ഒരു അരുവിയുടെ തീരത്ത് കണ്ണുകളടച്ചിരുന്നപ്പോൾ… മനസ്സ് പതിയെ സഞ്ചരിച്ചത് ഒരു പഴയ കാലത്തിലേക്ക്. 🌿ശ്രീനാരായണഗുരുവിന്റെ ജീവിതത്തെയും ആശയങ്ങളെയും ഓർമിപ്പിക്കുന്ന അരുവിപ്പുറം, കൊടിതൂക്കിമല, ഗുരു തപസ്സിരുന്ന ഗുഹ, ശിവഗിരി… ഓരോ ഇടവും പറയുന്നത് ഓരോ കഥ.പ്രകൃതിയുടെ ശാന്തതയ്ക്കൊപ്പം ചരിത്രവും ഗുരുവിന്റെ ചിന്തകളും ചേർന്ന ഈ യാത്ര ഒടുവിൽ എത്തുന്നത് വർക്കല ക്ലിഫിന്റെ വിശാലമായ കടൽക്കരയിൽ.മരുത്വാമലയിൽ തുടങ്ങി പല ഇടങ്ങളിലൂടെ കടന്നുപോയ യാത്രയുടെ അവസാനം മനസ്സിൽ ബാക്കിയാകുന്നത് ഒരു ചോദ്യം പോലെ ഒരു അനുഭൂതി—

ഇത്രയും സ്ഥലങ്ങൾ പിന്നിട്ടപ്പോൾ മനസ്സിൽ നിറഞ്ഞത് എന്തായിരിക്കും?ജി. ജ്യോതിലാലിനൊപ്പം യാത്രാവാണി 108 കേൾക്കാം. 🌊🎙️
നിർമ്മാണം : ആർ ജെ അച്ചൂ

മരുത്വാമലയിൽ നിന്ന് ഇറങ്ങിയ യാത്ര… ഒടുവിൽ എത്തിയത് ചെമ്പഴന്തിയിൽ.മരുത്വാമലയിൽ കണ്ട ഭൈരവൻ എന്ന നായയുടെ നിഷ്കാമ സ്നേഹത്തിന്റെ ഓർമയിൽ നിന്ന്, നടൻ സമുദ്രക്കനി പങ്കുവെച്ച തന്റെ ജീവിതത്തിലെ ‘ഭൈരവൻ’ കഥയിലേക്ക് നീളുന്ന ഒരു അപ്രതീക്ഷിത യാത്ര.ഒരു നായയുടെ സ്നേഹം… ഒരു മനുഷ്യന്റെ ഓർമ… പിന്നെ ശ്രീനാരായണ ഗുരുവിന്റെ ജീവിതവഴികളിലേക്ക് നീളുന്ന മറ്റൊരു യാത്ര.തിരുവനന്തപുരത്ത് നിന്ന് ചെമ്പഴന്തിയിലെത്തുമ്പോൾ മുന്നിൽ തെളിയുന്നത് കാലത്തിന്റെ സാക്ഷിയായ മുത്തശ്ശി പ്ലാവും, ശ്രീനാരായണ ഗുരുവിന്റെ ജന്മവീടായ വയൽവാരത്തെ വീടുമാണ്. നാണുവിൽ നിന്ന് ശ്രീനാരായണ ഗുരുവിലേക്കുള്ള വളർച്ചയും അതിനൊപ്പം കേരളത്തിന്റെ നവോത്ഥാന ചരിത്രത്തിലേക്കുള്ള ഒരു യാത്രയും.ഒരു ചെറിയ വീട്ടുമുറ്റത്ത് നിന്ന് പിറന്ന ആശയങ്ങൾ ഒരു നാടിന്റെ ചിന്തയെ എങ്ങനെ മാറ്റി?യാത്രാവാണി 107-ൽ ജി. ജ്യോതിലാലിനൊപ്പം ഈ യാത്ര തുടരാം.
നിർമ്മാണം : ആർ ജെ അച്ചൂ

