ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ គឺ​លោក​បណ្ឌិត​តឹក វណ្ណារ៉ា នាយក​ប្រតិបត្តិ​វេទិកា​នៃ​អង្គការ​មិន​មែន​រដ្ឋាភិបាល​ស្តី​ពី​កម្ពុជា (NGO FORUM)។ នៅ​ថ្ងៃ​ស្អែក​នេះ ​អង្គការ​របស់​លោក​នឹង​រៀប​ចំ​វេទិកា​មួយ​សម្រាប់​តំណាង​គណបក្ស​នយោបាយ និង​ប្រជាពលរដ្ឋ​ជជែក​គ្នា​ពី​គោល​នយោបាយ​របស់​គណបក្ស។ តាម​រយៈ​វេទិកា​នេះ លោក​បណ្ឌិត​តឹក វណ្ណារ៉ា សង្ឃឹម​ថា គណបក្ស​នយោបាយ ដែល​បាន​ចូល​រួម​នឹង​យក​បញ្ហា​របស់​ប្រជាពលរដ្ឋ​ទៅ​ពិចារណា ដើម្បី​ធ្វើ​ការ​ប្តេជ្ញា​ចិត្ត​ក្នុង​ការ​ឆ្លើយ​តប។ ចំពោះ​ការ​ប្រើ​ប្រាស់​ថវិកា​សម្រាប់​អភិវឌ្ឍ​ឃុំ សង្កាត់ វិញ លោក​បាន​លើក​ឡើង​ថា សង្គម​ស៊ីវិល ចង់​ឃើញ​ថវិកា​អភិវឌ្ឍន៍​ឃុំ​ សង្កាត់ កើន​ឡើង​ច្រើន​ជាង​មុន ដើម្បី​ឆ្លើយ​តប​នឹង​ផែនការ​អភិវឌ្ឍ។

គណៈកម្មាធិការ​ជាតិ​រៀប​ចំ​ការ​បោះ​ឆ្នោត(គ.ជ.ប)​នៅ​ព្រឹក​មិញ​នេះ បាន​ធ្វើ​ការ​សាក​ល្បង​ទឹក​ខ្មៅ​ជ្រលក់​ម្រាម​ដៃ​សម្រាប់​ការ​បោះ​ឆ្នោត​នា​ពេល​ខាង​មុខ។ ការ​សាក​ល្បង​នេះ មាន​ការ​ចូល​រួម​ពិនិត្យ​និង​សាក​ល្បង​ពី​សំណាក់​តំណាង​គណបក្ស​នយោបាយ សង្គម​ស៊ីវិល​ធ្វើ​ការ​ផ្នែក​បោះ​ឆ្នោត និង​តំណាង​សហភាព​អឺរ៉ុប​ជា​ដើម។ លោក​ម៉ន ផល្លា ប្រធាន​គណៈកម្មាធិការ​ប្រតិបត្តិ​គណបក្ស​សង្រ្គោះ​ជាតិ​ប្រចាំ​រាជធានី​ភ្នំពេញ​ដែល​បាន​ចូល​រួម​សាក​ល្បង​ទឹក​ខ្មៅ​ជ្រលក់​ម្រាម​ដៃ​នេះ គឺ​ជា​ភ្ញៀវ​របស់​យើង​នៅ​រាត្រី​នេះ។ លោក​បាន​បញ្ជាក់​ថា ទឹក​ខ្មៅ​សម្រាប់​ជ្រលក់​ម្រាម​ដៃ​ពេល​បោះ​ឆ្នោត​ដែល​បញ្ជា​ទិញ​ពី​ឥណ្ឌា គឺ​អាច​លុប​ជ្រះ ។

ក្រសួង​កសិកម្ម​ រុក្ខា​ប្រ​ម៉ាញ់​និង​នេសាទ បាន​បើក​កិច្ច​ប្រជុំ​មួយ​នៅ​ព្រឹក​ថ្ងៃ​អង្គារ​នេះ ដើម្បី​ដោះស្រាយ​វិវាទ​រវាង​ក្រុម​ហ៊ុន​នាំ​ជ្រូក​ចូល​ពី​បរទេស និង​ម្ចាស់​កសិដ្ឋាន​ អ្នក​ចិញ្ចឹម​ជ្រូក​នៅក្នុង​ស្រុក​ ជុំវិញ​ការ​ចោទ​ប្រកាន់​គ្នា​ទៅ​វិញ​ទៅ​មក​លើ​ការ​ប្រកួត​ប្រជែង​មិន​ស្មោះត្រង់​។ ​ លោក ​សេន សុវណ្ណ ​ប្រតិភូ​រាជ​រដ្ឋាភិបាល​កម្ពុ​ជា​ទ​ទួល​បន្ទុក​ជា​អគ្គនាយក​នៃ​អគ្គនាយក​ដ្ឋាន​សុខភាព​សត្វ​និង​ផលិតកម្ម​សត្វ ​ថ្លែង​ថា​ការ​ប្រកួត​ប្រជែង​ទីផ្សារ​សេរី​តម្លៃ​វា​ដើរ​ទៅតាម​ទ្រឹស្តី​នៃ​ការ​ផ្គត់ផ្គង់​និង​តម្រូវការ​។ ​លោក​បន្ត​ថា ​ជា​ផ្លែផ្កា ​អ្នក​ពាក់ព័ន្ធ​ទាំងអស់​មានការ​យល់​គ្នា​និង​បន្ត​ជជែក​គ្នា​ដោះស្រាយ​ជា​បន្ត​ក្រោម​ការ​សម្រប​សម្រួល​រប​ស់​ក្រសួង​កសិកម្ម​។

