ភ្ញៀវ​ប្រចាំ​ថ្ងៃ​​របស់​​វិទ្យុ​​បារាំង​​អន្តរ​ជាតិ​​RFI​​នៅ​រាត្រី​នេះ ​គឺ​លោក ​អេង​ ឆៃអ៊ាង​ អនុ​ប្រធាន​អតីត​គណ​បក្ស​​សង្រ្គោះ​ជាតិ​។​ ថ្នាក់​ដឹក​នាំអតីត​បក្ស​ប្រឆាំង​នេះ​ចំនួន​៨​រូប​ ត្រូវ​បាន​តុលា​ការ​ក្រុង​ភ្នំពេញចេញ​ដី​កាចាប់​ខ្លួន​រួម​ទាំង​ លោក ​សម​ រង្ស៊ី​ ផង​ ដោយ​ចោទ​ពី​បទ​រួម​គំនិត​ក្បត់​ និង​ញុះញង់​ឲ្យ​មាន​​បទ​​ឧកក្រិដ្ឋ​​ជាអាទិ៍​។​ ប៉ុន្តែ​ លោក​ អេង​ ឆៃអ៊ាង​​ លើក​ឡើង​ថា​ ដីកា​ចាប់​ខ្លួន​នេះមាន​​ចរិក​នយោបាយ​ ដើម្បី​គំរាម​ដល់​អ្នក​ផ្សេង​ទៀត​ក្នុង​ជួរ​គណ​បក្ស​នេះ​​កុំឲ្យ​ធ្វើ​សកម្មភាព​។ ​បើតាម​ លោក​ អេង​ ឆៃអ៊ាង​ ខណៈ​នេះ​​ថ្នាក់​​ដឹក​នាំ​​គណ​បក្ស​​នៅ​ក្រៅ​​ប្រទេស​​កំពុង​តែ​រៀប​​ចំ​ផែន​​ការ​ដង្ហែរ​ លោក ​សម ​រង្ស៊ី​ វិល​មក​កម្ពុជា​វិញ​ក្នុង​​ឆ្នាំ​​២០១៩​នេះ។

ជំរឿន​ប្រជាជន​ឆ្នាំ​២០១៩ ដែល​បាន​គ្រោង​ទុក​និង​ចាប់​ពី​ថ្ងៃ​ទី០៣ ដល់​ថ្ងៃ​ទី១៣​ខែមីនា បាន​បញ្ចប់​ជាស្ថាពរ​ហើយ​នៅ​កាល​ពី​ថ្ងៃ​ទី១៥​ខែ​មីនា​កន្លង​ទៅ​នេះ​។ ក៏​ប៉ុន្តែ​មន្ត្រី​នឹង​បន្ត​ចុះ​ធ្វើ​ជំរឿន​បន្ថែម នៅ​ពេល​មាន​ការ​ហៅ​តាម​ទូរស័ព្ទ​ពី​សំណាក់​ប្រជាពលរដ្ឋ ដែល​មាន​ការ​ខក​ខាន​ក្នុង​ការ​ធ្វើ​ជំរឿន​កាល​ពី​ពេល​ថ្មីៗ​នេះ​។ នេះបើ​តាម​លោកស្រី ហង់ លីណា ប្រតិភូ​រាជ​រដ្ឋាភិបាល​កម្ពុជា​ទទួល​បន្ទុក​អគ្គ​នាយក​វិទ្យាស្ថាន​ជាតិ​ស្ថិតិ​ក្រសួង​ផែន​ការ​។ លោក​ស្រី ហង់ លីណា បញ្ជាក់​ថា​លទ្ធ​ផល​បណ្តោះ​អាសន្ន​នៃ​ជំរឿន​ឆ្នាំ​២០១៩​នេះ នឹង​ធ្វើ​ឡើង​ក្នុង​រយៈ​ពេល​១ខែ បន្ទាប់​ពី​ជំរឿន និង​៩ខែ​ជា​លទ្ធ​ផល​ស្ថាពរ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រី​នេះ គឺ​លោក​ វិចទ័រ ហ្សូណា អគ្គ​នាយក​នៃ​អគ្គ​នាយក​ដ្ឋាន​ថាម​ពល របស់​ក្រសួង​ធនធាន​រ៉ែ និង​ថាម​ពល​។ លោក​បាន​ឲ្យ​ដឹង​ថា កង្វះ​ខាត​អគ្គីសនី​នៅ​កម្ពុជា មាន​ការ​លំបាក​ចំនួន​៧២​ថ្ងៃ ពោល​រហូត​ដល់​ចុង​ខែ​ឧសភា​ខាង​មុខ​។ ប៉ុន្តែ​ប្រសិន​បើ​មាន​ភ្លៀង​ធ្លាក់​មក​វិញ អគ្គីសនី​ក៏​នឹង​មាន​ភាព​ល្អ​ប្រសើរ​ឡើង​វិញ​តាម​នោះ​ដែរ​។ ការ​បញ្ជាក់​យ៉ាង​ដូច្នេះ ដោយ​សារ​តែ​ថាមពល​អគ្គីសនី​ប្រហែល​៦០%​ពឹង​លើ​ចរន្ត​ទឹក​ហូរ​។

