'n Regstreekse uitsending vanaf die Woordfees in Stellenbosch.

Ilse Salzwedel en prof. Willie Burger gesels met prof. Jerzy Koch, hoof van die Universiteit van Poznan in Pole se departement Afrikaans, oor sy liefde vir en werk oor Afrikaans. Jy kan ook luister na 'n huldeblyk vir die oud-uitgewer en kinderboekskrywer, Leon Rousseau, 'n man wat diep spore in Afrikaanse letterkunde getrap het. Johan Myburg gesels in sy bydrae oor die lewe, werk en nalatenskap van Umberto Eco en Harper Lee, wat albei onlangs oorlede is. Madri Victor gesels oor die hoogtepunte tydens die Skrywersfees van die US Woordfees, wat volgende week in Stellenbosch gehou word.

Prof. Joan Hambidge gesels met Suzette Kotze-Myburgh oor die heruitgawe van D.J. Opperman se versamelde poësie. Ilse Salzwedel gesels met Andre Pretorius oor sy nuwe reisboek, ITALIAANSE INTERMEZZI. Johan Myburgh gesels oor die internasionale letterkunde.

Ilse Salzwedel gesels met prof. Willie Burger oor resensies en die groter plek wat dit in letterkunde behoort te beklee. Corina van der Spoel gesels met Boris Gorelic oor sy nuwe boek, AN ENTIRELY DIFFERENT WORLD: RUSSIAN VISITORS TO THE CAPE 1797-1870, wat die rol van die Russe in die vestiging van die Kaap verken. Johan Myburg gesels in sy weeklikse bydrae oor die Jaipur Letterkundefees, die nadele van spoedlees as dit kom by lees vir ontpanning, 'n toekenning aan die skrywer J.K. Rowling, en 'n nuwe boek van Don Dellilo.

Hoe verskil 'n goeie en 'n slegte resensie van 'n positiewe en 'n negatiewe resensie? Hoe kies boekeredakteurs resensente? Wat is die moets en moenies as dit kom by die skryf van 'n resensie? Ilse Salzwedel gesels hieroor met prof. Thys Human, professor in Afrikaanse letterkunde aan die NWU, en self 'n gerekende resensent. Jo Prins, boekeredakteur by Media 24 se dagblaaie deel ook sy insigte. Johan Myburg praat in sy internasionale bydrae onder meer oor 'n Saoedi-Arabiese digter wat ter dood veroordeel is oor sy digkuns, maar toe “begenadig” is met 'n vonnis van 800 houe en agt jaar in aanhouding.

Ilse Salzwedel gesels met prof. Willie Burger oor VLAM IN DIE SNEEU, die briefwisseling tussen Andre P. Brink en Ingrid Jonker. Prof. Bernard Odendaal gesels oor die ATKV-skryfskool se Herfsskryfskool wat in Maart plaasvind. Johan Myburg gesels onder meer oor die Oxford Literary Festival, die Franse skrywer Michel Tournier en Roald Dahl.

Suzette Kotze-Myburgh gesels met Marzanne le Roux-van der Boon oor haar skryfloopbaan. Prof. Willie Burger gesels oor Breyten Breytenbach se PAROOL. En Marga Stoffer van NB Uitgewers gesels oor nuwe publikasies uit hul stal.

Corina van der Spoel gesels met die skrywer en digter Dolf van Niekerk oor sy jongste digbundel Portrette in my gang. Prof. Willie Burger gesels oor Carel van der Merwe se Donkerstroom, die outobiografie oor Eugene Marais. Johan Myburg gesels oor 'n paar internasionale letterkundepryse en 'n polemiek oor die Oxford-skrywersfees.

Johan Myburg gesels met die besoekende Nederlandse skrywer en ekonoom, Nachoem Wijnberg, oor sy nuwe bundel Van Groot Belang. Izak de Vries praat oor die nuutste publikasies van Lapa Uitgewers. Leonie van Rensburg gesels oor die Top 20 Afrikaanse verkopers vir die feestyd. In sy insetsel oor die internasionale letterkunde gesels Johan Myburg oor Julian Barnes se nuwe boek, 'n letterkunde prys vir Kate Atkinson en 'n liefdesverhaal wat selfs die Israelse parlement aan die gons het.

Suzette Kotze-Myburgh praat met Piet van Rooyen oor sy nuwe roman, Voëlvry. Dan Sleigh gesels oor sy uitgewer, Riana Barnard. Riana verduidelik aan Ilse Salzwedel presies wat die werk van 'n uitgewer behels. Johan Myburg gesels oor die internasionale letterkunde en boekbedryf.