"തീവണ്ടിപ്പാളങ്ങൾ അവിടെ അവസാനിച്ചു… പക്ഷേ യാത്ര അവിടെ നിന്നാണ് തുടങ്ങിയത്. 
 കന്യാകുമാരിയിൽ നിന്ന് മരുത്വാമലയിലേക്ക് ജി. ജ്യോതിലാലിനൊപ്പം ഒരു യാത്ര. പാറക്കെട്ടുകളും കനത്ത വെയിലും കടൽക്കാറ്റും മലക്കാറ്റും പിന്നിട്ട് ശ്രീനാരായണഗുരുവിന്റെ ധ്യാനഗുഹയിലേക്ക്. വഴിയിൽ കൂട്ടായെത്തിയ ഒരു ഊന്നുവടി… യാത്രികന് വഴികാട്ടിയായ ഭൈരവൻ എന്ന നായ… താഴെ പച്ചപ്പണിഞ്ഞ കന്യാകുമാരിയുടെ കാഴ്ച… പിന്നെ ഈ മണ്ണിൽ പതിഞ്ഞ ശ്രീനാരായണഗുരുവിന്റെയും ചട്ടമ്പിസ്വാമികളുടെയും അയ്യാ വൈകുണ്ഠസ്വാമികളുടെയും ഓർമകൾ. ഒരു മലകയറ്റം മാത്രമല്ല ഈ യാത്ര. പ്രകൃതിയിലൂടെയും ചരിത്രത്തിലൂടെയും മനുഷ്യചിന്തകളിലൂടെയും കടന്നുപോകുന്ന ഒരു സഞ്ചാരമാണിത്. 
 യാത്രാവാണി – 106-ാം എപ്പിസോഡ്
ജി. ജ്യോതിലാലിനൊപ്പം കേൾക്കാം… മരുത്വാമലയുടെ കാറ്റ് പറയുന്ന കഥകൾ.

നിർമ്മാണം : ആർ ജെ അച്ചൂ

റഷ്യയെ അറിയാൻ ഒരു യാത്ര

യൂറി ഗഗാറിനിൽ നിന്ന് റഷ്യ–യുക്രെയ്ൻ യുദ്ധത്തിലേക്ക്, സോവിയറ്റ് ചരിത്രത്തിൽ നിന്ന് ഇന്നത്തെ റഷ്യൻ ജീവിതത്തിലേക്ക് — ചരിത്രവും സംസ്കാരവും മനുഷ്യരുടെ അനുഭവങ്ങളും തേടിയുള്ള യാത്ര.മോസ്കോയുടെ കാഴ്ചകൾ, ലെനിനും റഷ്യൻ വിപ്ലവവും, വോഡ്ക മ്യൂസിയവും, സോവിയറ്റ് റഷ്യയുടെ ഓർമകളും… ഒപ്പം യുദ്ധം ബാക്കിവയ്ക്കുന്ന മനുഷ്യവേദനയും.ഒരു രാജ്യം. പല കാലങ്ങൾ. ഒരുപാട് കഥകൾ.

🎙️ യാത്രവാണി | Episode 105

റഷ്യയിലൂടെ ഒരു യാത്ര… കേൾക്കാം, അറിയാം, അനുഭവിക്കാം.
Host : G Jyothilal
Producer : RJ Achoo

സെന്റ് പീറ്റേഴ്‌സ്ബർഗിനോട് വിട…റഷ്യൻ യാത്രയിലെ മറ്റൊരു അധ്യായം കൂടി തുറക്കുകയാണ്. ജി ജ്യോതിലാലിനൊപ്പം നേവാ നദിയുടെ തീരത്തുനിന്ന് ചരിത്രത്തിന്റെ ഉള്ളറകളിലേക്ക്.
നേവാ നദിയുടെ തണുത്ത ഓളങ്ങൾ മുതൽ ചർച്ച് ഓഫ് ദി സേവിയർ  , സെയ്ന്റ് ഐസക്കിന്റെ കത്തീഡ്രൽ,പീറ്റർ ആൻഡ് പോൾ ഫോട്രെസ്സ് , ഹെർമിറ്റേജ് മ്യൂസിയം എന്നിവിടങ്ങളിലെ ചരിത്രക്കാഴ്ചകൾ വരെ… സെന്റ് പീറ്റേഴ്‌സ്ബർഗ് ഈ യാത്രയിൽ അതിന്റെ പല മുഖങ്ങളും തുറന്നുകാട്ടുന്നു.പീകോക്ക് ക്ലോക്ക്  പോലെയുള്ള അപൂർവ വിസ്മയങ്ങൾ, യുദ്ധത്തിന്റെ ഓർമ്മകൾ, വെള്ളപ്പൊക്കത്തിന്റെ ചരിത്രം, റഷ്യൻ രാജഭരണത്തിന്റെ പ്രൗഢി—ഇവയ്ക്കൊപ്പം മനുഷ്യരെ തമ്മിൽ ചേർക്കുന്ന സ്നേഹത്തിന്റെയും സമാധാനത്തിന്റെയും ചില നിമിഷങ്ങളും ഈ യാത്രയിൽ കടന്നുവരുന്നു.അവസാനം, സെന്റ് പീറ്റേഴ്‌സ്ബർഗിനോട് വിട പറഞ്ഞ് സൂപ്പർഫാസ്റ്റ് ട്രെയിനിൽ മോസ്കോയിലേക്ക്. വഴിയരികിലെ നദികളും കാടുകളും മഞ്ഞുപുതച്ച കാഴ്ചകളും പിന്നിട്ട് നാല് മണിക്കൂർ നീളുന്ന മറ്റൊരു യാത്ര.ചരിത്രവും യാത്രയും മനുഷ്യാനുഭവങ്ങളും ഒരേ ട്രാക്കിൽ സഞ്ചരിക്കുന്ന റഷ്യൻ യാത്രയുടെ പുതിയ അധ്യായം.

