Jólin eru allskonar hjá fólki og ekki allir sem vilja þennan hefðbundna mat eða gömlu góðu smákökurnar. Við töluðum um Vegan smákökubakstur fyrir jólin í síðustu viku. Í dag beindum við sjónum að þeim sem eru á ketó eða lágkolvetnamataræðinu og hún Þorbjörg Hafsteinsdóttir næringarþerapisti kom í þáttinn.

Ari Bragi Kárason trompetleikari og Kjartan Valdermasson, píanóleikari, hafa spilað saman við ótal tækifæri, haldið tónleika, komið fram í einkasamkvæmum, leikið saman með Stórsveit Reykjavíku og fleira. En nú á tímum faraldursins og samkomubanns þá hefur nánast allt tónleikahald fallið niður og tónlistarfólk hefur leitað annarra leiða til að koma list sinni á framfæri og til þess að afla sér tekna. Þeir Ari og Kjartan fengu þá sniðugu hugmynd að bjóða fólki sem vill gleðja vini, fjölskyldu, nágranna, vinnufélaga, eða bara hvern sem er, uppá þann möguleika að senda þeim tónlistaratriði, eða öllu heldur að gefa þeim lag. Þeir komu í þáttinn og sögðu okkur frá þessu skemmtilega framtaki og spiluðu stutta jólasyrpu í anddyrinu hér í Efstaleiti.

Grýla er ein þekktasta íslenska þjóðsagnaveran og sú sem flest börn þekkja og mörg þeirra hræðast. Kristín Einarsdóttir, okkar kona á Ströndum, fann í safni Ólafs Davíðssonar, Íslenskar gátur, skemmtanir, vikivaka og þulur, löng kvæði um Grýlu, og leitaðist við að gera ævi hennar skil útfrá kvæðunum.

UMSJÓN GUNNAR HANSSON OG GUÐRÚN GUNNARSDÓTTIR