Músíktilraunir eru fyrirferðarmiklar í Rokklandi vikunnar. Við heyrum í hljómsveitunum sem lentu á verðlaunapalli, en þær eru: Hljómsveit fólksins - Karma Brigade 3. sæti - Ásta 2. sæti - Konfekt 1. sæti - Blóðmör Við heyrum upptökur frá þessum hljómsveitum frá úrslitakvöldi Músíktilrauna og þau Árni Matthíasson, Arnar Eggert Thoroddsen og Heiða Eiríksdóttir úr dómnefnd Músíktilrauna tala um sveitirnar. Bandaríska tónlistarkonan Jenny Lewis kemur við sögu og við heyrum nokkur lög af hennar nýjustu plötu sem heitir On the line og er alveg stórfín plata. Hulda geirsdóttir náði í annan Reid bróðirinn skoska úr The Proclaimers í vikunni í síma og við heyrum hvað þeim fór á milli, en Proclaimers eru með tónleika í Eldborg í Hörpu 15. apríl nk. Við heyrum svo í íslensku hljómsveitinni Bagdad Brothers í std. 12 síðasta föstudag.

Mannakornin Pálmi Gunnarsson og Magnús Eiríksson hlusta með umsjónarmanni á plötuna Í gegnum tíðina sem kom út 1977 og segja sögurnar bakvið lögin. Þeir Pálmi og Maggi segja sögurnar á bakvið perlurnar sem plata hefur að geyma, lög eins og Garún, Sölvi Helgason, Reyndu aftur, Gamli góðir vinur g Göngum yfir brúna. Í gegnum tíðina er önnur plata Mannakorna, sú fyrsta sem heitir einfaldlega Mannakorn, kom út 1975. Mannakorn er ennþá starfandi og það eru tvennir tónleikar framundan í Háskólabíó, síðasta vetrardag og sumardaginn fyrsta.

Tónlistarkonan GDRN kemur í heimsókn í Rokkland vikunnar og við minnumst trommuleikarans Hal Blaine sem lést á dögunum, 90 ára að aldri. GDRN sem heitir Guðrún Ýr Eyfjörð Jóhannesdóttir og er úr Mosfesllsbænum fór heim með fern verðlaun af Íslensku tónlistarverðlaunuum á dögunum. Þar á meðal fyrir Poppplötu ársins, en hún sendi frá sér fyrstu plötuna sína; Hvað ef, í fyrra. Og hún var líka valin söngkona ársins. Við heyrum slatta af nýrri músík með fólki eins og Arcade Fire, Hozier, Mavis Staples, JJ Cale, Jade Bird, Mac Demarco, Lambchop, Wintersleep, The Head and the heart, Robert Forster ofl. Og svo minnumst við trommuleikarans Hal Blaine sem lést núna á dögunum 90 ára að aldri, en hann spilaði meira en 5000 lög inn á plötur og þar af voru 40 sem náðu toppsæti Bandaríska vinsældalistans og um það bil 150 lög náðu inn á topp 10. Frá 1966 - 1971 trommaði hann í öllum lögunum sem voru valin lög ársins (record of the year) á Grammy verðlaununum.

Í Rokklandi dagsins hlusta Bubbi og umsjónarmaður saman á plötuna Frelsi til sölu sem Bubbi sendi frá sér árið 1986. Árið 1986 var Bubbi búinn að vera að gefa út plötur í 6 ár og plöturnar orðnar 15 talsins á þeim tíma. Frelsi til sölu er sjöunda sólóplatan hans og er að margra mati ein af hans allra bestu plötum. Platan er að mestu tekin upp í Svíþjóð og upptökustjóri var svíinn Christian Falk sem var liðsmaður hljómsveitarinnar Imperiet. Frelsi til sölu er ein pólitískasta plata Bubba og jafnvel sú pólitískasta. Það skemmtilega við hana er að hún talar alveg jafn mikið til samtímans í dag og hún gerði fyrir 33 árum. Bubbi fjallar á plötunni um spillta pólitíkusa, hvalveiðar, forseta Íslands, sundrungu Evrópu og þjóðernis populisma, um stríðsbrölt, flóttamenn, útlendingahatur, aðgerðaleysi og afstöðuleysi almennings og frelsi til sölu. Bubbi segir sögurnar á bakvið lögin og frá því sem var að gerast í lífi sínu þegar platan var gerð.