ភ្ញៀវ​ប្រចាំថ្ងៃ​របស់យើង​នៅ​យប់​នេះ គឺ​លោក ហង្ស ពុទ្ធា ដែលជា​​អ្នកនាំពាក្យ និង​ជា​សមាជិក​ជាន់​ខ្ពស់​របស់ គណៈកម្មាធិការ​ជាតិរៀប​ចំការ​បោះឆ្នោត ហៅ​កាត់ថា គ.ជ.ប.។ លោក ហង្ស ពុទ្ធា ប្រាប់​វិទ្យុ​បារាំង ​RFI ថា ពិធីករនិងអ្នក​អត្ថាធិប្បាយ​ព័ត៌មាន​បោះឆ្នោត ត្រូវបង់​ពិន័យ​ប្រមាណ​​៥ពាន់​ដុល្លារ បើ​និយាយ​ល្មើសបទ​​ប្បញ្ញត្តិ​របស់​គ.ជ.ប.។ ការ​ពិន័យ​មា​ន​បី​ដំណាក់​កាល គឺ​ព្រមានជា​លាយ​លក្ខណ៍​អក្សរ, ពិន័យ​ជា​ប្រាក់ និង​ផ្អាក​ការ​ផ្សាយ។ ដូច្នេះ ​តើ​ពិធីករ​និងអ្នក​អត្ថាធិប្បាយព័ត៌មាន​បោះឆ្នោត ត្រូវ​និយាយ​បែប​ណា​ កុំ​ឲ្យ​ខុស​បទប្ប​ញ្ញត្តិ​របស់​គ.ជ.ប.?

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោក សាន់ ម៉ា​ឡា សហ​ស្ថាបនិក​អង្គការ​មាតា​ធម្មជាតិ (Co-founder at Mother Nature Cambodia) ដែលជា​អង្គការ​លេចធ្លោ​មួយ​​ក្នុងការ​ទប់ស្កាត់​គម្រោង​សាងសង់​ទំនប់​វា​រី​អគ្គីសនី​របស់​រដ្ឋាភិបាល នៅ​តំបន់​អា​រ៉ែ​ង កាល​ពី​ប៉ុន្មាន​ឆ្នាំ​មុននេះ។ ជាថ្មី​ម្តង​ទៀង អង្គការ​មាតា​ធម្មជាតិ​តំណាង​ដោយ​យុវជន​ពី​ទីក្រុង​ភ្នំពេញ​ជាង២០០នាក់ កំពុង​ជម្រុញ​ចលនា​ថ្មី​មួយ ដើម្បី​ទប់ស្កាត់​សកម្មភាព​បូម​ខ្សាច់​នៅក្នុង​តំបន់​កោះ​ស្រឡៅ ឃុំ​កោះ​កាពិ ស្រុក​កោះកុង។ តាមរយៈ​ចលនា​នេះ ក្រុមយុវជន​មកពី​រាជធានី​ភ្នំពេញ​នេះ បានរៀបចំ​ពិធីបុណ្យ​មួយ គឺ​បុណ្យ​កោង​កាង ចាប់ពី​ថ្ងៃទី ១៣ ដល់​ថ្ងៃទី ១៦ ខែឧសភា។ លោក សាន់ ម៉ា​ឡា សហ​ស្ថាបនិក​អង្គការ​មាតា​ធម្មជាតិ បាន​ថ្លែង​ក្នុងនាម​ជា​ភ្ញៀវ​របស់​វិទ្យុ​បារាំង​អន្តរជាតិ​នៅ​រាត្រី​នេះ​ថា គោលបំណង​នៃ​ពិធីបុណ្យ​នេះ គឺ​ដើម្បី​ជំរុញ​ឲ្យ​យុវជន​ចេះ​ស្រឡាញ់​និង​អភិរក្ស​ព្រៃកោងកាង។ មិនតែប៉ុណ្ណោះ តាមរយៈ​ពិធីបុណ្យ​នេះ យុវជន​ទាំងនេះ​ក៏​ត្រៀម​ស្នើសុំ​ឲ្យ​រដ្ឋាភិបាល​កម្ពុជា បង្កើត​តំបន់​នេះ​ជា​តំបន់​អេកូ​ទេសចរណ៍​ផងដែរ។

