Als Buch vun der Woch proposéiere mir Iech dës Woch en historesche Krimi. „Die Toten vom Gare d’Austerlitz“ vum Chris Lloyd spillt an den 1940 Joren zu Paräis a behandelt nieft dem Mord vu polneschen Zivilisten natierlech och den Zweete Weltkrich an eng Stad, déi sech ënnert däitschem Afloss komplett verännert. D'Tiffany Saska huet d‘Buch fir eis gelies.

D’Buch vun der Woch „Nora Joyce und die Liebe zu den Büchern“ vum Nuala O’Connor erzielt d’Geschicht vum iresche Schrëftsteller James Joyce. Et ass awer net onbedéngt hien, deen am Mëttelpunkt steet, mee vill méi seng Fra, déi hien all déi Joren duerch säin turbulent Liewe begleet huet. D'Tiffany Saska huet d’Buch fir eis gelies.

All Dag esou liewen, als wär et de leschten, an dat bis et eriwwer ass, well fir "iergendwann" ass d'Liewen einfach ze kuerz. Dat ass de Motto vum Buch. wat och de selwechten Titel huet, a wourëms et genee geet, dat huet d'Michèle Schons fir eis gelies: 

Eng Telefonskabinn wierkt an der haiteger mobiler Zäit scho vu sech aus wéi en Anachronismus. Wann déi Kabinn, dann och nach keng normal Leitung huet, ass se nach méi extra. Mä et gëtt se a si huet e besonneschen Zweck am richtege Liewen an am Buch vum Laura Imai Messina "Die Telefonzelle am Ende der Welt". D'Christiane Kremer huet et gelies.

Deen een oder anere kennt villäicht de Roman „Die Purpurlinie“ vum Wolfram Flaischhauer. Behandelt gëtt e bekannte Konschtwierk aus dem Louvre, wat ënnert anerem Gabrielle d'Estrées, d’Maîtresse vum Henri 4. vu Frankräich weist, di kuerz virun der Hochzäit mat him gestuerwen ass. Bis haut weess awer kee wisou. Dat neit Buch vum Auteur „Die dritte Frau“ befaass sech nees mat dem Tableau awer aus enger anerer Perspektive. Mee keng Angscht; et muss een „die Purpurlinie“ net gelies hunn, fir ganz vill Gefalen um aktuelle Buch ze fannen. D'Tiffany Saska huet et fir eis gelies.

En erfollegräichen Architekt, dee sech eigentlech nëmme bestued huet fir eng Famill ze grënnen, an deen der Meenung ass, seng Fra sollt doheem bleiwen
a sech ëm hiert Kand këmmeren. Eng Fra, déi hiert Kand vun Ufank un net wëllt, et dann awer acceptéiert, sech ëm hatt ze këmmeren an him eng gutt Mamm ze sinn an e Kand, dat et anscheinend drop ugeluecht huet, jiddereen ze quälen, deen him ze no kënnt. Dat sinn d’Protagoniste vum Ashley Audrain hirem éischte Roman, deen de Lieser a psychologesch Déifte kucke léisst, déi hie méi wéi eng Kéier erféieren deet. Lucien Czuga

"Poupées" ass den neie Roman vun der Eléonore Pourriat, där franséischer Autorin, Realisatrice a Schauspillerin, déi et fäerdegbruecht huet mat der Adaptatioun vun engem vun hire Bicher, den éischte franséische Film "Je ne suis pas un homme facile" op Netflix ze lancéieren. Wéi an all hire Wierker réckelt se och hei bei "Poupées" nees d'Fra an de Fokus. Manon Bercker.

Den amerikaneschen Auteur David Klass ass bekannt duerch eng Rei Dréibicher. Donieft schreift hien och Romaner, mat deenen en en éischter jonke Publikum uschwätzt. A sengem aktuelle Roman geet et ëm dat Haaptthema vun eiser Zäit, géint dat et keen Impfstoff gëtt. „Klima“ ass een Thriller, deen d’Gefore vum Klimawandel op eng fiktiv a spannend Aart a Weis duerstellt, Julie Mathes.

D’Buch „Der andere Sohn“ ass net vun engem, mee vun zwee Auteure geschriwwe ginn: vum Peter Mohlin, vu Beruff Journalist, a vum Peter Nyström, Dréibuchauteur a Regisseur. Esou war deen een zoustänneg fir d’Dialoger an deen anere fir d’Texter ronderëm. Schonn am Alter vun 10 Joer hunn déi 2 Schweden hir éischt Kriminalgeschicht geschriwwen. E grousst Allgemengwëssen an eng Frëndschaft, déi scho 40 Joer besteet, huet hinne gehollef fir dëst Buch ze schreiwen, den éischten aus der Karlstad-Serie. Sandra Mélan:

E grujelege Countdown ... am Amy Suiter Clarke hirem éischte Roman geet et ëm e Killer, dee jonk Fraen a Meedercher ëmbréngt, jiddereent ee Joer méi jonk wéi dat virdrun, an ëm d’Elle Castillo, eng Podcasterin, déi et sech zur Aufgab gemeet huet, dësem schreckleche Verbriecher 20 Joer dono d’Handwierk ze leeën.