Spitstyd

Deel 1: Van al die gaste wat die afgelope drie-en-'n-half jaar op Kuns met kontant verskyn het, is hierdie gas die een wat saam met die meeste van hulle 'n duet opgeneem het. Almal in die musiekbedryf wil saam met dié eens professionele branderplankryer, wat bekend is vir sy kontemporêre, alternatiewe akoestiese folkmusiek werk. Len Muller het reeds vier albums vrygestel, en op een van hulle is sy liedjie, SING VIR SENTE. Len praat oor die lirieke van dié liedjie, en hoe hy tien jaar gelede vir sente gesing het, maar hoe kleingeld mettertyd grootgeld geword het.

Deel 1: Vir die doel van hierdie aflewering kan die program vir ‘n oomblik Kulkuns Met Kontant genoem word. Kuberskelms het as’t ware oor Nuwejaar kulkuns met kontant probeer pleeg onder Henco en van sy vorige gaste op die program se name - identiteitsdiefstal in die ergste graad. Onbekende bedrieglike maatskappye deel skakels per e-pos en sosialemedianetwerke wat lyk asof dit deel is van Suid-Afrikaanse drukmedia en meer spesifiek, op Afrikaanse koerante en tydskrifte se webwerwe gepubliseer is. Die skakels op die bladsye lei jou oënskynlik na ‘n bladsy met ‘n vinnige rykwordskema. Hulle name en handelsmerke word onregmatig deur die skelms gebruik. In die slenters word van ons land se bekendes betrek asof hulle deel is van ‘n beleggingskema. Dit is fopnuus. Henco en sy gaste is deurgaans besig om bladsye en profiele, wat hulle name misbruik, aan te meld by Meta en die betrokke owerhede. Dit is maklik om aan te beveel dat jy nooit op ‘n skakel in ‘n e-pos, ‘n gefabriseerde koerant-en tydskrifartikel of in sosialenetwerplasings moet klik nie, maar wie is die beste in die land om ons stap vir stap te verduidelik hoe ons onsself en ons geld teen sulke bedrieërs kan beskerm? Mike Bolhuis natuurlik.