ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ គឺ​លោក អ៊ា ចរិយា នាយក​វិទ្យាស្ថាន​សុវត្ថិភាព​ចរាចរណ៍។ ប្រឈម​នឹង​អត្រា​គ្រោះ​ថ្នាក់​ចរាចរណ៍ និង​អ្នក​ស្លាប់​ដោយ​សារ​គ្រោះ​ថ្នាក់​ចរាចរណ៍​ដែល​មិន​ថម​ថយ​សោះ​ លោក អ៊ា ចរិយា បានលើក​ឡើង​ថា កម្ពុជា​ត្រូវ​មាន​ឆន្ទៈ​រឹង​មាំ​និង​ខ្ពស់​ជាង​នេះ​ថែម​ទៀត ទើប​អាច​ឈាន​ទៅ​កាត់​បន្ថយ​គ្រោះ​ថ្នាក់​ចរាចរណ៍នៅ​កម្ពុជា​បាន​។

កាល​ពី​ម្សិល​ម្ងៃ ​អង្គការ​ជាតិ​ និង​អន្តរជាតិ​ចំនួន​៩៥​ស្ថាប័ន ​បាន​ចេញ​សេចក្តី​ថ្លែង​ការណ៍​រួម​គ្នា ដោយ​ទាមទារ​ឲ្យ​ទម្លាក់​ការ​ចោទ​ប្រកាន់​លើ​មេដឹកនាំ​សហជីព​ចំនួន​៦នាក់​នៅ​កម្ពុជា​។​ ភ្ញៀវប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅរាត្រីនេះ​ គឺ​លោក​ អាត់​ ធន់​ ប្រធាន​សហភាព​ការងារ​កម្ពុជា​។ ​លោក​ អាត់​ ធន់​ គឺ​ជា​មេ​ដឹក​នាំ​សហជីព​ម្នាក់​ក្នុង​ចំណោម​មេដឹក​នាំ​សហជីព​ទាំង​៦​នាក់​ដែល​តុលាការ​ក្រុង​ភ្នំពេញ​ កាត់​ទោស​២ឆ្នាំ​កន្លះ ​តែ​ត្រូវ​ព្យូរ​ទោស​ ហើយ​​បង្គាប់​ឲ្យ​សង​ជំងឺ​ចិត្ត​ចំនួន​៣៥​លាន​រៀល​ទៅ​ភាគី​ដើម​បណ្តឹង​ជា​ថៅកែ​រោងចក្រ​។

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោក​បណ្ឌិត​ប៉ា ចន្ទ​រឿន ប្រធាន​មជ្ឈមណ្ឌល​ទស្សនវិជ្ជា​អនុវត្ត និង​សីលធម៌​កម្ពុជា។ ជុំវិញ​ការជូន​កាដូ​ឲ្យ​គ្នា​នៅក្នុង​ពិធីបុណ្យ ផ្សេងៗជាពិសេស បុណ្យ​គ្រី​ស្មាស​នៅថ្ងៃនេះ​តែម្តង លោកប៉ា ចន្ទ​រឿន បាន​ជំរុញ​ឲ្យ​ពលរដ្ឋ​ខ្មែរ​គួរ​ទម្លាប់​ជូន​កាដូ​ឲ្យ​គ្នា​ជា​សៀវភៅ​ជំនួស​បាច់ផ្កា​ឬ​ដប​ស្រា។ លោក​អះអាងថា ការធ្វើ​ដូច្នេះ គឺជា​ការ​ចែកចាយ​ចំណេះដឹង ក៏ដូចជា​លើកទឹកចិត្ត​ដល់​ការអាន​សៀវភៅ​ផងដែរ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ គឺ​លោក ព្រំ សិលា ប្រធាន​ថ្មី​នៃ​សមាគម​ភាពយន្ត​កម្ពុជា​។ នៅ​ក្នុង​បទ​សម្ភាស​ជាមួយ អ៊ឹម រចនា លោក ព្រំ សិលា បាន​លើក​ឡើង​ពី​បញ្ហា​ប្រឈម​នានា ដែល​កំពុង​គំរាម​កំហែង​វិស័យ​ភាពយន្ត​នៅ​កម្ពុជា​។ សម្រាប់​លោក ព្រំ សិលា ប្រសិន​បើ​អាច​ដោះ​ស្រាយ​បញ្ហា​ប្រឈម​អស់​ទាំង​នោះ​បាន ខ្សែ​ភាពយន្ត​ខ្មែរ​ពិត​ជា​អាច​ឈាន​ទៅ​ដល់​ឆាក​អន្ដរជាតិ​ជាក់​ជា​ពុំ​ខាន​។ តើ​បញ្ហា​ប្រឈម​ទាំង​នោះ​មាន​អ្វី​ខ្លះ?

