Al è un progjet metût adun dal Moviment Turisim dal Vin dal F-VJ, che al permet di fâ incuintris e vivi moments di bon stâ tes vignis maraveosis de nestre regjon. Al rapresente ancje une ocasion par ducj chei interessâts di cognossi e di gjoldi des nestris ecelencis dal mangjâ e dal bevi. Ospite: Chiara Tuppy, Responsabile turisim e formazion dal Moviment Turisim dal Vin.

A saran parcs, zardins, curtîi, mulins, vilis, lâts e sedis di associazions a dâ acet ai apontaments che si fasaran di Jugn a Setembar, inte suaze dal progjet LeggiAMO 0-18 par cure di Damatrà onlus, daûr di percors diferents e areis tematichis, dedicâts a fruts e fameis.

Clamât "de lane al acolt", chest implant al à l’obietîf di judâ lis impresis dal teritori a svilupâ e valorizâ lis funzionalitâts multiplis tal setôr de agriculture sociâl e des ativitâts di ricercje pal aspiet "agricul ecologjic" e des piçulis filieris des bestiis.Ospit: Edi Piasentir, diretôr dal dipartiment de Universitât dal Friûl.

Spetacui, musiche e incuintris in dute la regjon, ma ancje a Cjaudistrie, di là di cualchi apontament speciâl intai mês di Lui e Avost. Folkest e torne a partî di grancj artiscj che a àn fat la storie de world music e ancje dal rock, dant simpri plui spazi ancje ai artiscj zovins.

E je une gare di bicicletis in noturne tra i borcs des Valadis dal Nadison e de zone di Cividât. La pedalade si davuelzarà tra pistis ciclabilis e stradutis, par cirche 40 km e 200 metris di pendence cun partence e fin a San Pieri dal Nadison. L'event al è a numar sierât di 200. Ospit: Roberto Bortolotti, organizadôr de “Valli di Gnot”.

La Associazion Itineraria e à ideât un progjet di ricercje e di turisim culturâl par contâ – cun percors tematics – cuartîrs, la evoluzion des citâts, oms e feminis dal passât e dal presint: dai D’Aronco a Adelaide Ristori, di Ermes di Colorêt ai Basaldella. Prin apontament ai 14 di Jugn cun Angelo Floramo, che al presentarà Giusto Fontanini.

Ancje par chest 2022, a saran a disposizion dai turiscj dôs misuris par sburtâ lis vacancis de int. Une in particolâr, si clame "TuResta in FVG", un bonus par sburtâ il turisim e lis vacancis achì, par ducj chei che a prenotin almancul trê gnots di file intune des struturis che a aderissin. Ospite: Fabiana Bon dal Consei provinciâl di Federalberghi-Confcommercio.

52 ricetis, tant che lis setemanis dal an. Il lôr ingredient principâl al è la trute, ecelence furlane di rivalutâ. A son metudis adun intal libri “La trota delle risorgive friulane. Guizzi di sapore e di salute” di Germano Pontoni, publicât di L’Orto della Cultura, che al aprofondìs ancje aspiets nutrizionâi e, pensant ai letôrs plui piçui, al presente filastrocjis peadis ai argoments tratâts.

La suaze pal event e sarà il osservatori, par scuvierzi la bielece dal cîl e des stelis. La iniziative e jentre tal progjet “Skyscape”, cun chê di dâi impuartance al osservazion dal cîl e sensibilizâ sul teme dal incuinament luminôs. Si podarà ancje lâ a viodi il Biotop insiemi al vecjo Mulin di Braide. Ospit: Christian Sedran, coordenadôr dal progjet par Talmassons.

Di cuasi 30 agns, il Premi leterari internazionâl “Latisana per il Nord-Est” al da vôs ae miôr produzion leterarie, a specificitâts, storie e anime de aree di confin. Ai 11 di Jugn, al Teatri Odeon, si cognossarà il vincidôr dal Premi Narative 2022. E pôc prime al vignarà presentât il libri di contis dai fantats dal Liceu linguistic Martin di Tisane, che si son misurâts cu la scriture dopo vê frecuentât un laboratori di scriture creative.