Sjómannadagurinn er framundan um allt land og við forvitnuðums um dagskrána hér á höfuðborgarsvæðinu þar sem mikið verður um dýrðir eftir tveggja ára hlé. Það verður boðað til mannfagnaðar á Grandanum í Reykjavík á sunnudaginn (12.júní). Undirbúningur hefur staðið yfir í um sjö mánuði og yfirskriftin í ár er Hafsjór af skemmtun og er miðuð við að öll fjölskyldan geti komið saman og notið hátíðarinnar. Anna Björk Árnadóttir, frá viðburðarfyrirtækinu Eventum og framkvæmdastýra hátíðarhaldanna í ár kom í þáttinn í dag.

Litlir hvítir boltar eru farnir að fljúga, mislangt, í miklu magni um grænar grundir landsins á nýjan leik. Kylfingar hlaupa á eftir þeim í gleðivímu með bros eyrnanna á milli, eftir að hafa pússað kylfurnar yfir vetrarmánuðina. Við fengum því Brynjar Eldon Geirsson, framkvæmdastjóra Golfsambands Íslands, til að fara með okkur yfir golfsumarið. Golfsambandið er elsta og næst fjölmennasta íþróttasambandið innan ÍSÍ með um 22.000 félaga. Í fyrra var 12% aukning á kylfingum sem eru skráðir í golfklúbba. Þetta er aukning um 2.000 kylfinga frá fyrra ári. Árið 2019, áður en Covid skall á, spiluðu erlendir kylfingar yfir 10.000 hringi á íslenskum golfvöllum. Við fengum að vita hver staðan er núna og hvað er framundan hjá golfhreyfingunni.

Skjálftavirkni hefur verið talsverð undanfarið, bæði á Reykjanesi og fyrir norðan. Því er áhugavert að heyra efnið sem Þór Fjalar Hallgrímsson, sem var í starfsnámi hér á Rás 1 í vor, fann fyrir okkur í safni Útvarpsins. Þann 5. maí 1970 fór Hekla að gjósa í 15. skiptið frá upphafi íslandsbyggðar. Daginn eftir var Árni Gunnarsson með fréttauka um gosið og við fengum að heyra hluta af honum í þættinum í dag. Árni talaði þar við þá Sigurð Þórarinsson og Harald Georgsson bónda í Haga í Gnúpverjahreppi.

UMSJÓN: GUNNAR HANSSON OG GUÐRÚN GUNNARSDÓTTIR