Iingcali kwimozulu zimemelela ukuba kufundiswe uluntu ngokubanzi ukuze kubekho ukuqondwa kakuhle nokusabela ngokufanelekileyo kwizilumkiso zemozulu. Njengokuba imo yezulu eMzantsi Afrika iya itshintsha-tshintsha rhoqo, ezizilumkiso zibalulekile ukukhusela iimpilo zoluntu nokucutha umonakalo. Nangona kunjalo, imingeni isekhona kwiinkqubo zokusabela ngexesha nasekuthatheni amanyathelo. Lo ibi ngumba ebekugxilwe kuwo kwingxoxo ebingemo yezulu nokukhutshwa kwezilumkiso ngexesha, nebibanjwe ePitoli. Ukusabela banzi ngoku emnxebeni sibambe umphathi ophezulu kwinkonzo yemozulu yoMzantsi Afrika uMnikeli Ndabambi...

Ibhunga lokulilifa lesizwe nelilicandelo lesebe lezemidlalo, ubugcisa nenkcubeko, lixhasa umboniso wokuqala wothando lokutya kweMpuma Koloni nosindlekwa ngumbutho wezoshishino, i -Business Pledge Collaborators and Women of  Value Southern African, bebambisene nabanye abandakanyekayo.  Lo mboniso wokutya, iinjongo zawo kukubhiyozela indima yokutya ukubonakalisa inkcubeko nokukhuthaza imvisiswano yoluntu, ze iqaqambise indlela ukutya kweAfrika okungadala ngayo umanyano noxolo. Ukuva banzi ngalo mboniso emnxebeni ngoku sinaye umpheki u Andile Somdaka noyinxalenye yalo msitho...

Nanjengoko ifikelela esiphelweni inyanga yabantu abaphila nokhubazeko, abantu abaphila nokhubazeko bajongene nemingeni eliqela enjengongakwazi ukuzifumana ngokugqibeleleyo iinkonzo zikarhulumente, iindawo zokuzithuma nokuzicoca ezingamelaniyo nemeko kwakunye nokunqongophala kwezindlu. Uluntu oluphila nokhubazeko eMpuma Koloni, lutyhole urhulumente ngokusilela ukukhawulelana nezidingo zabo. Bakholelwa ekubeni ukusilela kwabasemagunyeni ukuqubisana neengxaki zabo, kunyhasha ilungelo labo lesidima. Ingxelo iza no Fundiswa Mhlekude...

: Iinkcukacha manani zolwaphulo mthetho zibonisa ukuba phakathi kwenyanga yeKhala (July) nenyanga yoMsintsi, bangaphezulu kwesithathu abantwana ababulawayo ngelithuba elishumi amanina athi abulawe eMzantsi Afrika ngosuku. Ingxelo egxile kuphando lokuqala olugxile kukuxhatshazwa ngokwesini, lubonisa ukuba amanina aneminyaka elishumi elinesibhozo nangaphezulu, bakhe bahlaselwa. I-arhente ejongene namalungelo abantwana iUNICEF, iinenkqubo ezijongene nabazali ukuzama ukwehlisa elinani. Yolanda Kambile uncokole nophuma kwiUNICEF eMzantsi Afrika, uLungile Mdluli .

Umbutho i-Mining Affected Communities United in Action, iMACUA ngamafuphi, imemelela ungenelelelo lohlangulo lwabombi mgodi abangekhomthethweni kumgodi ongasesetyenziswayo iStilfontein, eMntla Ntshona. Sele isisithuba seeveki ngoku amapolisa eqhuba nephulo lika-Operation Val'umgodi kula mmandla, kwaye bathi sele bengapha kwewaka abombi mgodi abaphume ngaphandle kulo mgodi. UAyabonga Kekana ubambe udliwano ndlebe nophuma kwiNational Administrator ye-MACUA, uSabelo Mnguni. 

