Það var mjög létt yfir okkur í Seinni níu og við fengum bæjarstjórann á Seltjarnarnesi, Þór Sigurgeirsson, í heimsókn til okkar. Þetta er þáttur númer 100 af Seinni níu og var auðvitað aðeins farið yfir þau tímamót.

Þór er þokkalegur kylfingur með 22,2 í forgjöf en sér fram á að forgjöfin geti lækkað eftir að hafa fengið nýjar mjaðmir. Þór er auðvitað í Nesklúbbnum og er þar í virku samtali við kjósendur, bæði þá sem eru í golfi og svo þá vegfarendur sem hefur verið mjög nálægt því að slá í við Nesvöllinn.

Í þættinum er komið víða við en Þór rekur skemmtilega tilkomu golftryggingar sem Vörður hefur selt á undanförnum árum. Þór var lengi starfsmaður hjá Verði áður en hann varð bæjarstjóri á Seltjarnarnesi og fór yfir það tjón sem tryggingafélagið varð fyrir þegar margir af vinum Þórs byrjuðu að fara holu í höggi.

Draumahollið er á sínum stað og svo fáum við undarlega kraftröðun á bestu golfvöllunum sem Þór hefur leikið. Einnig segir bæjarstjórinn okkar sérkennilega sögu frá því hvernig hann eignaðist pútterinn.

Frábær þáttur og auðvitað á léttum nótum.

Við fáum til okkar frábæran gest því Axel Bóasson, þrefaldur Íslandsmeistari í golfi, kemur í heimsókn til okkar í Seinni níu.

Í þættinum förum við yfir ferilinn hjá Axel en hann er nýlega tekinn við sem yfirþjálfari hjá Golfklúbbnum Keili eftir atvinnumannaferil. Hann segir okkur frá hæðum og lægðum á keppnisferlinum og greinir okkur frá því hversu andlega erfið þess íþrótt er fyrir kylfinga sem eru að reyna að keppa meðal þeirra bestu með feta upp metorðastigann.

Árið 2017 var hans besta keppnistímabil en hann varð þá Íslandsmeistari ásamt því að verða efstur á stigalistanum á Norrænu mótaröðinni sem tryggði honum keppnisrétt á Áskorendamótaröðinni. Í kjölfarið fyldi erfitt ár þar sem honum tókst ekki alveg að finna taktinn en varði þó Íslandsmeistaratitilinn í Vestmannaeyjum.

Í þættinum er komið víða við. Axel segir okkur frá því að hann púttar best með stuttum pútter eða helst þannig að hann þurfi að standa mjög gleiður þegar hann púttar.

Draumahollið er á sínum stað og svo velur Axel þær golfholur á Íslandi sem honum finnst mjög krefjandi af öftustu teigum.

Frábær þáttur sem gefur hlustendum innsýn inn í líf eins af okkar bestu kylfingum en Axel er ekki hættur og stefnir að því að vera sigursælasti kylfingurinn í sinni fjölskyldu.

Við fengum til okkar meiriháttar gest í Seinni níu því söngvarinn ástsæli Stefán Hilmarsson kom í heimsókn. Við komum víða við í þættinum en Stefán segir okkur frá golfinu sínu og hvernig það kom til að hann hóf golfiðkun.

Stefán hóf að spila árið 2001 en Eyjólfur Kristjánsson dró hann í íþróttina en þeir höfðu báðir fylgst með golfi í sjónvarpi löngu áður. Tony Finau er uppáhaldskylfingurinn hjá Stefán þessa dagana og er það þessi sérkennilega golfsveifla sem er að heilla.

Við fengum stórskemmtilega kraftröðun en Stefán valdi sína eftirlætisvelli á Alicante svæðinu og valdi einnig nokkur draumaholl.

Svo kom í ljós að Stefán hefur 10 sinnum orðið vitni af því þegar aðrir en hann hafa farið holu í höggi.

Stórskemmtilegur þáttur á alveg sérstaklega léttum nótum.

Við fáum frábæran gest til okkar í Seinni níu þessa vikuna því handboltahetjan Sigfús Sigurðsson kemur í heimsókn til okkar. Hann ræðir aðeins við okkur um handbolta en aðallega um golf.

Sigfús er með um 15 í forgjöf og hóf ungur að leika golf. Hann hætti hins vegar á unglingsaldri þar sem það þótti ekki töff að spila golf á þeim árum.

Fúsi er með stórar krumlur og lenti í vandræðum snemma á ferlinum með golfgripið sem hann kreisti aðeins of mikið. Nú er stefnan sett á að fá júmbó-grip á kylfurnar.

Hann hóf að leika golf að nýju þegar handboltaferilinn var að baki. Fúsi spilar mikið golf og þá sérstaklega á kvöldin enda stendur hann vaktina í fiskbúðinni sinni í Skipholti flesta daga. Hann er félagi í GR og spilar mest þar.

Við fáum að heyra af ótrúlegu pari hjá Fúsa og daumahollinu þar sem litríkir kappar koma við sögu. Svo fengum við að heyra ótrúlega sögu af dóttur Fúsa af golfvellinum - saga sem Logi kærði sig eiginlega ekki um að heyra.

Skemmtilegur þáttur á léttu nótunum.

