Föstudagsgestur Mannlega þáttarins í þetta sinn var Stefán Jón Hafstein. Hann á feril sem stjórnmálamaður, fjölmiðlamaður og rithöfundur. Stefán Jón kom að stofnun Dægurmálaútvarps Rásar 2 og stjórnaði útvarpsþáttunum Meinhorninu og Þjóðarsálinni, þar sem hlustendum gafst færi á að hringja inn og tjá sig um ýmis málefni. Hann var starfsmaður Þróunarsamvinnustofnunar þar sem hann var verkefnastjóri í Namibíu, umdæmisstjóri í Malaví og Úganda, var í Róm og nú er hann kominn aftur til Íslands í bili vegna COVID-19 ástandsins, en hann mun halda aftur til Rómar þegar allt kemst í eðlilegt horf. Við forvitnuðumst um æsku hans og uppvöxt og ferðalag hans í gegnum lífsins til dagsins í dag.

Í matarspjalli dagsins fengum við Þórhildi Ólafsdóttur, kollega okkar hér á Rás 1 úr Samfélaginu. Hún sagði okkur reynslusögu frá því þegar hún bjó til Sesarsalat fyrir fjölskylduna, með eiginmanninn andandi ofan í hálsmálið á henni. Sem sagt salat í matarspjalli dagsins.

UMSJÓN SIGURLAUG MARGRÉT JÓNASDÓTTIR OG GUNNAR HANSSON