Keith Flint andlit og vörumerki The Prodigy er látinn. Hann tók sitt eigið líf. Það hefur verið sagt frá því í öllum helstu fjölmiðlum heims undanfarna daga að Keith Flint söngvari, dansari og andlit hljómsveitarinnar Prodigy er látinn. Hann fannst látinn á heimili sínu í Dunmow í Essex sem er lítið sveitaþorp ekki langt frá Stansdet flugvelli, mánudagsmorguninn síðasta og það er fullyrt að hann hafi framið sjálfsmorð. Hann var 49 ára gamall. Eftirlifandi félagar hans úr Prodigy sendu frá sér yfirlýsingu á Twitter sem sagði eitthvað á þessa leið: Fréttirnar eru sannar, við trúum því varla að við séum að segja þetta um bróður okkar Keith, en hann tók sitt eigið líf um helgina. Liam Howlett heilinn á bakvið Prodigy sagði líka: Ég er í losti, ég er reiður, ruglaður og með brostið hjarta. Hvíldu í friði - þinn bróðir Liam. Keith Flint fæddist í Redbridge í Austur London en flutti með foreldrum sínum til Braintree í Essex þegar hann var unglingur. Hann var greindur með mikla lesblindu þegar hann var strákur. Honum og pabba hans samdi illa, foreldrarnir skildu og kennurunum fannst þeir ráða svo illa við hann að hann var sendur til sálfræðings sem var ekki nærri eins algengt í þá daga og í dag. Hann lét öllum illum látum og oft lokaði hann sig inni í herberginu sínu, hlustaði á pönkrokk og barði hausnum í vegg. Sálfræðingarnir sem hann fór til sögðu skólanum og foreldrum hans að þeir gætu ekkert gert fyrir hann. Hann var rekinn úr skóla 15 ára og var að vinna með þakviðgerðamaður þegar hann byrjaði að dansa með Prodigy. Sjálfur sagði hann seinna í viðtali við The Times að hann hafi alla tíð þurft að díla við andleg vandamál, hann hafi t.d. alltaf verið með mikla sjálfseyðingarhvöt. Sagan segir að hann hafi loksins fundið hamingjuna með konunni sinni, japanska plötusnúðnum Mayumi Kai. Prodigy var á tónleikaferð og skyndilega stóð hún þarna þessi unga fallega japanska kona, og Keith missti málið- það var ást við fyrstu sýn. Þau kynntust á þeim tíma þegar hann var á leiðinni í meðferð og eftir að þau giftust árið 2006 sagði hann alfarið skilið við dóp, áfengi og tóbak, og þau hjónin komu sér fyrir í 15. aldar húsinu sem hann hafði keypt í ensku sveitinni - í Essex áratug fyrr. Þau voru barnlaus en áttu 8 hunda. Hann átti og rak litla sveitakrá, The Leather Bottle, nálægt heimili þeirra Þangað til fyrir tveimur árum. Hann keypti hana árið 2014 þegar hún var á leiðinni á hausinn og rak hana til 2017. Og þegar Keith var ekki að vinna eitthvað þá var hann að hreyfa sig, skokka, hjóla, eða ganga um í sveitinni. Hann sagð

Í Rokkandi vikunnar eru þeir Pjetur Stefánsson og Sigurður Bjóla í aðalhlutverkum, en þeir sendu nýlega frá sér plötuna; Plasteyjan. Plasteyjan er önnur plata félaganna saman, en þeir Sigurður og Pjetur gerðu síðast plötu sama 1988. Plasteyjan er 15 laga og fjögur laganna heita Svítur. Titillagið er tæpar 11 mínútur og það er spilað í fullri lengd í þættinum. Þeir Pjetur og Sigurður segja frá tilurð plötunnar í þættinum. Led Zeppelin árið 1969, Leif Eriksson, Mumford & Sons og Buffalo Springfield koma við sögu og svo er Mark Hollis, forsprakka hljómsveitarinnar Talk Talk minnst í þættinum.

Í Rokklandi vikunnar er, í tilefni konudags, boðið upp á lög sem karlar hafa samið um konur og til kvenna. Það er auvitað af nógu að taka vegna þess að stór hluti tónlistarsögunnar eru lög sem karlar hafa samið til kvenna eða um konur. VIð sögu koma Bítlar, Eric Clapton, Elvis Costello, The Cure, Bubbi, Megas, Neil Young ofl. Við heyrum líka lögin 5 sem voru tilnefnd i ár til Óskarsverðlauna í flokknum "besta lag frumsamið fyrir kvikmynd", og eitt og annað splunkunýtt og nýlegt.

