Nan fè jouda sou rezo yo semèn sa, Lhee tonbe sou yon ti rechèch ki di anpil gason kap viv nan zòn Boston jije ke depi yo mennen yon Lady soti yo atann yo ke fi a pral oubyen ta dwe kouche avèk yo.

Rechèch sa pouse timesye Tchilaks yo gade zafè ki rele “first date “ la nan kilti pa nou an. Pandan yap pale de pwòp eksperyans yo, yap analize atant yon gason genyen lè li mennen yon fi soti pou premye fwa.

Anpil koze pale so ENJOY!

Nan kilti nou yo itilize tèm « GWÒG » la nan 2 konotasyon diferan. Youn pou dezinye bwason ki gen gwo to alkòl epi lòt la pou dezinye lè ou bwè twòp.

Nan epizòd sa, Johalex, Lhee ak LEX pataje gwòg prefere yo men SITOU pi gwo moman nan lavi yo kote yo te GWÒG.

Enjoy epi sonje pou ou TOUJOU bwè GWÒG ou ak moderasyon paske se mèt kò ki veye kò!

Epizòd 29 la se yon epizòd kote Johalex ak Lhee ap debat sou yon sitiyasyon kote yon gason tap bay madanm li yon pil ak yon pakèt manti initil. Sitiyasyon sila a tap fè ravaj sou tiktòk.

Li se yon istwa ki enteresan lè nou ap eseye konprann rezon ki te motive misye envante E bay manti sa yo, men tou jan dam lan rakonte istwa a jwe yon gwo wòl nan bote istwa a.

Enjoy reyaksyon ak opinyon ti mesye yo sou istwa a!

Moun fè sèks pou anpil rezon. Youn nan rezon sa yo e petèt sa ki pi enpòtan an: se LANMOU.

An efè, sèks se iltim fason 2 moun konn manifeste lanmou yo men entèpretasyon sèks varye de yon moun a yon lòt. Gen pou de moun li se yon senp zak fizik, genyen ki trouve li trè sakre. Sèl bagay ki evidan se ke pi fò moun dakò ke li bon anpil.

Lè nap gade relasyon ant de moun, kijan nou ka mezire enpòtans sèks?

Eben ti mesye yo ak Lex fè yon ti bat bouch sou sa nan epizòd 28 la.

Enjoy enjoy epi pa bliye: 1 korentyen 7 vese 4 -5.

Bolèt gen yon plas enpòtan nan kilti ayisyèn nan. Menm si bolèt la an swa se jis yon jwèt aza; lòt aspè ki antoure li yo, jan ayisyen konprann li a ka ede yon moun dekòtike kilti nou an fen e byen. Nou menm ayisyen nou konekte bolèt ak anpil bagay e pou nou li pa yon senp jwèt aza.

Nan epizòd 27 la, nou ap pale de tout bagay ki antoure bolèt la ak yon envite espesyal ki se Papi Constant. Li leve jwenn papa li kap jwe bòlèt, li jwe bòlèt e li te menm travay nan sektè a, kidonk eksperyans li sa yo pral ouvè je nou sou anpil bagay pandan lap rakonte istwa li.

Enjoy

Devlopman entènèt nan dènye ane yo kreye anpil opòtinite ak avantaj pou biznis men anpil aspè rete flou sou transfòmasyon digital yon biznis e kijan pou optimize’l.

Nan epizòd 26 la, Jerry Louis-Jeune ki se yon ekspè nan domèn digital la ap ede nou konprann kisa ki vrè definisyon biznis dijital, kisa li mande pou mete youn sou pye e kijan ou ka fèl ede mete biznis la sou chimen siksè.

Kesyon sa yo ak anpil lòt ap jwenn repons nan epizòd la.

Gen anpil pou aprann kidonk KOUTE  JISKOBOU!

Enjoy 😊

Job lapolis nan tout peyi se proteje ak sèvi, men souvan, rankont avèk lapolis pa konn fini byen. Nan dènye ane sa yo, altèkasyon oubyen fatalite ki konn soti nan rankont avèk lapolis toujou okipe yon plas enpòtan nan nouvèl.

Nan epizòd jodia te timesyeu yo pral rakonte tout eksperyans ke yo fè avèk lapolis jiska jounen jodia. Epizòd la ap yon jan spesyal paske se istwa pèsonèl yo kote ke yo te ka pran kòd e menm ka rive gache avni yo. Yo espere ke nou menm kap tande ava jije eksperyans yo fè yo men tou ap kapab tire leson ki ka ede nou menm oubyen yon pwòch nou eppdownDospi devan.

Enjoy 😊

« Fè MIZIK » ka ilistre yon moun ki ap tande mizik, yon moun ki ap jwe yon enstriman oubyen ap chante; anpil fwa nou pa mete moun ki ap ekri tèks mizik yo nan lis la.

Nan epizòd 24 la, Tchilaks podcast te gen lonè akeyi Guerby ki se yon jèn talan ki, pou kounya, plis fokis sou produi mizik, ekri bèl tèks ak melodi. Li te pase tchilaks avèk ti mesyeu yo epi yo te tou profite debat sou pakou li, eksperyans li ak projè li genyen ki pi pwòch yo.

Si ou pat ko konnen li, fè konesans avèk li a travè epizòd sa e si ou te konnen li deja, vin aprann yon tikal plis de li.

ENJOY!

12 Janvye 2010 - 12 janvye 2024

Sa gentan fè 14 lane depi yon tranblemanntè te fè gwo dega an Ayiti.

Jou sa kite yon sikatris lakay chak moun ki te viv katastwòf sa de prè ou de lwen.

Nan epizòd jodia ti mesye yo ap fè yon retounen sou jou sa e kijan yo te viv li.

Tchilaks ap salye memwa tout sila yo ki ale yo ak kouraj sila yo ki jwenn fòs avanse malgre jan katastwòf sa te afekte yo.

12 Janvye 2010: NOU TE LA, NOU TE WÈ e NOU PAP JANM BLIYE!

Nouvèl an se toujou yon chans pou rekòmanse, yon okazyon pou chak moun pou yo remete fokis sou objektif yo genyen pou ane a oubyen pou rès lavi yo. Se sak fè depi premye Janvye rive, anpil rezolisyon toujou pran.

Malerezaman statistik yo montre ke anpil nan rezolisyon sa yo pa janm depase mwa Janvye a e ke se sèlman 9% moun ki arive kenbe rezolisyon yo te pran yo pandan tout ane a.

Nan epizòd 22 a, ki se premye epizòd Tchilaks pibliye pou nouvèl ane 2024 la, ti mesye yo panche sou tèm rezolisyon an, egzèsis pran rezolisyon an, ki enpotans li, kisak fè anpil pa dire e kijan yon moun ka korije sa.

Enjoy life epi pa bliye li enpòtan pou ou fè egzèsis sa pou avansman ak devlopman pèsonèl ou!

BÒN ANE 2024 a tout fidèl oditè TCHILAKS PODCAST e a tout moun ki sipòte e ede nou nan yon fason oubyen yon lòt.

P.S. Premye moun ki li tout tèks sa epi voye #mwenlil nan DM Tchilaks la sou IG avan epizòd 23 a record ap jwenn yon kado nan men #Lhee.