Sunnudagssögur

Sigríður Sigþórsdóttir arkitekt var gestur Huldu G. Geirsdóttur í Sunnudagssögum að þessu sinni. Saman ræddu þær æskuárin í sveitinni, námsárin í Svíþjóð og ferilinn sem arkitekt. Þá deildi Sigríður reynslu sinni af ástvinamissi og hvernig lífið heldur áfram þrátt fyrir sára reynslu. Sigríður er mikið náttúrubarn og á sér athvarf í sveitinni og hestamennskunni sem hún segir allra meina bót.

Gígja Hólmgeirsdóttir ræðir við Gísla Gunnar Oddgeirsson, framkvæmdastjóra íþróttafélagsins Magna á Grenivík. Gísli Gunnar hefur búið alla sína tíð á Grenivík og fór snemma á sjóinn með pabba sínum. Í þættinum segir Gísli Gunnar frá áföllum sem hann hefur tekist á við í gegnum tíðina, en hann hefur á ekki langri ævi tekist á við krabbamein, hjartaáfall og vinnuslys á sjó. Hann segir mikilvægt að takast á við áföll af jákvæðni og ekki byrgja inni tilfinningar.

Kristín Tómasdóttir hefur sögu að segja. Margar af hennar fyrstu minningum eru í Kvennaathvarfinu vegna vinnu móður sinnar, hún á tvær systur og það eru læti í þeim öllum, hún flytur til Noregs 6 ára og er þar þangað til hún er 14 ára, hún er með óeðlilega margar háskólagráður, hún skrifar bækur, stundar krossfitt, rennir sér á skíðum, á allskonar fjölskyldu og starfar við hjónabandsráðgjöf.

Hrafnhildur Halldórsdóttir ræddi við Birgi Jónsson forstjóra Póstsins sem brátt verður fráfarandi því Birgir hefur sagt starfi sínu lausu þar. Hann segir frá uppvextinumí Kópavogi, áhugamálum , störfum, fjölskyldu, trommuleiknum með Dimmu og ýmsu fleiru.

Hulda Geirsdóttir ræddi við Tómas Knútsson, manninn á bak við Bláa herinn, um uppvöxt hans í Keflavík, vinnu á norskum borpöllum og björgunarstörf eftir Kielland slysið hræðilega þar í landi. Hann sagði líka frá ástríðu sinni á bak við umhverfismálin og því hvernig hann tileinkar allt sitt starf nemanda sínum sem lést í köfunarslysi. Þau Hulda og Tómas ræddu margt fleira í spjalli sínu enda Tómas komið víða við í leik og starfi.

Tónlist:

Bríet - Sólblóm.

Bruce Springsteen and the E Street Band - Ghosts.

John Lennon - Imagine.

Sting - Fields of gold.

Rúnar Júlíusson - Söngur um lífið.

Randy Crawford - One day Ill fly away.

Gígja Hólmgeirsdóttir ræðir við grunnskólakennarann Ólöfu Ásu Benediktsdóttur. Ólöf Ása kennir í Hrafnagilsskóla í Eyjafjarðarsveit og var nýverið tilnefnd til Menntaverðlaunanna 2020 sem framúrskarandi kennari, en hún Ólöf Ása er tilnefnd fyrir frábæran árangur við kennslu á unglingastigi, fjölbreyttar kennsluaðferðir og óbilandi trú á hæfni allra nemenda.

Kristján Gunnarsson er einn þeirra sem veiktist af Covid - 19 sjúkdómnum. Hér segir hann söguna af því hvenær og hvernig hann veiktist, dvölina á spítalanum, erfiðri reynslu af því að hafa lent í öndunarvél og svo ferlinu sem tók við þegar hann losnaði af gjörgæslu. Hann sagði frá bataferlinu, lífsreynslunni, viðhorfinu til lífsins og ýmsu fleiru.

Andri Freyr Viðarsson ræðir við Guðmund Fylkisson aðalvarðstjóri hjá lögreglunni á höfuðborgarsvæðinu. Guðmundur hóf störf sem lögreglumaður á Ísafirði árið 1985 en stærsti hluti starfsæfi hans hefur farið í að leita af týndum börnum.

Hulda G. Geirsdóttir ræddi við Ragnheiði Davíðsdóttur, fyrrum lögreglukonu, blaðamann, forvarnarfulltrúa og framkvæmdastjóra sem nú hefur sest á skólabekk að nýju enda óhrædd við breytingar í gegnum tíðina.

Þær fóru yfir fjölbreyttan feril Ragnheiðar sem hófst þegar hún réð sig 17 ára sem ráðskonu hjá Vigdísi Finnbogadóttur sem átti eftir að reynast henni mikil fyrirmynd og velgjörðarmaður.

Tónlist:

Jón Ólafsson - Sunnudagsmorgunn.

Bruce Springsteen og E. Street Band - Letter to you.

Mannakorn - Óralangt í burt.

Stefanía Svavarsdóttir - Flying.

Gígja Hólmgeirsdóttir ræðir við leikkonuna og frumkvöðulinn Maríu Pálsdóttur. María rekur Hælið - Setur um sögu berklanna á Kristnesi í Eyjafjarðarsveit og nýverið var þar frumsýnt sviðslistaverkið Tæring þar sem áhorfendur geta upplifað tregafullan veruleika berklanna. María segir einnig frá uppvexti sínum, leikkonuferlinum og fyrirmyndum í lífinu.