Kacey Musgraves sem nældi sér í fern Grammy verðlaun á Grammy hátíðinni fyrir viku er til umfjöllunar í Rokklandi vikunnar og Júníus Meyvant kemur í heimsókn. Kacey Musgraves er fædd og alin upp í bænum Golden í Texas. Pabbi hennar rekur lítið prentfyrirtæki og mamma hennar er myndlistarmaður. Kacey er fyrirburi, fæddist 6 vikum fyrir tímann og var bara 5 merkur þegar hún kom í heiminn, en hefur heldur betur spjarað sig þrátt fyrir það. Hún var ekki nema 8 ára þegar hún byrjaði að setja saman lög og til að byrja með samdi hún á Mandolín sem var hennar fyrsta hljóðfæri, en 12 ára byrjaði hún að læra á og spila á gítar. 18 ára stieg hún fyrstu skrefin inn í kántríheiminn og byrjaði að taka upp demó til að koma sér á framfæri. Og á sama tíma keyrði mamma hennar henni milli bæjarhátíða í Texas þar sem hún fék að troða upp. Og þessi hæfileikaríka kántrístelpa, Kacey Musgraves, nældi sér í fern Grammy verðlaun á hátíðinni um síðustu helgi og þar á meðal voru ein aðal verðlaunin; Plata ársins. Við kynnumst Kacey Musgraves í Rokklandi í dag. Í seinni hlutanum kemur Júníus Meyvant frá Vestmannaeyjum í heimsókn og við tölum um lífið og tilveruna og nýju plötuna hans, Across the Borders, sem er alveg stórfín. Júníus sem heitir Unnar Gísli talar um lífið í eyjum, rifjar upp minningar frá því hann var lítill strákur í skóla í Vestmannaeyjum og segir frá lögunum sínum.

Gestur Rokklands að þessu sinni er Jakob Frímann Magnússon, Stuðmaður með meiru. Við ætlum að hlusta saman á plötuna Horft í roðann sem hann gerði 23 ára gamall árið 1976, en Horft i roðann er mikil uppáhalds plata margra og merkileg að mörgu leyti. Þegar Horft í roðann var tekin upp voru fyrstu tvær plötur Stuðmanna komnar út, Sumar á Sýrlandi og Tívolí. Jakob var búinn að vera í talsverðan tíma í Bretlandi og spila með hljómsveit Long John Baldry. Hann gerði samning við Steinar Berg um að hefja plötuútgáfu, en splunkuný útgáfa Steinars (Steinar) gaf út plötur Stuðmanna, Spilverks Þjóðana og sólóplötu Jakobs - Horft í roðann. Platan var tekin upp í Los Angeles, London og í þá nýopnuðum Hljóðrita í Hafnarfirði. Platan fékk góðar viðtölur þegar hún kom út, fékk talsverða spilun í útvarpinu sem þá var eingöngu Rás 1 (Útvarpið). Platan seldist ágætlega og fólk um alt land söng með lögum eins og Sól í dag og Röndótta mær. Horft í roðann er konseptplata og fjallar í raun um líf eftir dauðann. Og á plötunni eru til skiptis lög sem hefðu sómt sér vel á plötum Stuðmanna, og svo Jazz-fusion rokk. Ansi sérstök og kannski sérkennilega blanda sem þó sýnir tvær mest áberandi hliðar Jakobs. Jakob segir frá plötunni og lögunum í Rokklandi vikunnar.

Í þættinum í dag heyrum við viðtöl við nokkra íslenska tónlistarmenn og hljómsveitir sem spiluðu á Eurosonic Festival í Hollandi núna um miðjan janúar. Það voru 7 íslensk númer sem komu fram á Eurosonic og við heyrum í fjórum þeirra. Rokkland hitti og spjallaði á hátíðinni við Reykjavíkurdætur, harðhausana í Une Misére og þær Bríeti og Hildi. En það er ekki bara Eurosonic í þessum þætti vegna þess að Bítlarnir og Peter Jackson, Robert Plant og Secret Solstice, James Bay og gítararnir hans David Gilmour koma líka við sögu.