Hulda G. Geirsdóttir ræddi við hjónin Erlu Reynisdóttur og Skúla Björgvin Sigurðsson sem þráðu að eignast fjölskyldu og reyndu árum saman að eignast barn. Eftir tíu tæknifrjógvanir og tilraun til ættleiðingar sem ekki varð, gripu örlögin inn í og að þremur árum liðnum áttu þau fjögur börn.

Hrefna Dögg kemur frá Stykkishólmi. Var á kafi í körfunni, flutti svo til Reykjavíkur og bjó í skúti við höfnina á meðan hún kláraði lögfræðinám. Fékk óbilandi áhuga á norðurslóðum eftir að hafa farið ein til Grænlands í nokkrar vikur aðeins 19ára gömul. Síðar fór hún í ferð til Svalbarða, skíðaði á ástina og var með annan fótinn þar næstu 10 árin eða svo.

Helgi Björnsson leikari, tónlistarmaður og söngvari var gestur Hrafnhildar í Sunnudagssögum dagsins. Hann sagði frá uppeldinu á Ísafirði, leiklistinni, tónlistinni fjölskyldunni og áhugamálunum og ýmsu fleiru.

Gígja Hólmgeirsdóttir ræddi við Sindra Geir Óskarsson, sóknarprest í Glerárkirkju á Akureyri. Sindri Geir er meðal yngstu starfandi presta landsins og hefur farið nýstárlegar leiðir í sínum embættisstörfum. Hann nýtir sér til að mynda samfélagsmiðilinn Tic Tok þar sem hann svarar spurningum fólks um allt milli himins og jarðar sem snýr að kirkjunni og trúmálum. Hann hefur einnig einbeitt sér að svokallaðri vistguðfræði innan kirkjunnar þar sem tenging trúar og náttúru er í brennidepli. Sindri Geir var þó ekki alltaf viss um að hann væri trúaður og ætlaði sér að verða prestur. Í þessum þætti segir hann frá vegferð sinni.

Hulda G. Geirsdóttir ræddi við Ragnheiði Elínu Árnadóttur um lífshlaup hennar og fjölbreyttan feril. Hún ætlaði sér aldrei í pólitík en endaði sem ráðherra og segist stolt af því að hafa tekið þátt í mörgum mikilvægum verkefnum á þeim tíma. Nú sé hennar tími í pólitík hins vegar liðinn og hún ætli sér ekki aftur á þann vettvang. Ragnheiður sagði lífið hafa leitt sig áfram og vitnaði í John Lennon, Life is what happens to you while you are busy making other plans, en margar lífsákvarðanir hennar hafa verið drifnar áfram af tilviljunum. Fjölbreytt og skemmtilegt spjall um ferðalag boltastelpunnar sem fannst Keflavík of lítil fyrir sig, en rataði aftur heim.

Tónlistarsnillingurinn Eyþór Gunnarsson segir frá uppruna sínum, ferlinum og nútímanum.

Gestur Hrafnhildar Halldórsdóttur var Rolando Diaz björgunar-og slökkviliðsmaður sem býr og starfar á Bifröst í Borgarfirði. Hann er fæddur og uppalinn í El Salvador en flúði ástandið í landinu en þar hafði geysað borgarastríð og síðar hafði Mafían tekið völdin. Hann kom til íslands fyrir 20 árum síðan og er alsæll með lífið og tilveruna hér á landi.

Alex Elliot tekur á móti þeim Mirjam Maekelle og Jóni Símoni Markússyni og spjallar við þau um árið 2020.

Gígja Hólmgeirsdóttir tekur á móti Huldu Sif Hermannsdóttur, verkefnastjóra og aðstoðarmanni bæjarstjóra Akureyrarbæjar, í hljóðveri á Akureyri. Hulda Sif segir meðal annars frá æsku sinni í Innbænum á Akureyri, frá skiptinemadvöl sinni í Þýskalandi þar sem hún þurfti að gangast undir aðgerð á fæti. Hulda Sif segir einnig frá hvernig hún byrjar að vinna í fjölmiðlum, þróar sig svo yfir í verkefnastjórnun og nú í dag starfar hún sem aðstoðarmaður bæjarstjóra.

Sólborg Guðbrandsdóttir fyrirlesari, samfélagsmiðlastjarna, söngkona, tvíburi og nú rithöfundurinn segir sína sögu í Sunnudagssögum.