Janus Mohr, sum er barnvaksin í Hoyvík og hevur búð har alt lívið, greiðir frá ymiskum viðurskiftum í heimbygdini. Nógv fólk siga gamla Hoyvík, men tað er ikki rætt, sigur Janus. Hoyvík er parturin innanfyri gomlu bøgarðarnar og býlingurin uttan garðar. Alt omanfyri er Hoyvíkshagin. Hann greiðir eisini frá serligu søguni hjá Hoyvíksgarði, tá ódagar komu upp millum bóndan og fútan, tí fútin vildi hava Hoydalar at planta skóg í, men bóndin vildi ikki. Úrslitið varð, at fútin um ár 1800 tók hálvan Hoyvíksgarð. Umleið 1920 bleiv tann parturin latin Royndarstøðini í Hoyvík.

101 ára gamli Poul Olsen hevur alt lívið búð í Toftalíð og hann greiðir m.a. frá sínum sera drúgva arbeiðslívi. Hann sigur, at hann hevði ikki droymt um at hann skuldi gerast so gamal.

89 ára gamli Arngrím Petersen sigur frá sínum fyrsta túri til skips. Túrurin til Íslands við sluppini Fagranes var sera ringur og teir høvdu heilar tríggjar vikur úr Føroyum til Vestmannaoyggjar. Fyrstu túrarnar royndu teir við snøri og tað var sjálvdráttur. Hetta var ein órættvís skipan, heldur Arngrím.

Vitjað verður fyrst á skaðastovuni og G1 á Landssjúkrahúsinum í Havn, har tey altíð skulu vera klár at taka ímóti og vera tilbúgvin, um vanlukkur henda. Sjúkrarøktarfrøðingarnir Sólrun Joensen og Jensia Højgaard Kjærbæk og ungi læknin Hjørdis Mohr greiða frá arbeiðnum.

 

Síðani verður farið niðan í Mjørkadal, har Edvard Olsen, fangavørður, sjálvur annar er á náttarvakt og hann vísir runt í húsinum. Har er friðarligt um náttina.

87 ára gamli Eli Jensen, sum er elsta fólk á Hellunum, greiðir frá fyrstu niðursetufólkunum. Tey settu búgv í 1849. Navnið á bygdini er væl valt, tí nógvar hellur eru í bygdini, bæði størri og smærri.

 

Atli Johannesen er longu farin at velta og gera klárt at seta niður eplir í vár. Og konan Jórun Eið Johannesen greiðir frá sólkomudegnum. Tað eru 12 ár síðani tey á Hellunum fyrstu ferð høvdu hetta serliga tiltakið í sambandi við at sólin aftur sær á bygdina, eftir at hon hevur verið burtur í tríggjar mánaðir á hávetri.

eini

Í hesari seinnu sendingini á Glasi vitja vit á serbreytini, har tey hava nógv á skránni bæði úti og inni, á yrkisbreytini, har bæði snikkarar og timburmenn gera sveinastykki í hesum døgum, og á búskaparbreytini.

Tað var røtt avgerð at leggja Studentaskúlan, Handilsskúlan og Tekniska skúla saman í Glasir. Tað sigur Steinbjørn Hardlei, sum tók við sum stjóri 1. januar. Hann sigur, at tað gevur nógvar møguleikar at arbeiða saman og størri virðing er skapt um tey ymsu fakøkini, tí tey vita meira um hvørt annað og tað skapar nýggjar møguleikar, so næmingurin fær eina enn betri undirvísing. Stjórin sigur eisini, at ein nýggj útbúgving verður fyrireikað, har studentaskúli og ein handverkaraútbúgving verða sett saman í eina útbúgving. Enn er hon á fyrireikingarstigi.

Mikladalsmaðurin Markus í Norðnástovu greiðir frá ymiskum, ið eyðkennir Mikladal. Umframt kópakonuni, greiðir hann m.a. frá søgnini um fyrsta motorin í Føroyum ella møguliga í verðini. Tað var mikladalsmaðurin Andrassarsímin, sum gjørdi hann í einari smiðju í heimbygdini. Markus greiðir eisini frá gomlu smiðjuni í Norðnástovu og hann hevur ein dreym um at fáa lív í eldsmiðjuna aftur.

 

Ragna Glerfoss er hørm um, at allar postadressurnar í Mikladali eru broyttar. Hon meinar, at adressan skuldi verið tann sama sum húsini, tí øll hús í bygdini hava navn.

Sjóndepilin við Íslandsvegin í Havn varð settur á stovn í 1988. Tey fyrstu mongu árini var navnið Føroya Blindastovnur. Men fyri umleið 10 árum síðani varð navnið broytt til Sjóndepiliin. Karin Kass, leiðari, sigur, at tey merktu beinanvegin eina broyting, tí Sjóndepilin er eitt meira jaligt heiti. Tey merktu týðiligt, at tað bleiv lættari fyri fólk at seta seg í samband við tey.

Oddmar Ravnsfjall samlaði fyri nøkrum árum síðani "húsafrensar", sum eru føddir áðrenn 1960. Hann sigur, at hetta var ein sera væl eydnaður dagur, har nógv góð minnir úr býlinginum í Húsi komu fram. Nú ætlar hann at savna allar miðvágsdreingir, ið eru føddir áðrenn 1960. Tað tekur sína tíð at fyrireika, so hann væntar at tað kanska verður um eitt ár.