Die 43ste Dakartydren begin op Sondag 3 Januarie in Jedda in Saoedi-Arabië en eindig op Vrydag 15 Januarie in dieselfde stad. Dit vind vir die tweede keer in daardie land plaas nadat die tydren aan Suid-Amerika onttrek is. Fritz Klaaste praat met Suid-Afrika se voorste deelnemer en een van die gunstelinge om te wen, Giniel de Villiers, oor Toyota Gazoo Hilux Suid-Afrika se kanse in dié uitmergelende tydren.

Het jy geweet dat die eerste vrou wat ‘n medalje by die Olimpiese Spele gewen het, ‘n gholfspeler was? Johann Russouw vertel die verhaal van gholf by die Olimpiese Spele, en dat Margaret Abbott nie eens geweet het dat sy ‘n Olimpiese kampioen was nie.

Liverpool het sy laaste top ligatitel in Engeland in die 1989/90 seisoen gewen, en sederdien het hierdie kroon die span van Anfield verskeie kere ontwyk. Twee seisoene van só naby, maar tog so ver is opgevolg met ‘n manjefieke vertoning in ‘n seisoen wat byna deur die Covid-pandemie in die wiele gery is. Dertig jaar ná hulle laaste titel, kon Liverpool uiteindelik spog dat hulle die topspan in Engeland is.

Dit is veral rugbyspelers uit die Suidelike halfrond wat jaarliks deur die sterker geldeenhede in Japan, Europa en Groot-Brittanje gelok word om hulle brood en botter daar te verdien. Suid-Afrikaanse rugby het ook nie hierdie verskynsel vrygespring nie. Heinrich Schulze kyk na die geskiedenis van Suid-Afrikaanse spelers wat oorsee speel, en die hand-oor-hand toename van hierdie verskynsel die afgelope twee dekades.

Covid-19 het sy merk deeglik op die fietsrykalender afgedruk, en talle bekende fietsrenne het óf in die slag gebly, moes ingekort word, óf moes herskeduleer word. Tussendeur al die chaos, is daar wel van die ou bekende fietswedrenne en -toere wat tog vanjaar afgehandel is. Heinrich Schulze kyk na enkele van die hoogte- en laagtepunte op die internasionale en plaaslike fietsrykalender in 2020.

Volgens oorlewering sou die Griekse geskiedskrywer, Herodotus, glo vertel het dat die boodskapper, Philippides, in 490vC van die slagveld by Marathon af na Athene gehardloop het. Na bewering sou hy uitgeroep het dat die Atheners die Persiese aanval suksesvol afgeweer en die geveg gewen het, waarna hy dood neergeslaan het. Dié heldedaad sou die oorsprong wees van die marathon-wedloop. Johann Russouw vertel wat die waarheid is oor die ontstaan van die Olimpiese marathon, en hy weerlê verskeie mites wat vertel word oor die ontstaan van die marathon-wedloop.

Daar word in sekere kringe algemeen aanvaar dat Lewis Hamilton die beste renjaer is wat Formule 1 nog opgelewer het. Dit word egter betwis deur net so ‘n groot groep kundiges, deelnemers en renjaers. Fritz Klaaste kyk na die twee kante van hierdie saak.

Lali Stander gesels met Keegan Kruger, medestigter van die sportwebwerf, The Pundits, waar hy hoofsaaklik rugby en sokker ontleed. Sy groot liefde is egter hokkie, 'n sport waarby hy reeds 15 jaar betrokke is as speler en afrigter op nasionale en provinsiale vlak Hy is tans die hoofafrigter van die seniorseuns- en meisiespanne by die DF Malan Hoërskool in die Kaap, en is ook betrokke by die opleiding van seniorafrigters in die Westelike Provinsie.

Baie minder gholftoernooie is vanjaar gespeel weens Covid-19. Daar was egter vele besprekingspunte oor wie gewen het, wie die beste rondes gespeel het en wie die verste kan slaan… Pieter van den Berg draai die horlosie so bietjie terug en herinner ons aan ‘n paar hoogtepunte.

Primitiewe vorms van gimnastiek is al sedert 2000vC deur die Egiptenare beoefen. Johann Russouw vertel hoe gimnastiek ontwikkel het tot een van die aanskoulikste sportkodes van die moderne tyd.