Það skiptir máli að skilja verkina til að geta skilið við þá. Þetta er orðað svona í lýsingu á námskeiðinu Skiljum (við) verkina hjá Endurmenntun Háskóla Íslands. Þar munu þær Edda Björk Pétursdóttir, markþjálfi og jógakennari, og Sóley Stefáns, heilsumarkþjálfi og jógakennari, fræða þáttakendur um verki og taugakerfið og hvert samband heilans er við verkjaboð og hvort það sé jafnvel hægt að draga úr eða jafnvel rjúfa verkjaboðin. Við fengum þær til að útskýra þetta betur fyrir okkur í þættinum.

Við ætlum að fræðast um verkefnið NTC eða Need to Connect en það snýst um að styrkja og tengja ungar mæður, á aldrinum 18-30 ára, og rjúfa einangrun og einmanaleika með listþjálfun. Samstarfsaðilar verkefnisins koma frá Íslandi, Slóveníu, Ítalíu, Búlgaríu, Hollandi, Spáni og Litháen. Í verkefninu verður lögð áhersla á að gefa ungum mæðrum tækifæri og getu til að hafa áhrif og hjálpa öðrum mæðrum í svipuðum aðstæðum. Stefanía Kristinsdóttir, frá Einurð sem heldur utan um verkefnið hér á landi, og Sara María Estersebulvida Glaxorsdóttir móðir sem tekur þátt í námskeiðinu, komu í þáttinn í dag.

Við fengum svo póstkort frá Magnúsi R. Einarssyni í dag. Póstkortið snerist að þessu sinni um vatn, eða réttara sagt um skort á vatni. Hann sagði frá reynslu sinni af vatnsskorti og þurrkatíð í Ástralíu þegar hann dvaldi þar fyrir margt löngu. Í mörgum löndum hafa menn brugðið á það ráð að eima vatn úr sjó til að bregðast við breyttu veðurfari og þurrki, en sú aðferð er verulega mengandi og eykur í raun á vandann í stað þess að leysa hann. Eiming á vatni úr sjó hefur fimmfaldast frá aldamótum og margir telja að næstu styrjaldir í miðausturlöndum muni ekki snúast um olíu heldur vatn.

Tónlist í þætti dagsins:

Skólaball / Brimkló (Magnús Kjartansson)

Our House / Crosby, Stills, Nash & Young (Graham Nash)

Missisippi / The Cactus Blossoms (Jack Torrey)

Rainbow Connection / Willie Nelson (Willie Nelson, Amy Nelson, David Zettner & Matt Hubbard)

UMSJÓN: GUÐRÚN GUNNARSDÓTTIR OG GUNNAR HANSSON