റഷ്യൻ യാത്ര തുടരുകയാണ്… ഇത്തവണ മോസ്കോയുടെ തെരുവുകളിലൂടെയും ചരിത്രത്തിലൂടെയും.രാവിലെ നഗരം ഉണരുന്നതിന് മുമ്പേ G. Jyothilal-നൊപ്പം മോസ്കോയുടെ വഴികളിലൂടെ ഒരു നടത്തം. ഭൂഗർഭ പാതകളും മെട്രോ സ്റ്റേഷനും ഇലക്ട്രിക് സ്കൂട്ടറുകളും പിന്നിട്ട് എത്തുന്നത് രണ്ടാം ലോകമഹായുദ്ധത്തിലെ വിജയത്തിന്റെ 80-ാം വാർഷികാഘോഷങ്ങളുടെ ഓർമ്മകളിലേക്കാണ്.

•  Sputnik മുതൽ ബഹിരാകാശ നേട്ടങ്ങളുടെ ചരിത്രം വരെ…
•  യുദ്ധത്തിൽ ജീവൻ നഷ്ടപ്പെട്ടവരുടെ ഓർമ്മകളിൽ റഷ്യയുടെ വൈകാരിക ബന്ധം…
• മോസ്കോയുടെ പഴക്കവും മെട്രോയുടെ ചരിത്രവും…
• രാജ് കപൂർ മുതൽ ഷാരുഖ് ഖാൻ വരെയുള്ള റഷ്യയുടെ ഇന്ത്യൻ സിനിമാ ബന്ധവും…
• നൂറ്റാണ്ടുകളുടെ ചരിത്രവും സംസ്കാരവും വഹിക്കുന്ന മോസ്കോ നഗരത്തിന്റെ കാഴ്ചകളും…

ഗൈഡ് തമാരയ്ക്കൊപ്പം മോസ്കോയുടെ പ്രശസ്തമായ ഇടങ്ങളിലൂടെ സിറ്റി ടൂർ ആരംഭിക്കുമ്പോൾ, റഷ്യയെ നമ്മൾ കേട്ടറിഞ്ഞതിൽ നിന്ന് കുറച്ചുകൂടി അടുത്തറിയുകയാണ് ഈ യാത്ര. 
Yaathravaani with G. Jyothilal
യാത്ര തുടരുന്നു… റഷ്യയുടെ കഥകളിലൂടെ.

Yaathravaani with G. Jyothilal | St. Petersburg – Russiaട്രെയിൻ യാത്രയ്ക്ക് തന്നെ ഒരു കഥ പറയാനുണ്ടെങ്കിലോ?

റഷ്യയുടെ ചരിത്രവും കാഴ്ചകളും അനുഭവിച്ചുകൊണ്ട് G. Jyothilal-നൊപ്പം സെന്റ് പീറ്റേഴ്‌സ്ബർഗിലേക്ക് ഒരു മനോഹര യാത്ര പോകാം.
ഡബിൾ ഡെക്കർ ട്രെയിനിലെ ആഡംബര യാത്രയിൽ നിന്ന് തുടങ്ങി, ലോകപ്രശസ്തമായ Peterhof Palace-ന്റെ അത്ഭുതകരമായ ജലധാരകളിലേക്കും, റഷ്യയുടെ ‘Venice’ എന്ന് അറിയപ്പെടുന്ന മനോഹരമായ കനാലുകളിലേക്കും ഈ യാത്ര നീളുന്നു.

