Wann een an de Bicherbuttek geet, kann et virkommen, datt ee komplett erschloen ass vun der grousser Offer. An dofir hu mir mam Buch vun der Woch vum briteschen Auteur a Journalist Matt Haig eng flott Propos fir Iech. Kennt Dir villäicht e Roman vun him? Tiffany Saska huet säin aktuelle Roman „Die Mitternachtsbibliothek“ gelies a war begeeschtert.

D´Buch vun der Woch „die Bücherfrauen“ vum Romalyn Tilghman beschäftegt sech mat dräi ganz ënnerschiddleche weibleche Protagonistinnen. Erzielt ginn hir Geschichten am Zesummenhang mat enger klenger Stad am Kansas déi nieft enger Naturkatastrophe och mat ville weidere strukturelle Problemer ze kämpfen huet. Tiffany Saska huet d´Buch gelies.

Eng Roadnovel duerch d'Schwäiz. 26 Joer nodeems de Schwäizer Schrëftsteller Christian Kracht säi Protagonist a sengem ëmstriddenen Debütroman ''Faserland'' duerch Däitschland reese gelooss hat. Deemools huet de Christian Kracht iwwer déi iwwerflächlech Attitüd vun enger Jugend geschriwwen, déi kee klassesche moraleschen a politesche Kompass méi huet.
A ''Eurotrash'' erzielt de Schrëftsteller d'Rees vun engem gealterten Schrëftsteller, dee mat senger psychesch kranker an Mamm am Krees duerch d'Schwäiz reest. De Roman ass perséinlech, eescht awer och witzeg. Erzielt den Auteur eis hei vu senger eegener Famill? Där Fro ass de Pierre Jans nogaangen.

Den Däitsch-Schwäizer Schrëftsteller Benedict Wells stoung scho mat 23 Joer op de Bestseller-Lëschten an huet sech mat sengen éischte véier Romaner en Numm gemaach. Dat dierft e freeën, well den Numm Wells, huet e sech selwer gesicht, fir net als gebiertege Von Schirach ëmmer direkt mat de bekannten Auteuren aus der Famill verglach ze ginn. Elo ass mat "Hard Land" säi 5te Roman do an ass och schonn nees e Bestseller. Net fir näischt, mengt d'Christiane Kremer.

Eng spannend an intressant Rees an déi rezent polnesch Geschicht mä och an d’Intimitéit vun enger Koppel bitt « Les Héroïques » vum Paulina Dalmayer, dëst aus der Siicht vun enger Fra, déi duerch eng onbaarmhäerzeg Krankheet un e Spidoolsbett gefesselt ass an nëmmen nach dovun dreemt, selwer d’Enn vun hirem Liewen ze bestëmmen. 

An de 60er Joren huet d'Schimpansin Washoe fir eng Sensatioun gesuergt wéi si als éischt net-mënschlecht Wiesen d'Zeechesprooch geléiert huet an sech domat net just mat Mënschen mä och mat anere Schimpansen ënnerhale konnt. Op dësem an änleche Fäll baséiert den T.C.Boyle säi Roman "Sprich mit mir" an dem et ëm de Sam geet, e jonke Schimpans dee vun engem Universitéitsprofesser groussgezu gëtt. D'Bea Kneip huet d'Detailer.

Fir säi 67.Buch “Die Eroberung Amerikas” huet den éisträicheschen Auteur Franzobel sech vum 16.Jorhonnert inspiréiere geloos. Méi spezifesch: vum spuenesche Conquistador Hernando de Soto, deen an dësem Roman zum Anti-Held Ferdinand Desoto gouf. E Roman op der Grenz tëschent Geschicht a Fiktioun. Valeria Wiwinius

De schotteschen Auteur Ian Rankin ass virun allem bekannt duerch seng Kriminalromaner, déi dem Genre Tartan Noire ugehéieren. Domadder sinn déi Bicher gemengt, déi sech a Schottland ofspillen a vun enger Aart Anti-Held als Protagonist liewen. Fir säin  neie Roman, huet hien dofir och säi bekanntsten Haaptcharakter aus der Pensioun gekroomt, de John Rebus. Des Kéier fir ee ganz private Fall, deen e viru ganz nei Erausfuerderunge stellt. 

Haislech Gewalt a besonnesch Gewalt géint Fraen: Mat dësem schwieregen Thema beschäftegt sech den éischte Roman vum Bénédicte Soymier. ''Le Mal-épris'', en Titel, deen een ongeféier mat ''De Schlecht-Verléiften'' kéint iwwersetzen. Wat et mat dëser ganz spezieller Form vu Léift op sech huet, seet eis elo de Lucien Czuga.

"Der Apfelbaum" den Debutroman vum däitsche Schauspiller Christian Berkel war 2018 bei Kritik a Publikum direkt gutt ukomm. Doranner erzielt hien d'Geschicht vum Otto a vum Sala, déi sech virum Krich an Däitschland verléiwen a sech eréischt méi spéit erëmfannen. Alles baséiert op dem Liewe vum Auteur sengen Elteren. "Ada" schléisst elo un déi Geschicht un. Christiane Kremer