Í dag hófst aftur dagskrárliðurinn Sérfræðingurinn í Mannlega þættinum og verður hann á dagskrá á fimmtudögum í vetur. Sérfræðingur dagsins var Ingibjörg Th. Hreiðarsdóttir yfirljósmóðir ? meðgönguvernd, fósturgreining og bráðaþjónusta kvennadeildar á Landspítalanum. Hennar sérgrein er sykursýki á meðgöngu en hún er sjálf móðir tæplega 18 ára stúlku sem greindist 20 mánaða með týpu 1 sykursýki. og við byrjuðum einmitt á því að ræða um það og svo hennar starf sem ljósmóðir. Sem sagt í fyrri hlutanum sagði hún okkur frá sínu starfi og í seinni hlutanum svaraði hún spurningum sem hlustendur sendu inn á netfang þáttarins [email protected].

Svo heyrðum við í Sverri Kristjánssyni, klippara, þ.e. hann býr í Noregi og klippir þar kvikmyndir og sjónvarpsefni. Hann klippti nú síðast stórmyndina Margrét fyrsta, en hún er stærsta og dýrasta kvikmynd sem framleidd hefur verið á Norðurlöndunum. Myndin fjallar um ofurkonuna, Margréti fyrstu, sem barðist fyrir Kalmarsáttmálanum en hann var upphafið að Skandinavíu eins og við þekkjum hana í dag. Myndinn er leikstýrt af Charlotte Siegling og titilhlutverkið er í höndum dönsku leikkonunnar Trine Dyrholm sem margir ættu að þekkja. Halldóra Geirharðsdóttir og Tinna Hrafnsdóttir fara til dæmis með hlutverk í myndinni og myndin er meðframleidd af íslenska framleiðslufyrirtækinu True North. Við fengum Sverri til að segja okkur frá sínu starfi, verkefnum og hvað er næst á döfinni hjá honum.

UMSJÓN GUÐRÚN GUNNARSDÓTTIR OG GUNNAR HANSSON