Sunnudagssögur

Helga Margrét Höskuldsdóttir ræðir við Karen Björg Þorsteinsdóttur, uppstandara. Karen ræðir uppvaxtarárin á Grenivík, ævintýrin sem fylgdu því að flytja til Akureyrar í menntaskóla og þá hryllilegar en síðar hlægilegar upplifanir i heimsreisu. Hún segir frá því hvernig hún leiddist út í uppistand, hvernig hún kynntist Þorsteini Guðmundssyni, grínara, og endaði á því að skrifa með honum lokaritgerð í sálfræði.

Rætt við Hafrúnu Kristjánsdóttur, sálfræðing auk þess sem hringt var til Kaupmannahafnar og rætt um nýjustu tíðindi þaðan.

Sunnudagsgesturinn að þessu sinni var Þorvaldur Bjarni Þorvaldsson, tónlistarstjóri Sinfóníuhljómsveitar Norðurlands. Hann sagði meðal annars frá „Akureyrarsóninum“ en það var hann sem hóf umræðuna um hljóðið dularfulla á Facebooksíðu sinni. Viðbrögðin hafa ekki látið á sér standa og málið verið eitt það umtalaðasta í vikunni. Þorvaldur sagði einnig frá störfum sínum við sinfóníuhljómsveitina og þeim tækifærum sem hljómsveitinni hafa opnast við það að taka upp kvikmyndatónlist.

Í þættinum var einnig hringt á Langanes og forvitnast um eldflaugina sem skotið var upp þennan morgun. Rætt var við Auði Lóu Guðnadóttur, safnvörð í Sauðaneshúsi á Langanesi, og Þorstein Ægi sem er formaður björgunarsveitarinnar Hafliða.

Leyndardómar Hlíðarfjalls voru einnig til umræðu í þættinum en það er Brynjar Karl Óttarsson sem sagði frá hlaðvarpsþáttum sem fjalla um stríðsminjar í Hlíðarfjalli.

Þórgnýr Dýrfjörð heimspekingur og framkvæmdastjóri Akureyrarstofu var gestur Gígju í Sunnudagssögum. Þórgnýr sagði frá æsku sinni á Siglufirði og fjölskyldulífinu. Hann rifjaði upp þegar hann fluttist til Akureyrar og hóf nám í Menntaskólanum á Akureyri. Þá vann hann einnig á vistheimilinu Sólborg en þessa tvö staði segir hann hafa haft gríðarlega mótandi áhrif á sig til lífstíðar. Þórgnýr talaði einnum um þegar hann fór að læra heimspeki við HÍ og hvernig hann heillaðist af greininni og nýtist honum í öllum hans störfum. Hann sagði einnig frá störfum sínum fyrir Akureyrarbæ og spjallaði um hvað væri framundan í sumar. Rætt var við Þórgný í fyrri hluta þáttarins.

Í seinni hluta þáttarins var slegið á þráðinn til Héðins Ásbjörnssonar sem sagði frá fyrirhuguðu Baskasetri í gömlu síldarverksmiðjunni í Djúpavík á Ströndum. Einnig var hringt í Steingrím Karlsson og forvitnast um starfsemi Óbyggðaseturs Íslands sem býður gestum sínum upp á ferðalag aftur í tímann.

Umsjón: Gígja Hólmgeirsdóttir

Einar Örn Aðalsteinsson og Sesselja Ingibjörg Barðdal Reynisdóttir voru gestir í Sunnudagssögum. Einar sagði frá uppvexti sínum inni í Eyjafjarðarsveit og Sesselja sagði frá sínum uppvexti á Sauðárkróki. Þau rifjuðu upp þegar þau kynntust og hvernig hugmyndin spratt upp að hafa kaffihús á æskuslóðum Einars, sem síðan þróaðist í Kaffi Kú. Einar og Sesselja sögðu einnig frá heilkenni yngstu dóttur þeirra og þeim áskorunum sem því fylgir. Að lokum ræddu þau frumkvöðlastarfsemi á Norðurlandi og áform þeirra um að reisa heilsulind í Eyjafjarðarsveit þar sem hægt verður að fara í mjólkurböð. Einar og Sesselja voru gestir í fyrri hluta þáttarins.

Í seinni hluta þáttarins var hringt um landið. Hringt var í Hörpu Hlín Jónsdóttur sem er einn af forsvarmönnum Ferðafélagsins Trölla á Ólafsfirði. Hún sagði frá upplifun sinni af jarðskjálftunum og spjallaði um hvernig þeir hafa áhrif á ferðir Ferðafélagsins Trölla. Auk þess var hringt í Davíð Arnar Rúnarsson landvörð í Dyrhólaey sem var á eftirlitsferð um svæðið enda mikið hvassviðri.

