​សម្ដេច​ព្រះ​រាម​បុប្ផា​ទេវី ស្រាវ​ជ្រាវ​ឡើង​វិញ ហើយ​រៀបចំ​ដំឡើង​ជា​រឿង​មួយ​ថ្មី​ដើម្បី​ជា​ចំណី​ចក្ខុ​របស់​ទស្សនិកជន​។

ទី​បំផុត​សហភាព​អឺរ៉ុប​ដែល​ប្រជុំ​ដោយ​ប្រទេស​ជឿនលឿន​ចំនួន​២៨​ប្រទេស ​នឹង​គិត​ពន្ធ​នាំចូល​អង្ករ​ពី​ប្រទេស​កម្ពុជា ​នៅ​ក្នុង​រយៈពេល​៣​ឆ្នាំ​ខាងមុខ​។ ​ជា​វិធាន​ការ​ដែល​ទាក់ទង​ទៅនឹង​ប្រព័ន្ធ​ Safe Guard ​ស្នើ​ឡើង​ដោយ​អ៊ីតាលី​និង​អេ​ស្ប៉ា​ញ​។ ​ទោះជា​មិនទាន់​ចេញ​សេចក្តីសម្រេច​ផ្លូវការ​ក៏ដោយ ​តែ​លោក​ឧកញ៉ា ​សុង សារ៉ន ​អគ្គ​នាយក​ក្រុមហ៊ុន ​Amru Rice ​ដែល​ជា​ក្រុមហ៊ុន​នាំ​អង្ករ​ចេញ​ធំ​មួយ​ទៅ​កាន់​ទីផ្សារ​អឺរ៉ុប​ថ្លែង​ថា ​កម្ពុជា​នៅ​តែ​មាន​សង្ឃឹម​ចរចា​ជាមួយ​សហភាព​អឺរ៉ុប ​ខណៈ​បញ្ហា​នេះ ​មិន​មាន​ជាប់​ពាក់ព័ន្ធ​នឹង​បញ្ហា ​EBA ​នោះ​ទេ ​គឺ​គ្រាន់តែ​ជួន​ពេល​គ្នា​ដោយ​ចៃដន្យ​ប៉ុណ្ណោះ​។

ក្រសួង​សេដ្ឋកិច្ច​កម្ពុជា​ នៅ​ព្រឹក​ថ្ងៃ​អង្គារ​នេះ ​បាន​បើក​វេទិកា​សាធារណៈ​មួយ​ស្តីពី​ការ​គ្រប់​គ្រង​​ម៉ា​ក្រូ​សេដ្ឋកិច្ច ​និង​​ថវិកា​ជាតិ​ឆ្នាំ​២០១៩​។​ ថវិកា​ជាតិ​ឆ្នាំ​២០១៩ ​ដែល​កម្ពុជា​គ្រោង​ចំណាយ​ជាង​៦​ពាន់​លាន​ដុល្លារ​។​ ប៉ុន្តែ​នៅ​ខ្វះ​ថវិកា​មួយភាគ​ទៀត​ ដែល​ត្រូវការ​ខ្ចី​ពី​បរទេស​។​ មន្រ្តី​ជាន់​ខ្ពស់​ក្រសួង​សេដ្ឋកិច្ច ​បាន​អះអាងថា​ កម្ចី​ទាំង​នេះគឺ​មិន​មាន​ការ​ប្រាក់​នោះ​ទេ​ ហើយ​ថា​ កម្ពុជា​​នៅមាន​លទ្ធភាព​ខ្ចីលុយ​ពី​បរទេស​បាន​ច្រើន​ទៀត​ផង​។

តុលាការ​ខេត្ត​កំពង់ស្ពឺ​បាន​ចេញ​ដីកា​កោះ​ហៅ​លោក​ ប៉ាវ​ ស៊ីណា ​ប្រធាន​សហជីព​ចលនា​កម្មករ ឲ្យ​ចូល​ខ្លួន​ទៅ​ឆ្លើយ​ដោះ​សារ​តាម​បណ្តឹង​ទាស់​របស់​ខ្លួន​នៅថ្ងៃ​ទី១៧​ខែ​មករានេះ​។​ ជា​ការ​បើក​សវនាការ​ឡើង​វិញ​បន្ទាប់​ពី​តុលាការ​បាន​កាត់​ទោស​ពី​បទ​ញុះ​ញង់​ឲ្យ​ប្រព្រឹត្តិ​បទ​ឧក្រិដ្ឋ​ ទាក់​ទង​នឹង​វិវាទ​ការងារ​របស់​កម្មករ​នៅរោង​ចក្រ​ក្នុង​បុរី​កម្មករ​ក្រុង​ច្បាមន​ កាលពី​ថ្ងៃទី​១២​មករា​ឆ្នាំ២០១៦​។​ ប៉ុន្តែ​លោក ​ប៉ាវ​ ស៊ីណា ​ដែល​អះអាងថា​លោក​ជា​ជន​រង​គ្រោះ ​ហើយ​​ត្រូវ​បាន​គេ​កាឡៃថា​ជា​ជន​ល្មើស​កន្លងមក​នោះ ​នឹង​ទទួល​បាន​យុត្តិធម៌​មក​វិញ ​ខណៈ​មន្រ្តី​តុលាការ​ដែល​កាន់​សំណុំ​រឿង​នេះ​ត្រូវ​បាន​ផ្លាស់​ចេញ​។