Við fáum frábæran gest til okkar í Seinni níu því til okkar kom söngkonan ástsæla Helga Möller. Við komum víða við í þættinum en Helga hefur lengi spilað og var best með um 14 í forgjöf.

Golf var stór þáttur í fjölskyldu Helgu en foreldrar hennar bjuggu til golfholur nærri sumarhúsi þeirra sem varð vísirinn að golfvellinum í Grindavík.

Við fengum að heyra draumahollið hjá Helgu og einnig sagði hún okkur frá því þegar Helga fór holu í höggi á Islantilla golfvellinum.

Jafnframt kemur fram að 4-járnið sem var hluti af fyrsta golfsettinu hjá Helgu er í sérstöku uppáhaldi.

Frábær þáttur í alla staði á sérstaklega léttum nótum.

Við fáum til okkar góðan gest í Seinni níu þessa vikuna því Alþingismaðurinn Sigmundur Ernir Rúnarsson kom í heimsókn til okkar. Hann hefur leikið golf lengi og hóf ungur að leika golf á Akureyri. Í raun byrjaði hann ferilinn sem kylfusveinn og stundaði það af meiri krafti en sjálft golfið fyrstu árin.

Sigmundur er með 14 í forgjöf og spilar að eigin sögn frekar tíðindalítið golf. Hann er frekar beinn af teig og fær fáar sprengjur.

Í þættinum segir Sigmundur okkur aðeins frá sínum eftirlætis velli sem er La Gomera er staðsettur á eyju við hlið Tenerife.

Sigmundur velur draumahollið og við fáum einnig kraftröðun yfir fimm vinsælustu velli ársins í golfhermi hjá Golfsvítunni.

Skemmtilegur þáttur þar sem er komið víða. Meðal annars er rætt um hvort golfvöllur í Viðey gæti orðið að kosningamáli?

Við fáum til okkar skemmtilegan gest í þessari viku í Seinni níu því tónlistamaðurinn Patrik Atlason kom í heimsókn til okkar. Patrik er með um 7 í forgjöf en hann hóf að leika golf í Covid.

Í þættinum er komið víða við en Patrik segir okkur frá sýn sína á golfíþróttina. Hann segir okkur meðal annars frá þeirri áráttu sinni að brjóta golfkylfur en hann braut 10 golfkylfur á síðasta ári.

Patrik velur draumahollið og svo fáum mjög áhugaverða kraftröðun þar sem hann velur fimm bestu áhrifavaldanna á Youtube.

Frábær þáttur þar sem golf er í aðalhlutverki en einnig aðeins rætt um tónlist.

Við fáum til okkar frábæran gest í fyrsta þátt ársins 2026. Sigurður Kári Kristjánsson, lögmaður og fv. þingmaður, mætti til okkar í skemmtilegt spjall um golf.

Sigurður Kári er með ca 11 forgjöf um þessar mundir og dreymir um að komast í einna tölu forgjöf. Hann hefur leikið golf um árabil og sagði okkur frá því þegar hann féll fyrir íþróttinni í útskriftarferð úr framhaldsskóla. Í þættinum förum við yfir hæðir og lægðir í golfinu en um tveggja ára tímabili týndi Siggi Kári hreinlega sveiflunni.

Að venju er draumahollið á sínum stað en Siggi bauð okkur jafnframt upp á frábæra kraftröðun þar sem banatilræði við þáverandi forsætisráðherra við golfiðkun í Vestmannaeyjum ber á góma.

Sigurður Kári er jafnframt bróðir Hafrúnar Kristjánsdóttur sem var gestur okkar í Seinni níu á árinu 2024. Þau eru því fyrstu systkinin til að mæta í Seinni níu.

Mjög skemmtilegur þáttur að vanda og allir léttir. Gleðilegt nýtt ár!

Nú er komið að síðasta þætti ársins af Seinni níu. Líkt ogjólaþátturinn okkar þá er áramótaþátturinn uppfullur af skemmtilegum brotum úr þáttum ársins. Í þættinum er rætt kylfinga á öllu getustigi. Allt frá atvinnumönnum í golfi til byrjenda og eiginlega allt þar á milli.

Meðal þeirra sem bregða við í þættinum eru Bjarni Benediktsson, Gummi Ben, Sigríður Andersen, Auðunn Blöndal, Egill Einarsson, Eva María Jónsdóttir og fjölmargir af þeim stórskemmtilegu viðmælendum sem komu til okkar í Seinni níu á árinu.

Við í Seinni níu viljum þakka samfylgdina á árinu sem er að líðaog hlökkum til að hefja golfárið 2026 af krafti. Við mætum svo með nýjan þátt og nýjan viðmælenda í fyrstu viku nýs árs.

Gleðilegt nýtt ár!

Árið 2025 hefur verið frábært hjá okkur í Seinni níu. Af því tilefni ætlum við að gefa út tvo samantektarþætti með skemmtilegum umræðum við gesti okkar á árinu.

Fyrri þátturinn kemur út á aðfangadag og sá síðari á gamlársdag. Þættirnir eru báðir um tvær klukkustundir en þar reynum við þar að grípa niður á skemmtileg augnablik í þeim ca 50 þáttum sem við höfum gefið út á árinu.

Við óskum kylfingum landsins gleðilegra jóla og þökkum samfylgdina á árinu!