Die digters toor met woorde en borduur vrolik voort op verse van onder andere Boerneef en Barend J. Toerien. Daar is ook kans om ‘n gunstelinggedig te herbesoek. En dan moet hulle binne vyf minute ‘n bekende en klassieke Afrikaanse gedig nuwe lewe gee. Kom luister en lag saam. Poësie was lanklaas soveel pret en plesier.

In die plek van vanaand se normale Skrywers en Boeke saai ons DIE WOORDKETTING uit wat tydens die 2014 RSG Kunstefees uitgesaai is. Ilse Salzwedel doen die woordketting met die digters Philip de Vos, Diana Ferrus en Andries Bezuidenhout. Elize Cawood is die spesiale gas.

Luister na sketse uit die pen van Annemarie van der Walt, Pieter Pieterse en Johann C. Bakkes en nuus uit die internasionale boekewêreld, wat onder andere die voorlesing van 'n Pablo Neruda-gedig insluit.

Ilse Salzwedel gesels met Petrovna Metelerkamp oor die werk van Jeanne Goosen. Petrovna het onlangs 'n biografie van Jeanne saamgestel, asook 'n digbundel van Goosen se voorheen ongepubliseerde gedigte en 'n bundel getiteld LOS GEDAGTES met filosofiese aanhalings uit die gevierde skrywer, dramaturg en rubriekskrywer se pen. Johan Myburg gesels in sy rubriek oor die internasionale letterkunde onder andere oor 'n nuwe roman oor die lewe van Shakespeare se seun Hamnet, wat aan builepes dood is. Vind ook meer uit oor Leo Tolstoy se roman Anna Karenina waaroor verskeie rolprente gemaak is.

Kinderboekskrywer Alba Bouwer sou vandeesmaand 100 jaar oud gewees het, en 'n heruitgawe omnibus van haar gewilde Rivierplaas- en Ruyswyck-stories het pas verskyn. Jy kan luister na uittreksels uit twee argiefopnames waarin Bouwer gesels oor haar skryfwerk, en die aktrise Mila Guy lees ook 'n uittreksel uit 'n Rivierplaas-storie. Johan Myburg gesels in sy internasionale bydrae oor vertaalde fiksie.

Ses dekades gelede is Afrikaanse letterkunde heeltemal verander deur 'n groep skrywers, digters en dramaturge na wie steeds verwys word as die Sestigers. Luister in hierdie program na 'n informele gesprek (uit die argiewe) wat opgeneem is tydens Bartho Smit se sestigste verjaarsdag in 1984. Jy kan die stemme hoor van Smit, Chris Barnard, Jan Rabie, Andre P. Brink en Etienne Leroux. In sy insetsel kyk Johan Myburg na die finaliste vir die Women's Prize for Fiction, en gesels ook oor skrywers wat supervirusse en pandemies in hul fiksie beskryf het.

Die eerste Afrikaanse vertaling van 'n Jodi Picoult-roman het onlangs in Afrikaans verskyn. Hoor hoe die topverkoper internasionale skrywer daaroor voel. Ilse Salzwedel gesels met die geskiedskrywer Albert Blake, oor sy werk. Vind uit wie onlangs aangewys is as wenners van die LAPA Jeugromankompetisie, en watter boek wat oorspronklik in Afrikaans uitgegee is, se Engelse weergawe onlangs benoem is vir die Booker International letterkundeprys se langlys.

Ilse Salzwedel gesels met Elmari Rautenbach, koordineerder van die US Woordfees se Skrywersfees, oor vanjaar se program. Olivia Coetzee, skrywer van INNIE SHADOWS, vertel vir Ilse Salzwedel hoekom sy gekies het om haar debuutroman in Kaaps te skryf. Johan Myburg gesels in sy internasionale insetsel onder meer oor W.H. Auden, en jy kan ook 'n stemopname hoor waarin Auden een van sy eie verse voorlees.

Sonya van Schalkwyk-Barois, die vrou agter die splinternuwe Afrikaanse vertalings van die Kuifie-strokiesprentreeks, vertel vir Ilse Salzwedel hoe sy die enorme taak benader. Sonya is ook die vertaler van die baie gewilde Asterix en Obelix-reeks, waarvan daar reeds meer as 20 nuwe Afrikaanse titels op die rak is. Jy kan ook luister na 'n mini-drama uit die argiewe uit die pen van Cor Nortje. En Johan Myburg vertel meer oor die kortlyste vir die gesogte British Book Awards, of Nibbies.

Luister na argiefmateriaal oor die digter, liedjieskrywer en dramaturg Rosa Keet, wat onlangs haar 75e verjaarsdag gevier het. Keet was instrumenteel in die ontstaan van die Musiek-en-Liriek-beweging. Die werk van die Nobelprysbekroonde skrywer J.M. Coetzee, wat onlangs 80 geword het, word ook belig. Johan Myburg gesels in sy bydrae oor interessante gebeure in die internasionale boekewêreld.