Rimos hoxe das mesmas cousas que hai 40 anos? Qué pasa coas redes sociais e o humor? Na véspera do Día Mundial do Chiste, conversamos co humorista Pablo Meixe, que fai rir coas súas expresións faciais tanto nas súas actuacións en directo como nos reels que crea. Fala das posibilidades que abriron as redes sociais ós humoristas, da improvisación, do humor branco, de facer humor sen ferir e dos seus referentes. En Talento Galego descubrimos a Miguel Barcia, un director de videoclips que fixo traballos para o galego West Srk, pero tamén para músicos de fora de Galicia como Yassir ou Sinde. Asegura este comunicador visual que un videoclip ten que causar emoción e conexión co espectador; tamén resulta fundamental a coherencia entre as imaxes e a mensaxe da canción. Abrimos a sección "A botica de Iago" resolvendo dúbidas sobre os protectores solares. O farmacéutico Iago Regueira explica que é o factor de proteccion, as diferencias entre protectores físicos e químicos e cando se pode utilizar un produto do ano anterior. Este experto insiste en que tódalas persoas debemos usar protección solar ó longo do ano, tamén nos días nubrados, con especial atención ós máis pequenos. Coñecemos máis sobre o fútbol gaélico, deporte que se xoga principalmenbte en Irlanda, con Juan Luís Fernández Pérez, doutor en Ciencias do Deporte, adestrador do equipo Turonia de Gondomar e autor do libro "Futebol gaélico. Historia, regras, tácticas de xogo e técnicas de adestramento".

Por qué continúa esixindo unha diferencia tan marcada de roupa polo xénero? Aínda hai moita xente que amosa sorpresa cando ve determinadas modas de vestir? Víctor Manuel Oujo, asesor de imaxe e influencer coñecido como Vimanstyle, asegura que falta a implicación da industria téxtil e que a xente nova se arrisque máis coa roupa. Este asesor é partidario das prendas clásicas e atemporais, sen atender a modas puntuais; tamén de seguir os códigos de vestimenta en determinadas cerimonias. Chega o verán e multiplícanse os riscos de saúde para as mascotas. Marcos Fernández, veterinario de AniCura Navia Hospital Veterinario, en Vigo, explica cómo previr, cómo detectar e cómo responder ante un golpe de calor nos cans, un problema que pode derivar en morte na metade dos casos. Este experto en animais de compañía tamén lanza recomendacións para evitar picaduras de pulgas, garrapatas e dos mosquitos que transmiten a Leishmaniasis. José Tomé Roca, alcalde de Monforte de Lemos, adiántanos a oferta da quinta edición do Festival do Viño da Ribeira Sacra, entre o 3 o 5 de xullo: dende catas e clases maxistrais ata postos de gastronomía, música e actividades para os máis pequenos. Conversamos con Julio Alonso, profesor no Conservatorio Superior de Música de Galicia, sobre a muiñeira e a súa evolución ata converterse nun símbolo identitario de Galicia; un estudo que recolle no seu libro "Do baile da gaita á muiñeira", publicado por Editorial Galaxia.

Comezamos a tempada de verán con novas seccións. Javier Barba vainos falar de gastronomía no espazo "Enchendo o bandullo con coitelo e forquita". Para abrir o apetito traenos un dos pratos senlleiros da cociña galega, o polbo. Manuel Rial achegaranos o patrimonio do pais. Para principiar lévanos ao castelo de Vimianzo. Moncho Lemos lembraranos as cancións do verán e recuperamos a sección "Talento galego" coñecendo o grupo de post hardcore Acouga. Ademais neste programa Clay Cornejo, do estudo Etham Clay, ensínanos como se fan os piercings e dinos cales son os máis demandados. O catedrático de Ciencias da Educación e o Deporte, Carlos Lago, fálanos do modelo informático creado na Universidade de Vigo para analizar o rendemento dos equipos que participan no Mundial de fútbol. Coñecemos como é o traballo dun localizador de exteriores conversando con Daniel Villalba. O músico Anxo Pintos convídanos ao Encordass Fiddle Fest, que se vai desenvolver na illa de San Simón e que está dedicado este ano a Escocia. O responsable de Innovación do Centro Tecnolóxico da Innovación de Galicia, Ángel Dacal, preséntanos a Viriato, o robot humanoide ao que están adestrando para facer tarefas nocivas ou perigosas para os humanos. José Ángel Docobo, catedrático de astronomía na USC fálanos da primeira astrónoma galega, a ourensá Antonia Ferrín Moreiras.