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោក​ម៉ៃ ទិ​ត្យ​ថា​រ៉ា និពន្ធ​នាយករង​នៃ​កាសែត​ខ្មែ​ថា​ម​ស៍ (Khmer Times) និង​ជា​ស្ថាបនិក​មជ្ឈមណ្ឌល​ភាសាបរទេស​តា​គិ​ន​នៅក្នុង​ខេត្តស្វាយរៀង។ នៅពេលនេះ មជ្ឈមណ្ឌល​ភាសាបរទេស​តា​គិ​ន​កំពុង​ប្រឈម​នឹង​ការ​ទ្វារ​ដោយសារតែ​មិនមាន​ជំនួយ​ទ្រទ្រង់​តទៅទៀត។ ក្នុងនាម​ជា​ស្ថាប​កនិក លោក​ម៉ៃ ទិ​ត្យ​ថា​រ៉ា កំពុង​ស្វះ​ស្វែងរក​ជំនួយ​មក​ទប់​ទល់នឹង​ការចំណាយ​របស់​មជ្ឈមណ្ឌល​បណ្តុះ​បណ្តាល​មិន​យក​កម្រៃ​មួយ​នេះ។ លោក​ថា ត្រឹមតែ​ម្នាក់៥ដុល្លារ ឫ ២ម៉ឺន​រៀល/ខែ​តែ​ចំនួន១០០នាក់​ប៉ុណ្ណោះ​នឹង​អាចជួយ​បន្ត​ដង្ហើមរស់​មជ្ឈមណ្ឌល​តា​គិ​ន​ហើយ។

ភ្ញៀវប្រចាំថ្ងៃរបស់​វិទ្យុ​បារាំង​អន្តរជាតិRFIនៅរាត្រីនេះ គឺ លោក ហង្ស ពុទ្ធា អ្នកនាំពាក្យ គណៈកម្មាធិការជាតិរៀបចំការបោះឆ្នោត ហៅកាត់ថា គជប។ គជប ដែលបាន​ចេញប្រកាសមួយកាលពីម្សិលមិញ ដោយទទួល​ស្គាល់ជាផ្លូវការ​នៃការចុះ​បញ្ជី​គណបក្សនយោបាយ និង​បញ្ជី​បេក្ខជន​ឈរ​ឈ្មោះឈបោះឆ្នោត​ជ្រើសរើស​ក្រុម​ប្រឹក្សាអាណត្តិទី៣នៅថ្ងៃទី២៦​ខែឧសភាពេលខាងមុខ។ ការបោះឆ្នោត​អសកលមួយ​នេះ គឺមានគណបក្សនយោបាយចំនួន៧ចូលរួម។ យ៉ាងណាក៏ដោយក្នុងចំណោមគណបក្សទាំងនោះ គឺមានតែគណបក្សប្រជាជន​កម្ពុជា​ទេ ដែល​មានសមាជិករបស់ខ្លួនជាក្រុម​ប្រឹក្សា​ឃុំ សង្កាត់ និង​សមាជិករដ្ឋសភា សម្រាប់​ចេញ​ទៅ​បោះឆ្នោត។ តែលោក ហង្ស ពុទ្ធា បញ្ជាក់ថា ទោះគ្មានសមាជិក​សម្រាប់​ចេញទៅបោះឆ្នោត ក៏គណបក្សនីមួយៗមានសិទ្ធិពេញលេញក្នុងការចូលរួមបោះឆ្នោត​ក្រុម​ប្រឹក្សានេះដែរ។