អដ្ឋិធាតុ​​ជន​រង​គ្រោះ​​ក្នុង​សម័យ​​ខែ្មរ​​ក្រហម​​ជាង​១០​ម៉ឺន​​បំណែក​ ត្រូវ​​បាន​​ក្រសួង​​វប្បធម៌​​​​ចុះ​​បញ្ជី​​ទុក​​ជា​​វត្ថុ​​អភិរក្ស​​សម្រាប់​​មនុស្ស​​ជំនាន់​​ក្រោយ​ ​សិក្សា​​ស្វែង​​យល់​ ក្រោយ​​ពី​​ធ្វើ​​កំ​ណាយ​​លើ​​ទី​តាំង​​ពិឃាត​​មនុស្ស​​សំខាន់ៗ​​នៅ​​ទូ​ទាំង​​ប្រទេស​តាំង​​ពី​​ឆ្នាំ​ ២០១២ ​រហូត​​បច្ចុប្បន្ន​​។​ លោក​ វឿន ​វុទ្ធី​ ប្រធាន​​នាយក​ដ្ឋា​ន​​បុរាណ​វិទ្យា​​និង​​បុ​រេ​​ប្រវត្ដិ​​វិទ្យា​​នៃ​​ក្រសួង​​វប្បធម៌​​និង​​វិចិត្រ​​សិល្បៈ​​បាន​​ថ្លែង​​​ថា​ ការ​អភិរក្ស​​នេះគឺ​ចង់​បញ្ជាក់​ឲ្យ​ច្បាស់​ថា ​ជន​រង​គ្រោះ​ទាំង​នោះគឺ​ត្រូវ​បាន​សម្លាប់​​ក្នុង​​សម័យ​ខ្មែរ​ក្រហម ពោល​​មិនមែន​ត្រូវ​បាន​គេ​សម្លាប់​ពី​​កន្លែង​​ដទៃ ​​ឬ​ក្រោយ​សម័យ​ខ្មែរ​ក្រហម​នោះទេ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ គឺ ព្រះ​អង្គ​ម្ចាស់ ស៊ីសុវត្ថិ តេសសូ និង​អ្នក​គ្រូ វ័ន សាវ៉ៃ​ អំពី​ការ​សម្ដែង​របាំ​ព្រះ​រាជ​ទ្រព្យ​បង្កើត​ថ្មី​រឿង នាង​វឌ្ឍនាទេវី។ ជា​ការ​សម្ដែង​ដែល​រៀបចំ​ធ្វើ​នៅ​សាល​មហោស្រព​ចតុមុខ ចាប់​ពី​ថ្ងៃ​ទី​១៨​ដល់​ថ្ងៃ​ទី​១៩​មករា ចុង​សប្ដាហ៍​ក្រោយ​នេះ​។ នៅ​ក្នុង​បទ​សម្ភាស​ជាមួយ​វិទ្យុ​បារាំង​អន្ដរជាតិ ព្រះ​អង្គ​ម្ចាស់​ស៊ីសុវត្ថិ តេសសូ និង​អ្នក​គ្រូ វ័ន សាវ៉ៃ បាន​ពន្យល់​ពី​ឫស​គល់​នៃ​របាំ​ព្រះ​រាជ​ទ្រព្យ​ ដោយ​បាន​អះអាង​ថា របាំ​ព្រះ​រាជ​ទ្រព្យ ថ្វី​ត្បិត​តែ​ជា​របាំ​បុរាណ ប៉ុន្តែ​របាំ​ជា​ទី​សក្ការៈ​និង​ជា​ទស្សនីយភាព​នេះ មិន​មែន​នៅ​នឹង​មួយ​កន្លែង ឥត​ការ​វិវត្ត​នោះ​ទេ​។