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោ​កអំ សំអាត មន្ត្រីជាន់ខ្ពស់​ផ្នែក​ស៊ើបអង្កេត​របស់​អង្គការ​ការពារ​សិទ្ធិមនុស្ស​លីកាដូ។ ជុំវិញ​បញ្ហា​អនីតិជន​កំពុងមាន​ចំនួន​ច្រើន​នៅក្នុង​ពន្ធនាគារ​សព្វថ្ងៃ លោក​អំ អាត បាន​អះអាងថា វា​នឹងធ្វើ​ឲ្យ​ប៉ះពាល់​ខ្លាំង​ដល់​សង្គមជាតិ ពីព្រោះ​អនីតិជន​គឺជា​ទំពាំង​ស្នង​ឫស្សី និង​ជាស​រសរ​ទ្រូង​របស់​ជាតិ។ ដូច្នេះហើយ លោក​ជំរុញ​ឲ្យស្រាយ​បញ្ហា​នេះ​ជាបន្ទាន់។

សៀវភៅ​រឿង​«ព្រៃរំដួល»​ត្រូវ​បាន​បោះ​ពុម្ព​ និង​លក់​ដាច់​ស្ទើ​ទាំង​អស់​ ខណៈ​មិន​ទាន់​សម្ពោធ​ជាផ្លូវ​ការ​នៅឡើយ។ ​សៀវភៅ​កម្រាស់​២០០​ទំព័រ​នេះ ​គឺ​ជា​ការ​ម្រមូល​ចង​ក្រង​ស្នាដៃ​របស់​អ្នក​និពន្ធ​ទាំង​វ័យ​ចំណាស់​និង​វ័យ​ក្មេង​សរុប​២១​នាក់​។​ នៅ​ក្នុង​នាទី​​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រី​នេះ​ លោក​ ឃុត​ សុខឿន​បាន​បញ្ជាក់​ថា​ សៀវ​ភៅ​រឿង​«ព្រៃរំដួល»​ឆ្លុះ​បញ្ចាំង​ពី​សង្គម​ខ្មែរ​ តែ​មិន​ពាក់​ព័ន្ធ​នយោបាយ​ឡើយ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ RFI នា​រាត្រី​នេះ គឺ​លោក សេង ពិសិដ្ឋ ម្ចាស់​ជ័យ​លាភី​លេខ​១ផ្នែក​ឆុង​កាហ្វេ ប្រចាំ​ឆ្នាំ​២០១៨ និង​ជា​ស្ថាបនិក​ហាង​កាហ្វេ​មួយ​។ នៅ​ក្នុង​បទ​សម្ភាស​ជាមួយ​វិទ្យុ​បារាំង លោក សេង ពិសិដ្ឋ បាន​រំលឹក​ពី​បទ​ពិសោធ​នៃ​ការ​ប្រកួត​ប្រជែង​ឆុង​កាហ្វេ​របស់​លោក នៅ​ក្នុង​ឆ្នាំ​២០១៨​នេះ​។ អ្នក​ឆុង​កាហ្វេ​ដៃ​ឯក​រូប​នេះ ណែ​នាំ​ឲ្យ​អ្នក​ចូលចិត្ត​កាហ្វេ ទទួល​ទាន​កាហ្វេ​ដែល​កិន​ស្រាប់​និង​ឆុង​នៅ​ចំពោះ​មុខ ដើម្បី​ធានា​សុវត្ថិភាព ជា​ជាង​ទទួល​ទាន​កាហ្វេ​ដែល​ឆុង​រួច​ស្រេច​ទុក​សម្រាប់​តែ​ចាក់​លាយ​។

