Dómsmálaráðherra tilkynnti allskonar á mánudagsmorgunn, þegar hún blés til blaðamannafundar á Litla Hrauni. Þar stendur mikið til, eins og fjallað var um í þætti gærdagsins. En svo á líka að bregðast við slæmri stöðu kvenna í fangelsum með því að fjölga úrræðum á Sogni. Sunna Valgerðardóttir skoðaði stöðu kvenfanga í landinu og hverju stendur til að breyta.

Fangelsið við Eyrarbakka, Litla Hraun, er löngu orðið barn síns tíma. Letigarðurinn var upphaflega hugsaður sem geymslurými fyrir slæpingja, þegar ákveðið var að breyta byggingunum úr sjúkrahúsi í fangelsi. Það var fyrir hundrað árum. Dómsmálaráðherrann Guðrún Hafsteinsdóttir tilkynnti í gær að það ætti að byggja þarna nýtt fangelsi og framkvæmdir hefjast strax. Sunna Valgerðardóttir fjallar um Litla Hraun í fortíð, nútíð og framtíð.

Í dag förum við til Þýskalands, út í skóglendi Berlínarborgar, þar sem knattspyrnuliðið Union Berlín hefur aðsetur.

Þú þarft ekki að vera sérfræðingur í íþróttinni til að hrífast af þessari sögu. Þú þarft ekki einu sinni að hafa áhuga á fótbolta.

Við ætlum að heyra sögu af frekar glötuðu liði sem ekki alls fyrir löngu strögglaði í fjórðu deild þýska boltans en tekur nú þátt í toppbaráttu í Bundesligunni og er komið alla leið í Meistaradeildina. Einar Örn Jónsson íþróttafréttamaður segir okkur frá Union Berlin.

Garðyrkjubændur í áfalli, er fyrirsögn fréttar í nýjasta tölublaði Bændablaðsins. Á meðan kornræktendur og riðurannsakendur fá meiri pening, skerðast framlög til garðyrkjunnar. Sunna Valgerðardóttir skellir sér í landbúnaðargallann í þætti dagsins og skoðar blóm, peninga, grænmeti, kindur og korn.

Kristján Loftsson hefur unnið við hvalveiðar í 67 ár. Pabbi hans stofnaði fyrirtækið sem veiðir hvali, Hval hf. skömmu eftir síðari heimsstyrjöld og Kristján tók við ríflega þrítugur. Hann er líklega einn umdeildasti Íslendingurinn, en mikils metnir hvalavinir hafa í gegn um tíðina borið honum vel söguna og talað um hann af virðingu. Þetta helst skoðar í dag manninn sem veiðir hvalina.

Í þætti dagsins af Þetta helst förum við til Úganda, á litla eyju í Viktoríuvatni þar sem hinn ungi en ástríðufulli vísindamaður Fróði Guðmundur Jónsson dvelur ásamt 50 simpönsum. Aparnir eiga það sameiginlegt að hafa verið bjargað úr erfiðum aðstæðum og dvelja nú á svokölluðu verndarsvæði.

Fróði hefur ferðast alla þessa leið til þess rannsaka mikilvæga en vanmetna eiginleika í fari apanna. Forvitni og spunahegðun.

Skýrsla Ríkisendurskoðunar varpar enn skýrara ljósi á erfiðar starfsaðstæður innan Sinfóníuhljómsveit Íslands. Auk þeirra mála sem ratað hafa í fjölmiðla, ber þá hæst að nefna ásakanir um kynferðisbrot, virðist vinnustaðarmenningin ekki sú besta. Þá komu fram upplifanir um vanvirðingu, einelti, ofbeldi og kynþáttafordóma sem taka verður alvarlega, segir Ríkisendurskoðun. Sunna Valgerðardóttir skoðar hina hliðina á Sinfóníuhljómsveit Íslands í þætti dagsins.

Erum við ein í alheiminum? Þessi risastóra spurning var á dagskránni í síðustu viku, annars vegar á mexíkanska þinginu og hins vegar í höfuðstöðvum NASA. Mexíkanska þingið ræddi hvort þau ættu að vera fyrsta landið í heiminum til að staðfesta tilvist geimvera og Bandaríska geimvísindastofnunin mætti síðar sama dag með geimverugögn, sem reyndust svo ekki nægileg. Sunna Valgerðardóttir reynir að draga fram svör og vangaveltur sem komu fram 14. september í þætti dagsins.

Ýmsir lausir endar eru hnýttir í þessum lokaþætti, í bili, seríu Þóru Tómasdóttur um málverkafalsanir. Vangaveltur um hverjir falsaranir voru, nöfn fleiri leikmanna koma fram og sögur, gamlar og nýjar, góðar og slæmar, fá pláss. Sunna Valgerðardóttir sér um samsetningu og ræðir við Þóru um það sem stendur út af og af hverju Stóra málverkafölsunarmálið er réttnefni.

Forvörður Listasafns Íslands segir Gallerí Borg hafa selt fölsuð verk í stjórnartíð Úlfars Þormóðssonar. Þóra Tómasdóttir hitti á Úlfar á kaffihúsi í miðbæ Reykjavíkur snemma morguns, sem segir þetta allt saman skröksögur menningarelítunnar. Þóra heldur áfram umfjöllun sinni um málverkafalsanir í Þetta helst í þessum fjórða þætti í röðinni. Sunna Valgerðardóttir sér um samsetningu.