គិត​ត្រឹម​ថ្ងៃ​ទី​ ១៣ ឧសភា នេះ មាន​ប្រជាពលរដ្ឋ​សហគមន៍​ប៊ូ​ឌីញ ស ប្រមាណ ៣០% បាន​ចូល​មក​ទទួល​កិច្ច​សន្យា​លក់​លំនៅដ្ឋាន​ឲ្យ​ក្រុម​ហ៊ុន​ជប៉ុន​អារ៉ា​កាវ៉ា​ ក្នុង​តម្លៃ ១៤០០ ដុល្លារ ក្នុង​មួយ​ម៉ែត​ការ៉េ​ ...

វេទិកា​សេដ្ឋកិច្ច​ពិភព​លោក​ស្តី​ពី​អាស៊ាន​ដែល​ចាប់​ផ្តើម​តាំង​ពី​ថ្ងៃ​ទី ១០ មក​បាន​បិទ​បញ្ចប់​ហើយ​នៅ​ថ្ងៃ​ទី​ ១២​ឧសភា​នេះ។ វេទិកា​នេះ​ដែល​កម្ពុជា​ជា​ម្ចាស់​ផ្ទះ​នេះ​ មាន​ការ​ចូល​រួម​ពី​ប្រមុខ​រដ្ឋ ប្រមុខ​រដ្ឋាភិបាល រដ្ឋមន្ត្រី​ពី​បណ្តា​ប្រទេស​អាស៊ាន និង​អ្នក​ជំនាញ អ្នក​សេដ្ឋកិច្ច​ប្រមាណ ៧០០​នាក់។ ប្រធាន​បទ​នៃ​កិច្ច​ពិភាក្សា​បាន​ផ្តោត​លើ​ការ​ត​ភ្ជាប់​អាស៊ាន ការ​អភិវឌ្ឍន៍​នៃ​វិស័យ​បច្ចេកវិទ្យា និង​បញ្ហា​របស់​យុវជន​ជា​ដើម។ ដូច​នេះ​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​ថ្ងៃ​នេះ គឺ​លោក​បណ្ឌិត ឈាង វណ្ណារិទ្ធិ។ បណ្ឌិត​ដែល​ជា​ជំនាញ​កិច្ច​ការ​អាស៊ី បាន​លើក​ឡើង​ថា​ដោយ​សារ​តែ​កម្ពុជា មាន​សក្តានុពល​ផ្នែក​សេដ្ឋកិច្ច និង​យុវជន​ក្មេងៗ ដូច​នេះ បាន​ជា​វេទិកា​សេដ្ឋកិច្ច​ពិភព​លោក​ប្រារព្ឋ​នៅ​កម្ពុជា។ ជាមួយ​គ្នា​នេះ អ្នក​វិនិយោគ​នៅ​ទូ​ទាំង​ពិភព​លោក​នឹង​មាន​ឱកាស​ស្គាល់​កម្ពុជា​ដែល​ពួក​គេ​មិន​ដែល​បាន​មក ហើយ​វា​ក៏​ជា​ឱកាស​ដែល​អ្នក​រកស៊ី​អាច​បោះ​ទុន​នៅ​កម្ពុជា​ផង​ដែរ។

