Sjósundshópurinn Sækýrnar samanstendur af sex vinkonum sem létu sér ekki nægja að fara í stuttar sjósundsferðir við Íslandsstrendur, heldur syntu þær boðsund yfir Ermasundið. Við fengum tvær úr hópnum, þær Sigrúnu Þuríði Geirsdóttur og Ragnheiði Valgarðsdóttur til að segja okkur sjósundssögur en Sigrún var einmitt fyrsta íslenska konan sem synti ein yfir Ermasundið.

Næstkomandi mánudag verður sérstök gönguferð í Vesturbæ Reykjavíkur, til að minnast þess að 80 ár eru liðin síðan Guðrún Lárusdóttir alþingismaður og rithöfundur var jörðuð frá Dómkirkjunni ásamt dætrum sínum tveimur. Þær drukknuðu í Tungufljóti í Biskupstungum 20. Ágúst 1938 og hafa afkomendur hennar nú sett minnisvarða við staðinn þar sem bíll Guðrúnar fór út af veginum. Málfríður Finnbogadóttir hefur skrifað bók um Guðrúnu sem kemur út nú í haust og hún er einnig höfundur sýningar sem nú er í Þjóðarbókhlöðunni. Málfríður kom í þáttinn.

Vanilla er mest ræktuð og framleidd á eyjunni Madagascar þar sem ein fátækasta þjóð veraldar býr. Heimsmarkaðsverð á vanillu hefur orðið himinhátt á skömmum tíma. Eitt kíló af vanillu kostar nú það sama og silfur. En hver er ástæðan fyrir þessari gríðarlegu hækkun? Magnús R. Einarsson skoðaði málið í pistli dagsins.

Umsjón: Guðrún Gunnarsdóttir og Gunnar Hansson