អ្នក​សារព័ត៌មាន​ក្នុង​ស្រុក​ប្រមាណ​ជាង​៤ពាន់​នាក់ នៅ​ល្ងាច​ថ្ងៃទី​១១​ខែ​មករា​នេះ បាន​ជួប​ជាមួយ​ប្រមុខ​រដ្ឋា​ភិបាល​កម្ពុជា លោក​នាយក​រដ្ឋមន្ត្រី ហ៊ុន សែន​។ គឺ​ជា​ជំនួប​ប្រចាំ​ឆ្នាំ​បែប​អាហារ​សាមគ្គី​លើក​ទី៣​។ លោក ប៉ែន បូណា ប្រធាន​ក្លឹប​អ្នក​កាសែត​កម្ពុជា និង​ជា​និពន្ធ​នាយក​ព័ត៌មាន​ទូរទស្សន៍ PNN ថ្លែង​ថា​គឺ​ជា​ជំនួប​មួយ​ប្រកប​ដោយ​ភាព​វិជ្ជមាន ដោយ​អ្នកសារ​ព័ត៌មាន ពិត​ជា​មាន​ភាព​ចាំ​បាច់ ត្រូវ​ជួប​មនុស្ស​គ្រប់​គ្នា និង​គ្រប់​និន្នាការ ដើម្បី​កសាង​ទំនាក់​ទំនង​ជា​ធម្មតា រវាង​អ្នក​សារព័ត៌មាន និង​រដ្ឋា​ភិបាល រួម​ទាំង​មន្ត្រី​ពាក់​ព័ន្ធ​នានា​។

នៅក្នុងនាទី​ភ្ញៀវ​ប្រចាំ​ថ្ងៃ​របស់​យើង​នា​រាត្រី​នេះ យើង​នឹង​ជជែក​អំពី​ប្រធាន​បទ​ជំងឺ​ផ្លូវ​ចិត្ត ដោយ​និយាយ​តែ​ពី​ជំងឺ​ធ្លាក់​ទឹក​ចិត្ត​។ ជំងឺ​ធ្លាក់​ទឹក​ចិត្ត ត្រូវ​បាន​អង្គការ​សុខភាព​ពិភពលោក​ព្យាករណ៍​ថា នឹង​ក្លាយ​ជា​ឃាតករ​ទី​២​ដែល​សម្លាប់​មនុស្ស​ច្រើន​ជាង​គេ​នៅ​លើ​ពិភពលោក​។ តើ​ជំងឺ​ធ្លាក់​ទឹក​ចិត្ត​ជា​អ្វី? មាន​រោគ​សញ្ញា​យ៉ាង​ណា​ខ្លះ? នរណា​ខ្លះ​អាច​ឈឺ​ជំងឺ​នេះ? តើ​អាច​ព្យាបាល​បានដោយ​វិធី​ណា​ខ្លះ?​ យើង​នឹង​ស្វែង​រក​ចម្លើយ​ទាំង​អស់​នេះ តាម​រយៈ​បទ​សម្ភាស​រវាង​អ៊ឹម រចនា និង​លោក ឈឹម សុធារ៉ា វេជ្ជបណ្ឌិត​ឯកទេស​ជំងឺ​ផ្លូវ​ចិត្ត និង​ជា​នាយក​ប្រតិបត្តិ​អង្គការ​ចិត្ត​សង្គម​អន្ដរ​វប្បធម៌ TPO។

កម្មករ កម្មការិនី នៃ​រោងចក្រ​កាត់ដេរ W&D រាប់​រយ​នាក់ បាន​មក​ប្រមូល​ផ្តុំ​គ្នា នៅ​សហ​ភាព​ការងារ​កម្ពុជា របស់​លោក អាត់ ធន់ ដើម្បី​សុំ​ឲ្យ​សហជីព​មួយ​នេះ ជួយ​អន្តរាគមន៍ ដោះស្រាយ​ជាមួយ​រោង​ចក្រ ខណៈ​ក្រុម​ហ៊ុន​បាន​បញ្ឈប់​កម្មករ​ប្រមាណ​១ពាន់​នាក់​។ លោក អាត់ ធន បាន​បញ្ជាក់​ថា លោក​នឹង​សិក្សា​មើល​ករណី​នេះ ថា​តើ​គួរ​ជួយ​ដោះស្រាយ​បែប​ណា ដើម្បី​ឲ្យ​វិវាទ​មួយ​នេះ បញ្ចប់​ទៅ​វិញ ដោយ​មិន​មាន​ការ​រំលោភ​បំពាន​ទៅ​លើ​លក្ខខណ្ឌ​ការងារ​។