Íslandsdeild Amnesty International hefur ýtt úr vör árlegu herferðinni, Þitt nafn bjargar lífi, en í ár eru tekin fyrir tíu mál þolenda mannréttindabrota og við fengum að heyra sögur tveggja þeirra í þættinum í dag. Mál Wendy Galarza frá Mexíkó sem heimsótti Ísland í lok nóvember og tók þátt í málþingi og mál Mikita Zalatarou frá Hvíta-Rússlandi sem er aðeins 17 ára gamall en hann var dæmdur til 5 ára fangavistar. Til þess að segja okkur sögur þeirra og frá herferðinni komu í þáttinn Anna Lúðvíksdóttir og Bryndís Bjarnadóttir frá Íslandsdeild Amnesty Inernational.

Kristín Einarsdóttir, okkar kona á Ströndum, hitti á dögunum deildarstjóra Tónskóla Hólmavíkur Braga Þór Valsson og tvo nemendur og kórfélaga, þær Kolfinnu Visu Aspar Eiríksdóttur og Ísafold Lilju Óskarsdóttur. Kórinn sem Bragi stjórnar tók nýlega upp lagið Jólin koma sem er eftir Braga og við heyrðum hvað stúlkunum finnst um söng og Bragi sagði frá kórstarfinu.

Við veltum fyrir okkur áhrifum ljóss og birtu á okkur í hýbýlum og hvað við getum gert til að skapa vellíðan heima með hjálp lýsingar. Gluggar, stærð, staðsetning og dýpt rýma í íbúðum hafa mikil áhrif. Ásta Logadóttir er doktor í verkfræði og formaður ljóstæknifélagsins, hún kom í þáttinn í dag og fræddi okkur um lýsingu.

UMSJÓN GUÐRÚUNNARSDÓTTIR OG GUNNAR HANSSON