Wiej meanen dat wiej kuieren konnen. Mer dan ken iej Henke Altena nog neet. Hee köm um ziene 150 Riessense 'vueglnaams' [sic] te besprekken. Mer Henke - neet Henk, want dat kan zinne Spaanse muze neet oetsprekken dus hef hee zinnen name loaten veranderen - weet onnoavolgboar al ziene gestichtings an de man te brengen. Onder et genot van zien Reggeblauwtje (Alloh, Spekhorst) leart wiej oaver zienen Tucker Tower, zien vuurleevde vuur et getal 11, ziene klearezaken in Riessen, Rome en Havana, ziene zeuven vrindinnen, et weeshoes in Roemenië en wat al neet mear! Kearl kearl wat kearl.

Jootjen Agteresch (jaahaa, dochter van) is van alles: blokfluitster, tapdanseres, kampioene op de honderd meter snelpunniken, hangmatkeuneginne en skapbazin, mer boavenal leevhebster van WATATA, umdat wiej - en zo zegt zee - 'zo lekker könt nöälen'. Ja dankwaldankwaldankwal. Hoge tied dat zee zelfs achter et nöälepöäleken kump zitten. En zo geschiedde. Doarmet har zee ne primeuze: zee was de eerste vrouwelikste podgaste. En hoe, dames en heren! Jolanda kan zo mooi kuieren, doar wor'j stille van. Mu'j mer lusteren.

As eersten podgast vanoet et Bolwark van Watata skeuf mountainbiker, voetballer en roadslid Dieger 'Dieks' ten Berge an um nen eande vort te kwaken (dat doot dee eanden hè). 🦆 Doarumme zint dee lidwöörde zo belangriek: ne eande is heel wat anders as nen eande. Mer good, Dieks kump makkelik van de wöörde of dus dan is et mer good da'w der een nöälepöälken bie hadden stoan um dat allemoal op te vangen. Met ne glemmige glansrolle vuur Martin Rensen wier en wat he'w der toch een spul van, of nit dan. Machtig mooi, zonne beskrieving, mer a'j der nen hoop onzin in zett hef der nums wat an. Gewoon lustern, dus! 

Kearl wat gung et der of. Gait van de Tute van Jejoos van Dannenboarg en zinnen board kömmen een uur volpreaken. En dat gung as vanzelf. Wiej lullekult en labbereert der wat of. Oaver skeldnaams (want woer kump dat tuteletute toch vandan) en oaver et museum en zewende kenners. En ook oaver onzen beer den as binnenkort te koop is. Wat ne wille! Want Gait hef nen helen hoop bie 'n ende, mer de bindende faktor is dat der wat te lachen mut wean. En dat dut hee gearne en völle. Lustert mer!

Et mos zo wean. Nummer 13 op de lieste köm op 'n 13. meart bie ons kwaken. In 'n 31. podcast. En dan dut he ook nog bie 'n vootbal in teksjelsjor van 31. Verleden joar beklumme wiej de hitliesten met onze knaller 'Cowboy Buffelbert'. Et leaverden de familie subiet nen niejen skeldnaam op. Wetholder Buffelbert van Riessen is neet te kwoad um der in et heuvdkwarteer van WATATA oaver te kommen kuieren. Wiej vroagt em de bokse van et gat oaver zinne darteendekamerambities en zinne sportiviteit. En wat zinne levelingskluur is. Dat soort dinge. En hee gef der nog mooi antwoord op ook. A'j nog neet wussen woerop a'j mossen stemmen, dan wee'j et non!

Duusker is wal zonnen knappen kearl. Dat kö'j in dissen podcast allene neet heuren. Hee hef ook zin egene politieke partieje, Duusker 66. En doar zit hee met in 'n road van Riessen. En at hee een uurken oefent, mu'j es heuren wat Plat as den man kan. Dat mu'j vaker doon! Hee dut nog oaver de windmöllen van Riessen (neet de windbulen, al he'w der doar ook wal wat van). En hee dut ook nog wal een lekker melmöpken etten. Hoh wat fein. En precies een uur ook. A'j wille hebt, dan vlög de tied. Et lokale niejs kump vuurbie, Bril-Jantje... en D is akelig skoarp op de jengels. A'j et tot zowied hebt duureleazen, dan wee'j dus dat der heel wat ekuierd wördt in dissen podcast. Foje foje, wat pul wat pul.

De oetstelde ofleavering met André Manuel kon dan toch eandelik duurgoan. Verleden wekke kon he neet kommen want et sniejen em te hard. #ROCKNROLL Wiej sprekt André oaver de lastige tieden vuur artiesten. En of ze in Deepn vuur et internet ne wibi-code hebt. Ook kump natuurlik Buffelbert nog an bod. Dat leidt ons dan wier tot de skeldnaams. Dee hebt ze in Deepn ook. Mer nog neet echt vuur André. Dus a'j nog wat weett... In ieder geval he'w et met de kuierpöalkes eandelik vuur mekoar. Lustert mer gewoon. Onwies, wat geet et der of. 

He-le-moal vanoet Lönneker köm pastoor Abels op Riessen an um ons wegwies te maken in de richtste weg. Wat volgen was ne preake van zowat anderhalf uur (dat kenne wiej wal in Riessen),  woerin as de hanen, doeven en kuuleier neet van de locht zint. Met innerlike verblieding gung Abels wier op Lönneker an. Missie (misskien) eslaagnd!

Wiej hadden eaven pauze, mer non kö'j allemoal wier opeluchet oademhalen want wiej zint der wier! Met alle vaste rubrieken en olderwets akelig genöäl. En as et oe nit ansteet, dan mu'j 'n volgenden mer lusteren, want et wördt verdan better! 2021 mut et joar worden van de Podgast. Van watvonnen, dat wee'w nog neet. Wiej doot allens live opnemmen rechtevoord. Mer gelukkig kö'j gewoon allens wierumme lusteren op spotjevaai. Onzen Theo zit der in, en Marc ook! En Martin Rensen! Loa'w Martin Rensen neet vergetten. Aju!

Wo as Buffelbert an de naam köm, de bolterkeies van Briljantje, et börstbeeld van Belcampo, de broen-grieze buxusbuskes en nog nen boarg babbels der bie. De podkearls van WATATA brengt oe met langs de belangriekste heugtepunten van het bewöagene joar 2020.