Það vakti athygli þegar leikkonan Edda Björg Eyjólfsdóttir saumaði sér 19.aldar upphlut og leyfði fólki að fylgjast með á samfélagsmiðlunum. Heimilisiðnaðarfélagið stendur fyrir ýmsum námskeiðum og kennslu í þeirri viðleitni að passa upp þennan mikilvæga menningararf okkar. Svo eru eflaust einhverjir sem eiga sér þann leynda draum að kunna að dansa íslensku þjóðdansana, þeir sjást sjaldan nú til dags. Þeir virðast einfaldir, en eru þeir það? Á morgun er 1.desember, fullveldisdagurinn, þá verður Heimilisiðnaðarfélagið einmitt með kynningu á íslensku þjóðbúningunum og handverki þeim tengdum og einnig verður gestum boðið uppí dans af félögum úr Þjóðdansafélagi Reykjavíkur. Kristín Vala Breiðfjörð, formaður og framkvæmdastjóri Heimilisiðnaðarfélagsins kom í viðtal í dag uppábúin í 20.aldar upphlut.

Við heyrðum af fjölskyldu frá Vopnafirði sem hefur í nóvembermánuði farið samanlagt 500 kílómetra í minningargöngu til að safna áheitum til styrktar heilsugæslunni á Vopnafirði. Við hringdum í Bjart Aðalbjörnsson á Vopnafirði, en þetta söfnunarátak hefur fjölskylda hans ráðist í til minningar um móður hans, Öddu Tryggvadóttur. Bjartur sagði okkur betur frá þessari fjölskyldusöfnun í dag en áheitunum og frjálsum framlögum er safnað á reikning 0178-15-380138 og kennitölu 1300355-4989.

Svo að lokum fengum við heimsókn frá Soffíu Elínu Sigurðardóttur og Paolu Cardenas, en þær eru klínískir barnasálfræðingar. Þær hafa skrifað saman bækur fyrir börn sem eru hugsaðar sem snemmtækt inngrip í líf barna með því að kena þeim sálfræðilegar aðferðir til þess að efla sjálfsþekkingu, bjargráð og seiglu svo þau þrói ekki með sér alvarlegri vandkvæði seinna meir. Þær sögðu okkur frá bókunum og því sem þær kenna börnum í þættinum í dag.

Tónlist í þættinum í dag:

Allir eru að gera það / Ríó tríó (Silverstein og Jónas Friðrik Guðnason)

Gott er að gefa / Rúnar Júlíusson (Rúnar Júlíusson)

Sunnyroad / Emiliana Torrini (Emilíana Torrini og Dan Carey)

Barn / Ragnar Bjarnason (Ragnar Bjarnason og Steinn Steinarr)

UMSJÓN: GUNNAR HANSSON OG GUÐRÚN GUNNARSDÓTTIR