Wat plaas jy op die altaar van aanvaarding, bekendheid, populisme, oorlewing, bevordering, vooruitgang, sukses en applous?

Verskonings het ons baie, maar dit maak geen hond haaraf as ons ander se kontekste in ag neem nie.

Kan jy dalk leer om die nuutste ongemaklikheid met “Ek is #Blessed” te begroet?

Kom ons neem onsself dit voor dat ons in hierdie jaar ʼn bietjie ruggraat gaan vorm, geestelike ruggraat. Laat die Heilige Gees toe om jou aan die hand te vat en soos die verlamde by die tempelpoort selfs na 40 jaar van verlamming weer op te trek. Vir die wat glo sal niks onmoontlik wees nie.

Waar is ons jongmense? Sal hulle asseblief opstaan. Die land het julle nodig. Laat die Koninkryk ook hier kom.

Joh. 17 is profeties relevant vir ons tyd. Die uitdagings is legio. Die Gees is in staat en is ons gewillig om deur God gebruik te word.

Daar heers kommer in die harte van baie mense oor die toekoms van ons mooi land. Dit is nie nou die tyd vir klein geloof en ophou droom nie. Ons het geloofspioniers nodig.

As ons dan georiënteer is met betrekking tot die nuwe jaar en ingekoop het op die gedagte dat ons hier is om ʼn verskil te maak in die lewens van mense - God se mense, alle mense - soek ons oë en luister ons ore om die hulpgeroep van mense raak te hoor.

Die vraag is wat en wie wil jy met jou die toekoms inneem? Jy hoef nie almal saam te nooi nie.

Kom ons help mekaar om iets van die oomblik, vandag en elke dag, te beleef.