Spitstyd

Deel 1: Wanneer iemand Klipwerf sê, weet almal dadelik wat hulle doen en hoe hulle klink - Hantam Klipwerf Boereorkes, en later net Klipwerf. Gené van Niekerk, wat 23 jaar van die groep se 54 bestaansjare vir die orkes speel, sê musiekmaak en Klipwerf-wees is vir haar ‘n leefwyse. Die waardes wat die groep vandag nog as waardevol en belangrik ag, is van die oorspronklike lede van die groep afkomstig, en hulle weet waar hulle wortels lê. Ná 35 albums, tweemiljoen kilometer in hulle bus om 4 000 vertonings te lewer, en 54 jaar se skoffelsukses is Klipwerf een van die grootste orkeste in Suid-Afrika se geskiedenis. Hoe het Klipwerf so sterk gevestigde handelsmerk geword? Hoe bestaan dit al 54 jaar? Hoe werk elke orkeslid se maandelikse vergoeding, terwyl elkeen hulle eie dag-tot-dag loopbane bestuur? Kom vind uit by Gené waar sy met Henco Kruger op haar plaas op Calvinia gesels.

Deel 2 - Vlok Cilliers, wat ná sy rugbyspeeldae, skopafrigter van die WP en Bulle was, en nou die Franse nasionale span, vertel hoe hy die tegnieke in skopafrigting toepas op sy persoonlike finansies, en hoe dit vir jou ook van waarde kan wees. Hy word as Suid-Afrika se beste skopafrigter gereken. Hy woon ses maande in Parys, Frankryk, en ses maande in Stellenbosch en wil in samewerking met RSG, klinieke vir finansies aanbied soortgelyk aan die skopklinieke wat hy dwarsoor die land aanbied. Met behulp van VlokSkop help hy gemeenskappe met langtermynoplossings vir hulle probleme i.p.v. kitsoplossings. Deel hiervan is langtermynoplossings vir rugbyspelers wie se loopbane op ‘n relatiewe jong ouderdom tot 'n einde kom, en hulle dan moet leer hoe om 'n salaris en inkomste weg van die rugbyveld af te verdien. Vlok deel ook hoe hy sy verskillende inkomstestrome bestuur wat hy plaaslik en oorsee verdien.