Inkonzo yesipolisa eMzantsi Afrika ithi ngooZama-Zama abalishumi elinesine, kuquka inkwenkwana eneminyaka elishumi elinesine ubudala, abaphumele ngaphandle kwe-Shaft 10 ehambisana ne-Shaft 11 eeStilfontein kuMntla Ntshona phezolo. Amapolisa athi aba Zama-Zama baye baphuma kulo mgodi ngobusuku becinga ukuba awasekho amapolisa. Inkonzo yesipolisa iqhuba nephulo lika-Operation Val'uMgodi, nelijolise ekusiphuleni nengcambu ulwaphulo-mthetho oluqhubeka kwimigodi eyavalwayo. Emnxebeni, u-Ayabonga Kekana ubambe othethela inkonzo yesipolisa kuzwelonke, uBrigadier Athlenda Mathe...

Liyaqalisa ngomso umhla wamashumi amabini anesihlanu kule nyanga kwihlabathi iphulo lokuqaphela ukuchasa udushe olujoliswe kumanina nabantwana phantsi komxholo walo nyaka othi "30 Years of Advancing Collective Action to End Violence Against Women and Children". Kulo unyaka eli phulo nelizakuqhuba de kube ngumhla weshumi kwinyanga yoMnga, lizakugxila phakathi kweminye imiba ekuqubisaneni neengcambu ezingunobangela walo mkhuba, ukukhuthaza ukulingana kwamadoda namanina kwakunye nokkudalwa kwamathuba oqoqosho kumanina nabantwana. Ukanti ibhunga lezophando i-Human Sciences Research Council, likhuphe iziphumo zophando lokuqala ngodushe olusekelwe kwisini. Olu phando luqaqambisa izenzo zokubethwa, ukuxhatshazwa ngokwesondo, ukophulwa komphefumlo, udushe olumayela nezoqoqosho kwakunye nolo lwasengqondweni kulutsha nakumanina. Ukusincedisa ukungenza nzulu kwezi ziphumo zolu phando, sithe masikrwece uNjingalwazi Khangelani Zulu othe wongamela olu phando ekwabambe njengentloko kweli bhunga, ukanti ke sinaye nothethela iKomishoni kamakulinganwe ngokwesini u Jabu Baloyi...

Iziko iMandela Bay Theatre Complex libambisene nomdlali weqonga uZukiswa Cakucaku, bamema bonke abathandi bemidlalo yeqonga abakwingingqi ye Nelson Mandela Bay, eMpuma Koloni, ukuba bazekubukela umdlalo weqonga  i- Sizwe Banzi is Dead, nongumdlalo ochaza ngobomi phantsi korhulumente wengcinezelo. Lomdlalo weqonga nowabhalwa nguAthol Fugard, uJohn Kani noWinston Ntshona, ulandela ibali lika Sizwe Banzi ojongene nobunzima phantsi korhulumente wengcinezelo. Ukusabela banzi, emnxebeni sibambe umqulunqi welibali uZukiswa Cakucaku...

Ikomiti yomgaqo nkqubo wezimali kwibhanka enguvimba, ivumelene ngamxhelo-mnye ukuba ilicuthe nge 25 basis points iqondo lenzala kwimali mboleko, nto leyo ithetha ukuba ngoku limi kwinto engaphezulwana nje kwisixhenxe ekhulwini, 7-point-75 Percent. Irhuluneli yebhanka enguvimba uLesetja Kganyago, ithi lo gama ithande ukuphucuka inkangeleko yoMzantsi Afrika kodwa isengumngeni leyo yehlabathi. Ukusabela ngokuthethwa koku, emnxebeni ngoku sinaye umhlalutyi wemiba yoqoqosho ozimeleyo uGqirha Bonke Dumisa...

Ungeniswe kumqulu wezaziso zikarhulumente umthetho woomasipala oyilwayo ozakusebenza ngokufanayo ngokuphathelene kuqoqosho lwasezilokishini. Lo mthetho woomasipala uyilwayo nongeniswe  kulo mqulu ngumphathiswa wolawulo ngokubambisana nemicimbi yemveli, u Velenkosini Hlabisa, ujolise ekudaleni iimeko ezivumayo zoshishino kumashishini amancinane asezilokishini, unike inkxaso kuye wonke ubani ofuna ukushishina, uvelise imisebenzi, ze uxhobise nabahlali ngezakhono zoshishino. Ukanti ke oku kuzakuvuselela ze kuhlaziye uqoqosho lweelokishi. Ukusabela banzi ngalo mthetho, sithe masikrwece umphathiswa worhulumente ngobambiswano nemicimbi yemveli u Velenkosini Hlabisa...