Umsjón: Gígja Hólmgeirsdóttir

Aðalheiður S. Eysteinsdóttir sagði frá uppvextinum á Siglufirði. Hún sagði frá hvernig staðurinn var paradís fyrir börn og hvernig hún var umkringd sköpun og handverki alla sína ævi. Hún rifjaði upp hvernig hún rambaði á Myndlistarskólann á Akureyri þegar hún var flutt með fjölskyldu sinni frá Siglufirði til Akureyrar og hvernig hún fann sína fjöl í myndlistinni. Aðalheiður sagði einnig frá hvernig hún ásamt fleira fólki hefur umbreytt gömlum byggingum og svæðum í vettvang sköpunar, til að mynda Gilinu á Akureyri, verksmiðjunni á Hjalteyri, félagsheimilinu Freyjulundi og nú Alþýðuhúsinu á Siglufirði. Hún sagði einnig frá afmælunum sínum og miklu sýningarhaldi í tengslum við þau enda annálað afmælisbarn. Rætt var við Aðalheiði í fyrri hluta þáttarins.

Í seinni hluta þáttarins var hringt í Tótlu I. Sæmundsdóttur, fræðslustýru Samtakanna 78. Hún og dætur hennar voru staddar á Suðurlandinu með stórum hópi vinafólks, en dæturnar voru að gista í tjaldi í fyrsta skipti sem reyndist mikið ævintýri. Tótla sagði einnig frá ferðalögum sínum um sunnanverða Vestfirði auk þess að fjalla um komandi tíma hjá samtökum kvenna um nýja stjórnarskrá.

Í seinni hluta þáttarins var auk þess tekið við kveðjum frá hlustendum í gegnum Facebook-síðu Rásar 2.

Umsjón: Gígja Hólmgeirsdóttir

Friðrik Karlsson er einn af yngstu vélstjórum á landinu og er yfirvélstjóri á Harðbaki EA 3. Hann mætti í Sunnudagssögur og sagði frá uppvextinum í Eyjafjarðarsveit og hvernig hann áttaði sig snemma á því að hann vildi vinna í kringum vélar. Hann sagði frá vélstjórnarnáminu og fyrirmyndum sem hann hefur átt í gegnum lífið. Friðrik sagði einnig frá meðfæddum hjartagalla hans og hvernig það hefur mótað sýn hans á lífið. Hann sagði einnig frá lífinu á sjó og hvernig hann ákvað að nýta vélstjórnarmenntun sína til að vinna í sjávarútvegi. Rætt var við Friðrik Karlsson í fyrri hluta þáttarins.

Í seinni hluta þáttarins var hringt í sjómenn. Fyrst heyrðum við í Steinunni Káradóttur háseta á á Borgarfirði Eystri. Hún sagði frá uppvexti hennar í kringum sjóinn og rifjaði upp eftirminnileg atvik á ferli hennar sem sjómaður. Síðan var hringt til Vestmannaeyja og rætt þar við Ríkharð Jón Stefansson. Ríkharður er kokkur á Bergey og sagði okkur frá eftirminnilegu atviki þegar hann fékk slæmt hjartaáfall í einum túrnum. Hann sagði okkur einnig frá málverkasýningu sem hann opnaði fyrir stuttu.

Umsjón: Gígja Hólmgeirsdóttir.

María Gunnarsdóttir tónmenntakennari sagði frá uppvextinum í Kópavoginum og hvernig líf hennar tók stakkaskiptum þegar hún byrjaði í barnakór Kársnesskóla undir stjórn Þórunnar Björnsdóttur. Hún segir frá draumnum um að verða tónmenntakennari og þegar hún fluttist með fjölskyldunni á Dalvík þar sem þau þekktu nær enga. María talaði um feril sinn sem tónmenntakennari á Eyjafjarðarsvæðinu og rifjar upp skemmtilegar minningar. Rætt var við Maríu Gunnarsdóttur í fyrri hluta þáttarins.

Í seinni hluta þáttarins var hringt um landið. Fyrst var slegið á þráðinn til Jóns Jónssonar á Sauðfjársetrinu á Ströndum en hann var í óða önn við að gera allt tilbúið fyrir opnun. Síðan var hringt í Magnús Magnússon prest á Staðarbakka en hann var um morguninn að ferma nokkur fermingarbörn. Að lokum heyrðum við í Björgu Sveinbjörnsdóttur sem stýrir Hversdagssafninu á Ísafirði en þar er í undirbúningi ljósmyndasýning þar sem 5-7 ára börn eru listamennirnir.

Umsjón: Gígja Hólmgeirsdóttir