ԹատրON

Կյանքը չունի ուրիշ լուծում, բացի այն ուղղակի ապրելուց:

Այս էպիզոդում կխոսեմ բեմադրիչ Սամսոն Մովսեսյանի «Օսկարը և վարդագույն տիկինը» ներկայացման մասին։ Կպատմեմ՝ ինչու ռեժիսորը որոշեց ներկայացումը բեմադրել կամերային ոճով, արդյոք հեշտ է խաղալ, երբ հանդիսատեսն այդքան մոտ է, ովքեր են դերակատարները, ինչ դժվարություններ են ունեցել փորձերի ժամանակ և ոչ միայն։

Այս էպիզոդում պատմում եմ Նարինե Գրիգորյանի «Գոմեշը» մոնոներկայացման մասին։ Ինչու դերասանուհին ընտրեց Հրանտ Մաթևոսյանի հենց այս գործը, արդյոք դերասանի համար բարդ է կենդանի խաղալը, ինչպես ծնվեց մոնոներկայացման գաղափարը, ինչ էքսպերիմենտներ արեց դերասանուհին կերպարի հետ և ոչ միայն։

Ասում են՝ տարին ինչպես սկսես, այնպես էլ այն կշարունակվի։ Դե ուրեմն եկեք սկսենք  Թատրոնով ու Սերով: Այո, ճիշտ լսեցիք, Սերով։

Թատրոն Տանիքի նոր ներկայացումն ամենագեղեցիկ, ամենառոմանտիկ ու ամենաբարդ զգացմունքի մասին է։ 

«Սեր» ներկայացումը պատմում է 90-ականներին հանդիպած ու սիրահարված զույգի մասին։ Պիեսի հեղինակ և ռեժիսոր Սուրեն Սաֆարյանը որոշեց «Սերը» բարձրացնել տանիք և հանդիսատեսին տեղափոխել  մութ ու ցուրտ տարիներ։

Երեխաների համար Ամանորը սկսվում է թատրոնից։ Այո, մի զարմացեք։ Ամանորյա ներկայացումներից է սկսվում հեքիաթը, որովհետև նրանք թատրոնում են առաջին անգամ հանդիպում Ձմեռ պապին ու Ձյունանուշին։ Պատմում  են նրանց իրենց երազանքների, ցանկությունների մասին և, ամենակարևորը, տալիս են  նամակն ու սպասում նվերի։  Սա է պատճառը, որ թատրոններում ամիսներ առաջ  են սկսում  պատրաստվել ամանորյա ներկայացումներին։ 

Դե ինչ, պատմեմ, թե ի՞նչ ներկայացումներ կարող եք դիտել, Ձեր փոքրիկների հետ, մինչև հունվարի 13ը։

Երևանյան թատրոններն արդեն պատրաստել են իրենց ամանորյա ներկայացումները։ Ձեզ մնում է միայն ընտրել թատրոնը և գնել տոմս։ Բայց, որպեսզի այս խառը օրերին ընտրելու համար շատ ժամանակ չկորցնեք, առանձնացրել եմ այն ներկայացումները, որոնք նախատեսված են մեծահասակների համար։

Արդյո՞ք եղել եք Սունդուկյան թատրոնի ձեղնահարկում։ Եթե մտածեցիք՝ սա ի՞նչ աբսուրդ հարց է, ինչու պետք է գնանք ձեղնահարկ դահլիճի փոխարեն, ասեմ՝ որովհետև Երևանի ամենատարբերվող և ամենաաբսուրդ Գոյ թատրոնը հենց այնտեղ է։

Դե ինչ, այսօր կխոսեմ Գոյ թատրոնի մասին։ Կպատմեմ ինչպես ձեղնահարկը դարձավ թատրոն և կոչվեց լաբորատորիա, ինչու սկսեցին բեմադրել աբսուրդ ժանրի գործեր, ովքեր են այսօր ստեղծագործում թատրոնում, ինչ ներկայացումներ կան խաղացանկում և ոչ միայն։

Այս էպիզոդում պատմում եմ Փոքր թատրոնի և «Գույներ» նոր ներկայացման մասին։ Ինչպե՞ս ստացվեց, որ նույն հարթակում հայտնվեցին տարբեր մասնագիտություն ունեցող մարդիկ։ Ի՞նչ է ներկայացման ստեղծագործական ընթացքի բաց դիտումը, ե՞րբ է նախատեսվում պրեմիերան և ոչ միայն։

Այս էպիզոդում պատմում եմ բալետի և նոր ներկայացման մասին։ Ինչու՞ Հին աստվածներ անունը փոխվեց և դարձավ Ձգողականություն, ինչու՞ է սա համարվում համաշխարհային պրեմիերա, ո՞ վ է կոմպոզիտորը և ոչ միայն։

Եթե հաճախ եք լինում Սասունցի Դավիթ կայարանում, ուրեմն տեսած կլինեք կուլտուրայի պալատի դիմաց դրված թատերական պոստառները կամ գոնե նկատած կլինեք մարդկանց, ովքեր բարձր խոսելով շտապում են, դեպի, նորաբաց թատրոն Կայարան։

Դե ինչ, այս էպիզոդում կխոսեմ նորաստեղծ թատրոն Կայարանի, ամենագունեղ, երաժշտական Անահիտ ներկայացման մասին։ Ինչպես նաև կպատմեմ, ինչու՞ կուլտուրայի պալատը  դարձավ թատրոն, ովքե՞ր են  հիմնադիրները և թատրոնի դերասանները, ի՞ նչ ներկայացումներ կան խաղացանկում և ոչ միայն։

Թատրոն կարելի է ստեղծել ամենուր և դրա համար շատ բան հարկավոր չէ։ Շուշիից Երևան տեղափոխված թատերախումբը շարունակում է ստեղծագործել։ Թատրոն անիվների վրա. այսպես են անվանել իրենց թատրոնը, հուսալով, որ այդ անիվները մի օր կտանեն Շուշի։ Իսկ հիմա նրանք շրջում են քաղաքից քաղաք, գյուղից գյուղ ու ներկայացնում Հովհաննես Թումանյանի «Մի կաթիլ մեղր» բալլադի հիման վրա բեմադրած ստվերների ներկայացումը։

Դե ինչ, այսօր կխոսեմ Շուշիի թատերախմբի և ստվերների թատրոնի մասին։ Կպատմեմ նոր ներկայացման, «Ստվերախաղք» փառատոնին մասնակցելու ու լավագույն ներկայացում անվանակարգում հաղթելու մասին և ոչ միայն։