亞特受邀撰寫《聯合文學》4月號「編舟計畫」專欄文章，介紹一個台語詞彙，我選擇了「按聲／àn-siaⁿ」這個詞，為了感謝聽友一直以來的支持，特別將原先華文版的〈按聲〉改寫成台文版本，並且錄成有聲版，連同全文一併放送。
(本篇羅馬字採白話字系統書寫)
--
〈按聲／àn-siaⁿ〉

過去穡頭 ê 關係，佇傳統市場走跳幾若年，龜叨鱉趖 ê 代誌 mā 見識過，mā 有 chiâⁿ 濟予人 chìn 感心 ê 人情味，這幾年學上濟--ê 就是，規工浸佇市場底，就袂輸浸佇台語 ê 天然湧泉內底仝款，「各種台語詞彙」往往佇活跳跳 ê 日常當中 but 出來。

市場 ê 日常是綴節氣佮節日tih行，四界攏是炒 kah 芳貢貢 ê 秫米佮料 ê 豆油芳頭，彼是佇宜蘭，北部粽主宰的五日節，辟邪 ê 「菖蒲掛艾草」干焦前幾日仔有tih賣，而且定定排列排kah躼躼長；麻油芳厚煏煏閣甜粅粅的雞酒佮油飯燒氣衝 kah 規个街市，彼是「七娘媽生」的日子，路過 ê 擔位濟濟七彩 ê 金紙「床母衣」，或者叫「婆姊衣」，欲予爸母買轉去，「拜床母」保庇厝內猶未成年 ê 囡仔好育飼。

燻臘肉佮「燒腸」ê 鹹芳「經月不散」，彼就表示tih欲過年矣，賣食品 ê 擔位各種年節糕仔餅佮粿 mā 那排那濟，除了基本款 ê 「菜頭粿」、「發粿」、「包仔粿」、「糕仔」這款米製品，在地味十足 ê 八寶芋泥、糟餅 mā 袂落勾去。

除了頭前講著 ê 食品，另外像元宵、清明、中元、中秋、重陽 mā 攏是傳統市場 ê 大日，攤商毋但著加款貨緊鋪排，聽候人客來「款拜」，市場本身 mā 會佇幾个大日聯合祭拜，其中上大型--ê 毋免講自然是舊曆七月 ê 中元普度。

中元普度了後 hiah-nī 濟食材欲按怎處理咧？除了豬公現場切離離，各主一份領轉去，其他供品就 ài 靠總舖 ê 手路，kā 變做 eng 暗「福宴」一路一路 ê 菜色矣。辦桌上蓋頭疼--ê 就是人佮桌，che 就號做「按聲」，市場內 ê 攤商敢會𤆬翁𤆬某𤆬囝來？會當𤆬幾个？若搪著選舉年，政治人物齊齊來行跤到，一个都無落勾，主桌佮來賓桌 ê 人數攏著注心，「按聲」是 chiâⁿ 倚靠現有 ê 資訊佮經驗 ê 功夫。

你若佮主辦對過按算 ê 來賓人數，對方確定無問題了後，通常會應你一句「無問題，阮有按聲矣」台語無蓋熟 ê 朋友可能會疑問，che 佮「聲音」有啥關係咧？其實台語內底「聲」字 mā 有數量 ê 意思，比論講頭前提起 ê 「按聲」其實就是 kā 「按算」佮「桌聲」敆做伙，曷若「桌聲」就是有幾塊桌 ê 意思，當然，知影桌聲，就通仔算出聽好坐偌濟人矣。

「按聲」除了提來算「桌聲」，當然 mā 通算其他事物 ê 數量，像講「額聲」就是份額，「件聲」，就是幾件，「斤聲」是指重量，「股聲」是股份偌濟，曷若「錢聲」雖然提來講點票仔機算票仔 ê 聲 mā 無毋著，koh 較捷用是指錢額偌濟；「水聲」除了水 ê 聲音，taⁿ 華語時行講一篇文章、一支影片、一个節目內容無夠實櫼、無夠實腹，是「灌水」或者「水分太高」，其實台語內底早早就有這款講法，舉例來講，你敢有感覺著這篇Bonus「水聲傷濟」矣？


--
Music by Audionautix.com
SoundEffects by Freesound
--
【社群揣我】
Facebook>>> https://atlantistalk.pse.is/8828cq
Instagram>>>https://atlantistalk.pse.is/8828cc
--
小額贊助支持本節目： https://atlantistalk.pse.is/882892
留言告訴我你對這一集的想法：https://atlantistalk.pse.is/88289q

Powered by Firstory Hosting