Manuel Rial vainos falar de patrimonio os luns pola tarde. Hoxe apréndemos moitas cousas do castelo de Vimianzo

Aumenta o número de rapaces e mozos que reciben clases particulares. No curso 23-24 os españois gastaron 2.800 millóns de euros en axudar ós fillos a levantar as notas e evitar suspensos. Son necesarias as pasantías? Raquel Hermida, da academia A Mariña de Burela, argumenta que as familias non teñen tempo para axudar ós rapaces e, ademais, queren nenos máis preparados de cara o futuro. Hermida comenta que tamén hai clases de reforzo durante o verán en distintas materias co fin de incrementar a preparación dos alumnos e a súa confianza para o próximo curso. Achegámonos á traxectoria da científica galega María Tarsi Carballas, falecida en maio. Con retazos de varias entrevistas, coñecemos a paixón desta investigadora nada en 1934, que foi referente internacional no estudo dos solos; as súas críticas á falta do coidado dos montes galegos; e tamén os seus consellos ás novas xeracións. En conversa co seu director, Antón Lopo, coñécemos as razóns polas que pecha a editorial Chan de Polvora e o balance que fai deste 10 anos publicando poesía. Un fin de ciclo que celebrará a editorial en Compostela, cun recital de 20 poetas e a presentación dun novo título de poesía LGTBI+. Este verán lanzarase ó espazo o telescopio Nancy Grace Roman, que suporá o inicio dunha nova era de observación do universo ó ter un campo de visión cen veces superior ó Hubble. O colaborador e astrónomo Borja Tosar adiántanos as potencialidades deste aparello para estudiar a enerxía escura e cazar tanto exoplanetas como novas galaxias.

Celebramos o Día da Xente do Mar falando cunha das 1.500 mariscadoras da Confraría de Noia. Mercedes Silva explícanos as razóns polas que elixiu dedicarse ó marisqueo a flote, para ela un traballo, unha tradición e un disfrute. Esta muller nova cóntanos cómo realizan esta actividade, cómo afrontan os anos de pouco marisco e tamén algunhas ideas equivocadas sobre este sector; experiencias que traslada co nome de Totakeki ás redes sociais, onde ten máis de 400.000 seguidores. A Unión Galega de Taxi, UGATAXI, acaba de crearse co obxetivo de dar un servizo de cobertura global en toda Galicia, tanto nas cidades como no rural. O seu vicepresidente, Juan Carlos Sambad, coméntanos cómo medra o número de asociados e as características da súa app, que facilita moito a mobilidade dos turistas e peregrinos que chegan á comunidade. A primeira fin de semana de xullo celebrarase a trixésimo terceira edición da Festa do Pan de Cea, adicada a maridar este alimento cos produtos do mar. O presidente do Consello Regulador da IXP Pan de Cea, Juan Luís Calviño, explica que o gran problema que afronta o pan de Cea é a falta de relevo xeracional para elaborar un produto totalmente artesanal, cocido en fornos de leña: pasaron de ser 23 panadeiros en 2003 a só 12 na actualidade, o que se traduce en dificultades para atender a demanda crecente deste pan tan especial.

Con Tito Lesende repasamos a evolución e o cartel da 21 edición do Resurrection Fest, figuras e estilos de rock que se escoitarán en Vivieiro dende o día 1 ó 4 de xullo.

Estamos de resaca trala festa de San Xoan, polo que lle pedimos ao noso boticario de confianza, Iago Regueira, que nos recomende algúns remedios para levala mellor. Falamos con Alfonso Criado, químico da Universidade da Coruña que participa nun proxecto dirixido a desenvolver ferramentas capaces de identificar sinais tempranas da endometriose, unha enfermidade que sofre unha de cada dez mulleres. O profesor compostelán Jacobo Santoro preséntanos o seu libro "El superchute de Enzo". Facemos un rota no Courel polo río Lor con Guillermo Díaz para coñecer á antiga mina de ferro de Paradela. Acudimos a Tinta Vella, o refuxio creativo de Alex Guillén en Vigo, para tomar algo e descansar pintando. Marcos Vázquez, do Consello Regulador de Agricultura Ecolóxica de Galicia, explícanos como combater os fungos nos cultivos. Escoitamos "Bla, bla bla", o novo disco de Zenzar, a banda de Cerceda que canta en galego e ten xa 37 anos de vida. Ademais, Nusca Chousa proporciónanos os seus consellos para coida-la horta.

