Todos os podcast | A penaltis

Entrevista a Diego Mas, codirector de Cinema por mulleres. Esta segunda edición do certame celébrase do 22 de febreiro ao 9 de marzo na Coruña.

"Ninguén fala de Luísa Villalta como teórica da literatura. Ela moveu os marcos”. O escritor e músico Xurxo Souto reivindica o método Luísa Villalta e reúne no volume 'Somos un pobo de artistas', un conxunto de ensaios e artigos que subliñan a unidade entre a música e a poesía.

Unha nova xeración de comunicadoras conquista Youtubeiras. Conversamos con tres dos gañadores desta sétima edición do certame que recoñece o contido en galego en redes: OU Ké!, premio Canle, xornalismo político para redes desde Ourense; O Faiado Podcast, premio Revelación, cultura pop e vida cotiá; e Recuncho Gamer, premio Youtubeira, videoxogos e moito máis.

Mario César Vila avánzanos a nova edición do Encontro Arqueolóxico do Barbanza, que se desenvolve en Boiro os días 24 e 25 de febreiro. Un foro de divulgación arqueolóxica que acollerá expertos do ámbito galego, estatal e internacional.

Emilio Españadero tráenos a Fuxan os ventos co gallo do pasamento estes días do padre Mato e mailo cabodano de Moncho Díaz. Tamén a Carapaus coa Alborada pra Rosalía, no mes de nacemento da nosa autora máis senlleira.

E dúas citas a marcar no calendario deste mes: concerto de Xosé Manuel Budiño na Coruña e disco novo de Isidro Vidal.

Do Perú á Coruña. Pamela Rodríguez preséntanos 'Meigas', o seu primeiro disco galego. O traballo inclúe versos de Rosalía e colaboracións de Guadi Galego e Iván Ferreiro. O disco ten bases electrónicas e letras que reivindican a liberdade, o erotismo e a madurez. Pamela Rodríguez presenta o disco no Riquela Club de Santiago o vindeiro venres 23 de febreiro.

Na sección de voces expertas, Eva Mejuto desafíanos a un reto lector. Descubrimos ideas para os primeiros meses do #retolibroscontos.

"A danza neste momento necesita un plan integral para saír adiante”. Branca Novoneyra é unha das organizadoras do ciclo 'Lecturas que danzan' que relaciona, na Biblioteca Ánxel Casal, as artes do movemento coa saúde, a filosofía ou o activismo.

Afonso Becerra achéganos a peza ´Anda, Diana`, da coreógrafa e bailarina lusa Diana Niepce, en cadeira de rodas dende hai dez anos.

A artista protagoniza unha danza na que dous bailaríns a van movendo sobre o escenarioi.

Náufragos Teatro estrea 'Noso', unha “dramedia” que no marco das mobilizacións contra os parques eólicos no rural explora as relacións familiares e os vínculos co territorio.