Árið 1987 synti kýrin Harpa þvert yfir Önundarfjörðinn, frá Flateyri, og kom í land hinum megin við fjörðinn við Kirkjuból í Valþjófsdal. Hún hafði slitið sig lausa við sláturhúsdyrnar og stökk í sjóinn. Hjónin á Kirkjubóli ákváðu að verðlauna henni þrautseigjuna með því að taka hana að sér í stað þess að senda hana aftur til slátrarans. Harpa hóf þannig nýtt líf á Kirkjubóli undir nýju nafni og var nú nefnd Sæunn, með tilvísun í sjósundið mikla. Bryndís Sigurðardóttir, Sæunnarsundstjóri, kom í þáttinn og sagði okkur frá Sæunnarsundinu sem þreytt verður í fjórða sinn á laugardaginn til minningar um þetta mikla afrek Hörpu.

Við sögðum svo frá lokaverkefni Jóns Arnar Sverrissonar í landlagsarkitektúr, en í því leggur hann áherslu á að umhverfi dvalarheimila fyrir aldraða verði þannig úr garði gert að heimilisfólkið geti notið útiveru á sem fjölbreyttastan hátt í gróðursælu umhverfi. Hann segir aðstöðuleysi vera almennt við dvalarheimili og að það sé víða eins og það sé ekki reiknað með að fólk á þessum aldri njóti útiveru, þó auðvitað sé það víða í lagi. Hann vann sjálfur á Dalbæ, dvalarheimili aldraðra á Dalvík, og notar það umhverfi í lokaverkefni sínu auk þess að leggja spurningalista fyrir starfsfólk og heimilisfólk um hvað það vilji. Jón Arnar sagði okkur frá þessu í þættinum.

Lesandi vikunnar í þetta sinn var leikkonan og handritshöfundur Vala Þórsdóttir. Við fengum að vita hvað hún hefur verið að lesa undanfarið og hvaða bækur og höfundar hafa haft mest áhrif á hana í gegnum tíðina. Vala talaði um bækur eftir Alexander McCall, Isabel Dalhousie og Elísabetu Jökulsdóttur. Svo nefndi hún tvær sjálfshjálparbækur: Boundary boss, e. Terry Cole og Árin sem enginn man e. Sæunni Kjartansd. Þegar Vala svo leit til baka þá nefndi hún Línu Langsokkur og smásögur Svövu Jakobsdóttur, sem stóðu sérstaklega upp úr og hafa haft mest áhrif á hana í gegnum tíðina.

Tónlist í þættinum í dag:

Borð fyrir tvo / Hjálmar (Sigurður Halldór Guðmundsson og Bragi Valdimar Skúlason)

Sundhetjan / Sigríður Thorlacius, Bogomil Font og hljómsveit Tómasar R. Einarssonar (Tómas R. Einarsson)

Einsemd / Snorri Helgason (Snorri Helgason og Guðmundur Óskar Guðmundsson)

UMSJÓN: GUÐRÚN GUNNARSDÓTTIR OG GUNNAR HANSSON