A normativa europea sobre os smartphones que entrará en vigor no 2027 vai provocar cambios importantes ou non? Abelardo Carvajales, técnico de móbiles de Phone Factory, expón que a batería, seguida da pantalla, é o principal problema dos móbiles e considera que case sempre compensa arranxala en lugar de comprar un aparello novo. Este técnico deíxanos algún consello para lograr que dure máis tempo. Falamos dun gasto moi importante na economía doméstica, a factura do gas e da luz, co secretario da Unión de Consumidores de Galicia. Miguel López asegura que os prezos se ven moi afectados pola guerra de Irán e pola vaga de calor. Este experto recomenda a Tarifa Regulada para o gas, pero aconsella acudir á comparadora da Comisión Nacional dos Mercados e da Competencia para analizar qué tarifa de electricidad nos interesa máis tendo en conta os nosos hábitos de consumo. Coñecemos cómo funciona un Punto Limpo Móbil no concello de Valga. O seu responsable, Joel Castro, explica que se recollen ata 14 tipos diferentes de refugallos e salienta que facilitar esta tarefa ós veciños supón un paso máis no coidado do medio ambiente. A colaboradora Mónica Maneiro preséntanos a mostra que se pode ver este verán na Fundación MOP, unha exposición sobre a fotografía de moda tan personal do italiano Paolo Roversi. Achegámonos ó traballo audiovisual realizado por 20 adolescentes do Milladoiro para cambiar a narrativa sobre este núcleo do concello de Ames en conversa cun dos participantes, Manuel Verde, e con Sonia Díaz, da asociación Agareso.

Coas altas temperaturas apetece levar un calzado fresco e moitas persoas apostan polas chanclas. Son saudables? Pódense levar sempre? A podóloga Sara Touceda explica que en praias e piscinas protexen os pes de infeccións e feridas, pero non se debe abusar. A falta de estabilidade e a escasa suxección deste calzado pode provocar tensións e mesmo patoloxías se hai un uso excesivo nos meses de verán. É o Día Mundial da Muller Sen Roupa Interior e María Luisa Ríos, que ven de xubilarse tras 44 anos na mercería Luisa de Santiago de Compostela, expón con qué prendas resulta mellor non levar roupa interior. Tamén nos comenta os diferentes tipos de tangas e bragas, o material máis axeitado para estas prendas e as recomendacións de lavado.

Conversamos na distancia con Esteban Batallán Cons, primeiro trompeta na Chicago Symphony Orchestra, recoñecido cunha das medallas Castelao 2026. Batallán cóntanos o seu día a día e a súa traxectoria dende que entrou, con 6 anos, na Escola de Música de Barro, animado polo seu pai. A colaboración entre a marca Pull&Bear e o Concello de Camariñas deu como resultado unha colección cápsula de roupa e complementos con encaixe de Camariñas, posta a venda o pasado venres. Dolores Lema, directora da mostra presentada en Madrid, cóntanos esa simbiose entre o liño e o encaixe e o seu obxetivo prioritario: achegar o traballo artesán á xuventude.

O Museo de Ciencias e Tecnoloxía da Coruña vai desenvolver dende xullo un programa especial de actividades arredor da eclipse total de sol que se poderá observar o próximo 12 de agosto e tamén as que se van producir en España nos anos 2027 e 2028. O director do MUNCYT, Fernando Luis Fontes, indica que se explicarán detalles sobre este fenómeno, cómo observalo sen risco, pero tamén se ofrecerá información xeral sobre o cosmos. A intención é crear interese pola astronomía e o universo. O noso colaborador Borja Tosar, astrónomo do Centro de Pena Trevinca, falános do solsticio de verán, das galaxias e a materia. Coñecemos a app NOES3, unha aplicación encamiñada a xestionar o estrés con pequenos retos diarios, un proxecto elixido entre 3.000 e que precisa de axuda para sair ó mercado. A súa creadora, a doutora en Psicoloxía Rita Louzán, fálanos dos factores do estrés e propón técnicas como o uso do temporizador ou a 4-7-8, utilizada polos marines dos EEUU para durmir. Achegámonos as distintas opcións que ofrece o mercado para manter fresa a vivenda durante a época de altas temperaturas. O técnico especialista Andrés Breijo cóntanos as alternativas, as vantaxes e e desvantaxes así como o custe de distintas alternativas, dende o os ventiladores ós sistemas de climatización.