"Et wor eemol..." Sou fänkt eist Buch vun dëser Woch un. "Der Ickabog" ass e Mäerchen aus der Fieder vun der J.K.Rowling, eng Geschicht déi si scho viru Joren fir hir eege Kanner geschriwwen huet, an déi si an der Pandemie mat Kanner op der ganzer Welt wollt deelen. D'Bea Kneip huet sech vum Ickabog verzaubere gelooss.

De « Goncourt » ass dee wichtegste franséische Literaturpräis. E bréngt sengem Gewënner zwar nëmmen 10 Euro a bor an, mä och eng gewëssen Unerkennung an eng Oplag, déi an d’Honnertdausende geet mat deenen entspriechende finanzielle Konsequenzen. Gemenkerhand geet de Präis un e Wierk aus enger bestëmmter Kategorie, ob et sech elo ëm en historeschen, e sozialkriteschen oder e psychologesche Roman handelt. Mat « L’Anomalie », deen 2020 ausgezeechent gouf, huet den Hervé le Tellier e Wierk virgeluecht, dat a kee Schema passt, mä vill méi nei Perspektive schaaft. Wat fir eng dat sinn, seet eis elo de Lucien Czuga.

2006 huet déi englesch Schrëftstellerin Diane Setterfield hiren éischte Roman "The thirteenth tale" publizéiert an domadder en internationale Bestseller realiséiert, deen och fir d'Tëlee mam Vanessa Redgrave verfilmt gouf. Eng Geschicht, déi am 19te Joerhonnert spillt, eng Zäit, déi der Autorin läit. Dat beweist se och an hirem drëtte Roman "Once upon a river", deen elo an der däitscher Iwwersetzung eraus ass, Christiane Kremer.

D’Julie Clark ass zu Santa Monica opgewuess an huet schonn ëmmer ganz vill gelies. Mëttlerweil ass si Léierin an wunnt erëm an hirer Heemecht. No hirem Studium hat si puer Joer op der University of California zu Berkeley geschafft. A genee des Stad ass eng vun de Plazen ëm déi et an hirem neie Roman „Der Tausch“ geet. Dëst Buch huet ganz vill positiv Kritike kritt. D’Sandra Mélan huet d’Buch gelies.

Déi skandinavesch Auteure si bekannt fir hir Psycho Thrilleren. Eist Buch vun der Woch mam Titel „Hexenjäger“ ass dann och aus der Fieder vun engem finnesche Schrëftsteller an zwar dem Max Seeck. D´Tiffany Saska huet d´Buch fir eis gelies.

Emotiounen, brutal Biller an interessant Personnagen. Den Garrett Graff erzielt a sengem neie Buch ‘Und auf einmal diese Stille.. Eine Oral History des 11. Septembers’, d’Geschicht vun dësem onvergiesslechen Dag vun enger ganz neier Perspektiv. D’Julie Mathes mam Buch vun dëser Woch.

1989 koum « Die Säulen der Erde », deen éischte grousse Succès vum britteschen Auteur Ken Follett eraus. Dee Roman beschreift de Bau vun enger Kathedral am englesche Fréimëttelalter. 32 Joer méi spéit läit elo « Kingsbridge - Der Morgen einer neuen Zeit », de Prequel vun dëser Geschicht, vir. De Lucien Czuga huet sech dësen 1000-Säite Roman op d’Long gezunn.

De schwedesche Schrëftsteller Jonas Jonasson, deen ënner anerem fir säi Roman „Der Hundertjährige, der aus dem Fenster stieg und verschwand“ bekannt ass, huet Enn vum leschte Joer en neit Buch publizéiert. D´Buch vun der Woch "Der Massai der in Schweden noch eine Rechnung offen hatte" ass nees e Roman mat vill Witz a ganz spezielle Personnagen, esou datt den Auteur sengem Stil trei bleift, Tiffany Saska

Wien der Elena Ferrante seng Bicher scho kennt, de mierkt séier dass se eis och mat hirem neie Roman op vertrauten Terrain mathëlt. Nees eng Kéier spillt d'Geschicht zu Neapel a Klassenënnscheeder vun den Awunner spillen eng wichteg Roll. Dës Kéier kritt e jonkt Meedchen, dat an der Pubertéit ass d'Stëmm vun der Protagonistin an d'Autorin léist mam Giovanna senger Geschicht Erënnerunge waakreg ginn, bei deenen enge méi, bei deenen anere manner. D'Michèle Schons huet "Das lügenhafte Leben der Erwachsenen" gelies:

Dystopesch Romaner ginn et der vill, awer lëschteg sinn déi mannsten dovun. Eist Buch vun dëser Woch gëtt vum Auteur Marc-Uwe Kling ausdrécklech als "Lustige Dystopie" bezeechent. Dat versprécht! Ob "Qualityland 2.0" dëst Verspriechen och hale kann, dat weess d'Bea Kneip.