សាលា​ដូង គឺជា​សាលា​ដែល​សាងសង់​ឡើង​ពី​សម្រាម និង​ផ្ដល់ការ​សិក្សា​ក្រៅ​ប្រព័ន្ធ​ឥត​គិត​ថ្លៃ​ដល់​កុមារ​ នៅ​ឧទ្យាន​ជាតិ​គិរីរម្យ​។ លោក អ៊ុក វណ្ណដេ ស្ថាបនិក​សាលាដូង ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​យើង​នា​រាត្រី​នេះ បាន​ឲ្យ​ដឹង​ថា បច្ចុប្បន្ន​នេះ សាលា​ដូង​កំពុង​ខ្វះខាត​គ្រូ​បង្រៀនស្ម័គ្រ​ចិត្ត​។ លោក​បាន​អំពាវនាវ​ដល់​យុវជន​ដែល​មាន​ចំណាប់​អារម្មណ៍ រួម​ចំណែក​ជួយ​បង្រៀន​កុមារ​នៅ​សាលា​ដូង ដើម្បី​អនាគត​របស់​កុមារ​ជិត​២០០​នាក់ ដែល​កំពុង​សិក្សា​នៅ​ទី​នោះ​។

ប្រធានាធិបតី​កូរ៉េ​ខាងត្បូង ​លោក ​មូន ចេអ៊ីន ​បានមក​ដល់​ប្រទេស​កម្ពុជា​ហើយ ​ដើម្បី​ធ្វើទស្សនកិច្ច​ផ្លូវរដ្ឋ​រយៈពេល​៣​ថ្ងៃ ​គឺ​ចាប់​ពី​ថ្ងៃ​ទី​១៤​ដល់​ថ្ងៃ​ទី​១៦​ខែ​មីនា​នេះ​។ ​ជុំវិញ​ដំណើរ​ទស្សនកិច្ច​របស់​ប្រធានាធិបតី​កូរ៉េ​ខាងត្បូង​នៅ​ពេល​នេះ ​លោក​បណ្ឌិត ​ឈាង វណ្ណារិទ្ធិ ​ប្រធាន​វិទ្យាស្ថាន​ចក្ខុ​វិស័យ​អាស៊ី ​បាន​មើលឃើញ​ថា​ជា​ការ​ឆ្លុះ​បញ្ចាំង​ពី​ទំនាក់ទំនង​ដ៏​ល្អ​លើ​វិស័យ​សេដ្ឋកិច្ច ​និង​ការទូត ​រវាង​ប្រទេស​ទាំងពីរ ​ខណៈ​លោក ​មូន ​បាន​ជ្រើសរើស​យក​ប្រទេស​អាស៊ាន​ចំនួន​៣​ប៉ុណ្ណោះ​ធ្វើ​ទស្សនកិច្ច ​គឺ​ប្រ៊ុយណេ ​ម៉ាឡេស៊ី ​និង​កម្ពុជា​។

ក្រសួង​ធនធាន​ទឹក និង​ឧតុ​និយម កាល​ពី​ថ្ងៃ​ទី ១២ មីនា បាន​ចេញ​សេចក្តី​ជូន​ដំណឹង​ពី​ការ​ព្យាករ​អាកាសធាតុ​លើក​ទី២​សម្រាប់​រដូវ​ប្រាំង និង​ដើម​រដូវ​វស្សា​ឆ្នាំ ២០១៩​។ ក្នុង​សេចក្តី​ជូន​ដំណឹង​នោះ ក្រសួង​បាន​សំណូម​ពរ​ឲ្យ​ពលរដ្ឋ​បន្ត​ចូល​រួម​ថែ​រក្សា​ទឹក​ទុក​សម្រាប់​ប្រើ​ប្រាស់​ក្នុង​ជីវ​ភាព​ប្រចាំ និង​អំពាវ​នាវ​ឲ្យ​សាធារណជន​ទាំង​អស់ ត្រូវ​តែ​បង្កើន​ការ​យក​ចិត្ត​ទុក​ដាក់​ប្រុង​ប្រយ័ត្ន​ខ្ពស់​ចំពោះ​បាតុភូត​រន្ទះ និង​ខ្យល់​កន្ត្រាក់ ពិសេស​ការ​ឡើង​កំដៅ នៅ​ក្នុង​អំឡុង​ខែ​មេសា​និង​ឧសភា​ខាង​មុខ​នេះ។ ប្រឈម​នឹង​បញ្ហា​នេះ អ្នក​នាំ​ពាក្យ​គណៈ​កម្មាធិការ​ជាតិ​គ្រប់​គ្រង​គ្រោះ​មហន្តរាយ លោក កែវ វី បាន​អះ​អាង​ថា គិត​ត្រឹម​ថ្ងៃទី ១៣ មីនា​នេះ មាន​ខេត្ត​ចំនួន​១១​កំពុង​ប្រឈម​នឹង​ការ​ខ្វះ​ខាត​ទឹក​ប្រើ​ប្រាស់ ក្នុង​នោះ​ខេត្ត​បាត់​ដំបង កំពង់​ធំ កោះ​កុង និង​ខេត្ត​ព្រះ​សីហនុ ប្រឈម​ធ្ងន់​ធ្ងរ​ជាង​គេ​។ ក្រៅ​ពី​នោះ​ស្រូវ​ប្រជា​ពលរដ្ឋ​ជាង​មួយ​ពាន់​ហិក​តារង​ការ​ខូច​ខាត តែ​មិន​បណ្ដាល​អោយ​ប្រជាពលរដ្ឋ​ស្លាប់​នោះ​ទេ ប៉ុន្តែ​ការ​កើន​ឡើង​កម្ដៅ​នៅ​កម្ពុជា​មិន​បណ្ដាល​អោយ​ប្រជា​ពលរដ្ឋ​រង​គ្រោះ​រហូត​ដល់​ស្លាប់​បាត់​បង់​ជីវិត​នោះ​ទេ​។ តើ​អ្វី​ទៅ​ជា​វិធាន​ការ​របស់​អាជ្ញាធ​រដ្ឋាភិបាល ប្រឈម​នឹង​ស្ថាន​ភាព​នេះ​?