ចាប់​ពី​ថ្ងៃនេះ​​រហូត​ដល់​ថ្ងៃ​ទី​២៣​ឧសភា ក្រុម​អង្គការ​សង្គម​ស៊ីវិល​ក៏​ដូច​ជា​សហគមន៍​មួយ​ចំនួន នឹង​រួម​គ្នា​ប្រារព្ធ​សប្ដាហ៍​អ្នក​ស្រឡាញ់​ភេទ​ដូច​គ្នា ដើម្បីអបអរ​ទិវា​អន្ដរជាតិ​ប្រឆាំង​នឹង​ការ​រើស​អើង​អ្នក​ស្រឡាញ់​ភេទ​ដូច​គ្នា ថ្ងៃ​ទី​១៧​ឧសភា​​។ លោក ផង់ ចាន់ថន មន្ដ្រី​ផ្នែក​​ពង្រឹង​បណ្ដាញសហគមន៍​​អ្នក​ស្រឡាញ់​ភេទ​ដូច​គ្នា​នៃ​អង្គការ​ខាណា ដែល​ជា​ភ្ញៀវ​ប្រចាំ​ថ្ងៃ​របស់​យើង​បាន​គូស​បញ្ជាក់​ថា សប្ដាហ៍​អ្នក​ស្រឡាញ់​ភេទ​ដូច​គ្នាឆ្នាំ​នេះ ប្រារព្ធ​ធ្វើ​ក្រោម​ប្រធានបទ គ្រួសារ​អ្នក​ស្រឡាញ់​ភេទ​ដូច​គ្នា​។ គ្រួសារ ​ដែល​​បើ​តាម​លោក ផង់ ចាន់ថន គឺ​ជា​ឫស​គល់​ដ៏​សំខាន់ ដែល​អាច​​ជះ​ឥទ្ធិពល​លើ​ជីវិត​អ្នក​ស្រឡាញ់​ភេទ​ដូច​គ្នា​។

សព​​ទាហាន​មួក​ខៀវ​កម្ពុជា​​៤​នាក់ ​ដែល​បាន​ស្លាប់​ដោយ​ការ​វាយ​ប្រហារ​របស់​ពួក​ឧទ្ទាម​​នៅ​សាធារណរដ្ឋ​​អាហ្វ្រិក​​កណ្តាល ​​នឹង​​ត្រូវ​​ដឹក​​ជញ្ជូន​​តាម​ជើង​យន្ត​ហោះ​មកដល់​កម្ពុជា​ដោយ​ការ​ដេញ​​ថ្លៃ​​ដឹក​​ជញ្ជូន​​ប​ន្ទាប់​​ពី​ពិធី​គោរព​វិញ្ញាណ​​ខ​ន្ត​ផ្លូវការ​។ ​នាយ​ឧ​ត្ត​ម​សេនីយ៍ ​  សែម ​      សុ​វ​ណ្ណនី ​អគ្គនាយ​ក​​មជ្ឈម​ណ្ឌល​ជាតិ​កង​កម្លាំង​រក្សា​ស​ន្តិភាព ​និង​​បោស​សំអាត​កាក​សំណល់​សង្គ្រាម​ឲ្យ​ដឹងថា ​បន្ទាប់​ពី​កងទ័ព​កម្ពុជា​ជួប​ហេតុការណ៍​ដ៏​អាក្រក់​នេះ ​អង្គភាព​សម្រេច​ឲ្យ​កង​កម្លាំង​មួក​ខៀវ​កម្ពុជា ​សំរាក ​មួ​​យរយៈ ​ហើយ​ប្រជុំ​រៀបចំ​ជា​ថ្មី​រវាង​កង​កម្លាំង​ការពារ​និង​កម្លាំង​ស្ថាបនា​​ផ្លូវ ​ដើម្បី​ធានា​បាន​នូវ​សុវត្ថិភាព​ជាថ្មី​។

ថ្ងៃ​នេះ វេទិកា​អនាគត បាន​ចេញ​ផ្សាយ បទ​វិភាគ​មួយ ទាក់​ទង​នឹង ការ​ផ្លាស់​ប្តូរ​នៃ​ស្ថាន​ភាព​សេដ្ឋកិច្ច​សង្គម​របស់​ម្ចាស់​ឆ្នោត។ ឆ្លៀត​ឱកាស​នេះ ស្រី សុភ័ក្រ្ត បាន​ជួប​សម្ភាសន៍​ជាមួយ កញ្ញា អេង សុខា ដែល​ជា អ្នកស្រាវជ្រាវ របស់​វេទិកា​អនាគត និង​ជា​ម្ចាស់​អត្ថបទ​វិភាគ​នេះ។ កញ្ញា អេង សុខា បាន​លើក​ឡើង​ថា បច្ចុប្បន្ន​នេះ​ កសិករ​ខ្មែរ កំពុង​តែ​ងាក​ចេញ​ទៅ​រក​ការងារ​បន្ថែម នៅ​ក្នុង​វិស័យ​ឧស្សាហ៍កម្ម និង​សេវាកម្ម។ បើ​តាម អ្នក​វិភាគ​វ័យ​ក្មេង​រូប​នេះ ការ​ងាក​ទៅ​រក​វិស័យ​ឧស្សាហ៍កម្ម និង​សេវាកម្ម ជា​ដំណើរ​ការ​ទៅ​មុខ​មួយ ដែល​ប្រទេស​អភិវឌ្ឍន៍​ជា​ច្រើន​មាន​និន្នាការ​ដូច​គ្នា។