ក្រោយ​សាលា​ដំបូង​រាជធានី​ភ្នំពេញ ​បាន​កាត់ទោស ​​ឲ្យ​ជាប់​ពន្ធនាគារ​ ២​ឆ្នាំ​៦​ខែ ​តែ​ត្រូវ​ព្យួរទោស ​និង​បង់​ប្រាក់​ជំងឺ​ចិត្ត​​​រួម​គ្នា​​៦​​នាក់ ​ទៅ​​ជន​រងគ្រោះ​ចំនួន​​៣៥​​លាន​រៀល ​កាល​ពី​ថ្ងៃ​ទី​១១​ធ្នូ ​កន្លង​ទៅ ​លោក ​ប៉ាវ ស៊ីណា ​ប្រធាន​សហភាព​ចលនា​កម្មករ​កម្ពុជា ​បាន​សម្រេច​ចិត្ត​ដាក់​បណ្តឹង​ឧទ្ធរណ៍ ​កាល​ពី​ថ្ងៃ​អង្គារ ​ដោយ​លោក​​បញ្ជាក់​ថា ​ការ​ចោទ​ប្រកាន់​មក​លើ​រូប​​លោក ​គឺ​មាន​ភាពអយុត្តិធម៌​យ៉ាង​ខ្លាំង​។ ​ក្រៅ​ពី​សំណុំ​រឿង​ហឹ​ង្សា​រ​​នៅ​ផ្លូវ​វ៉េង​ស្រេង​ខាង​លើ ​លោក ​ប៉ាវ ស៊ីណា ​ក៏បាន​ត្រៀម​ដាក់​បណ្តឹង​ឧទ្ធរណ៍ លើ​​សំណុំរឿង​២​ផ្សេង​​ទៀត ​​ដែល​​ថៅកែ​​រោងចក្រ​​កាត់​ដេរ​ប្តឹង​លោក ​ដោយ​តុលាការ​កាត់ទោស​កំបាំង​មុខ​​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ គឺ​លោក អ៊ួន បឋម ហៅ សាយ​។ ក្នុង​នាម​ជា​អ្នក​និពន្ធ​ចម្រៀង និង​ជា​អ្នក​ចម្រៀង លោក អ៊ួន បឋម សង្កេត​ឃើញ​ថា និន្នាការ​ចម្លង​ចម្រៀង​ពី​បរទេស កំពុង​តែ​កំរើក​ឡើង​វិញ​នៅ​ស្រុក​ខ្មែរ​ ខណៈ​ពេល​ដែល​ការ​និពន្ធ​ចម្រៀង​ថ្មី​កំពុង​នៅ​ទ្រឹង​។ សម្រាប់​លោក អ៊ួន បឋម ការ​ចម្លង​ចម្រៀង​បរទេស​នេះ គ្រោះ​ថ្នាក់​ណាស់​សម្រាប់​ការ​តែង​និពន្ធ​បទ​ចម្រៀង​ថ្មី​ដែល​មិន​ទាន់​រឹង​មាំ​ល្អ​។ មិន​ត្រឹម​តែ​ប៉ុណ្ណោះ វា​នឹង​ធ្វើ​ឲ្យ​ខ្មែរ​បាត់​បង់​អត្តសញ្ញាណ​នៅ​ក្នុង​វិស័យ​ចម្រៀងថែម​​ទៀត​។

សមាគម​អ្នក​វាយ​តម្លៃ និង​ភ្នាក់​ងារ​អចលន​វត្ថុ​កម្ពុជា បាន​ជ្រើស​រើស​ប្រធាន​ថ្មី​ហើយ កាល​ពី​សប្តាហ៍​មុន ដើម្បី​បន្ត​ដឹក​នាំ​សមាគម​នេះ​នៅ​ក្នុង​អាណត្តិទី៦​។ លោក ច្រឹក សុខនីម នាយក​ប្រតិបត្តិ​ក្រុម​ហ៊ុន Mekong Brokerage និង​ជា​អគ្គ​នាយក​ក្រុមហ៊ុន ២១st Century Mekong ត្រូវ​បាន​ជ្រើស​រើស​ជា​ប្រធាន​ថ្មី​។ ក្នុង​អាណត្តិ​ថ្មី​នេះ លោក ច្រឹក សុខនីម នឹង​បន្ត​ដឹក​នាំ​សមាគម ឲ្យ​មាន​ភាព​រីក​ចំរើន​បន្ថែម​ទៀត និង​កែ​លម្អ​នូវ​ចំណុច​ខ្វះ​ខាត​មួយ​ចំនួន ដែល​អ្នក​ដឹក​នាំ​មុនៗ​នៅ​មិន​ទាន់​បាន​បំពេញ​។