គណៈ​កម្មការ​ប្រយុទ្ធ​ប្រឆាំង​ផលិត​ផល​ក្លែង​ក្លាយ នៅ​ថ្ងៃ​អង្គារ​នេះ បាន​ធ្វើ​ពិធី​កំទេច​ផលិត​ផល​ក្លែង​ក្លាយ ខុស​ច្បាប់​ចំនួន​៧០​តោន ដែល​ក្នុង​នោះ​ភាគ​ច្រើន​ជា​ទឹក​សុទ្ធ​ក្លែង​ក្លាយ​ម៉ាក Evian និង​ផលិត​ផល​ក្លែង​ក្លាយ​របស់​បារាំង​មួយ​ចំនួន​ទៀត​។ លោក មាជ សុផាន់ណា រដ្ឋ​លេខា​ធិការ​ក្រសួង​មហា​ផ្ទៃ និង​ជា​ប្រធាន​គណៈ​កម្មការ​ប្រយុទ្ធ​ប្រឆាំង​ផលិត​ផល​ក្លែង​ក្លាយ​មាន​ការ​កត់​សម្គាល់​ថា​ច្បាប់​សម្រាប់​ដាក់​ទោស​ជន​ល្មើស នៅ​ស្រាល ធៀប​ទៅ​នឹង​ប្រទេស​នា​នា ហើយ​ច្បាប់​នេះ​នៅ​មិន​ទាន់​មាន​វិសាល​ភាព​ធំ​ធេង​នៅ​ឡើយ ស្រប​ពេល​ដែល​ផលិត​ផល​ក្លែង​ក្លាយ​គ្រប់​ប្រភេទ​មាន​ការ​កើន​ឡើង​យ៉ាង​ច្រើន​។

នៅ​ក្នុង​នាទី​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ ​អ៊ឹម រចនា សូម​ណែនាំ​លោក​អ្នក​នាង​ឲ្យ​បាន​ស្គាល់​សមិទ្ធិករ​ភាពយន្ត​វ័យ​ក្មេង​មួយ​រូប គឺ​កញ្ញា សាន ដានិច​។ ខ្សែ​ភាពយន្ត​ខ្លី​របស់​ កញ្ញា សាន ដានិច គឺ​រឿង មួយ​លាន​ឆ្នាំ កំពុង​ចាក់​បញ្ចាំង​នៅ​ក្នុង​មហោស្រព​ភាពយន្ត​អន្ដរជាតិ​កម្ពុជា បន្ទាប់​ពី​ទទួល​បាន​រង្វាន់​ភាពយន្ត​ខ្លីអាស៊ី​អាគ្នេយ៍​​ល្អ​បំផុត ពី​មហោស្រព​ភាពយន្ត​អន្ដរជាតិ​សិង្ហបុរី កាលពី​ឆ្នាំ​មុន​​។ សម្រាប់​សមិទ្ធិករ​ភាពយន្ត​ស្ដ្រី​វ័យ​ក្មេង​រូប​នេះ ការ​ផលិត​ខ្សែ​ភាពយន្ត គឺ​ជា​ការ​ចែក​រំលែក​បទ​ពិសោធ​និង​គំនិត​របស់កញ្ញា ទៅ​កាន់​ទស្សនិកជន​។