•  Peterhof Palace – ഗുരുത്വാകർഷണ ശക്തിയിൽ പ്രവർത്തിക്കുന്ന വിസ്മയകരമായ ഫൗണ്ടനുകൾ
•  Double-Decker Train Journey – യാത്ര തന്നെ ഒരു അനുഭവമാകുന്ന ട്രെയിൻ യാത്ര
•  St. Petersburg Canals – റഷ്യയുടെ ‘Venice’ എന്ന് വിളിക്കപ്പെടുന്ന നഗരക്കാഴ്ചകൾ
•  Kazan Cathedral – ചരിത്രവും വാസ്തുവിദ്യയും ഒത്തുചേരുന്ന ഇടം
• Moscow Triumphal Gate – റഷ്യൻ ചരിത്രത്തിലെ മറ്റൊരു ശ്രദ്ധേയമായ അടയാളംചരിത്രം,

വാസ്തുവിദ്യ, പ്രകൃതി, യാത്രാനുഭവങ്ങൾ—എല്ലാം ചേർന്ന റഷ്യയിലെ സെന്റ് പീറ്റേഴ്‌സ്ബർഗ് യാത്രയുടെ ഒരു മനോഹര അനുഭവം.
 Yaathravaani with G. Jyothilal
കാഴ്ചകൾ മനസ്സിൽ കാണാം.

പണ്ട് പണ്ട് ഒരു അവധിക്കാലത്ത് അമ്മവീടായ മൂടാടിയിലെ കളത്തിക്കണ്ടി വീട്ടിൽ രാപ്പാർക്കാൻ പോയതായിരുന്നു. രാത്രി കോലായിലെ പുല്ലുപായയിൽ അമ്മമ്മയോടൊപ്പം കിടന്ന കഥ കേട്ടു. ഇന്ത്യൻ സ്വാതന്ത്ര്യസമര ചരിത്രത്തിലൂടെ ആയിരുന്നു ആ കഥനസഞ്ചാരം. ബോംബും തോക്കും പീരങ്കിയും എല്ലാം അടങ്ങുന്ന ആയുധശക്തിയെ അഹിംസ എന്ന ശക്തമായ സഹനായുധം കൊണ്ട് പ്രതിരോധിക്കുന്ന മഹാത്മാഗാന്ധി ഒരു ബിംബമായി എന്റെ ഉള്ളിൽ ഇങ്ങനെ പ്രതിഷ്ഠിച്ചു കൊണ്ടിരിക്കുകയായിരുന്നു. അമ്മ കോലായിൽ ഒരു മൂലയ്ക്ക് ഇരുത്തിയിൽ മണ്ണെണ്ണ വിളക്കിന്റെ വെളിച്ചത്തിൽ വായിച്ചുകൊണ്ടിരുന്ന സുധാകരമാവൻ ഇതെല്ലാം കേട്ടുകൊണ്ടിരിക്കുന്നുണ്ടായിരുന്നു. കഥ തീർന്നപ്പോൾ അമ്മാവൻ വന്ന് അടുത്തു കിടന്നു. അമ്മമ്മ എഴുന്നേറ്റുപോയി.
മാമൻ മറ്റൊരു കഥ പറയാൻ തുടങ്ങി. മഞ്ഞിലും കൊടുംതണുപ്പിലും വിരിഞ്ഞ വിപ്ലവ സൂര്യന്റെ കഥ—ലെനിന്റെ ജീവിതം. ഒടുക്കം എന്നെക്കൊണ്ട് ആ കുട്ടിപ്രായത്തിൽ ഇൻകുലാബ് സിന്ദാബാദ് വിളിപ്പിച്ചാണ് അവസാനിപ്പിച്ചത്. റഷ്യയും ആ ചുവന്ന ഭൂമിയും കുഞ്ഞുമനസ്സിൽ അറിയാത്ത ഭൂപടത്തിൽ എവിടെയോ സ്ഥാനം പിടിച്ചു. അച്ഛനോട് ഈ കഥ പറയരുതെന്ന് അമ്മ താക്കീദ് തന്നു, കാരണം അച്ഛൻ ഒരു ഗാന്ധി ഭക്തനായിരുന്നു.അവതരണം: ജി.ജ്യോതിലാൽ

കാട്ടാനകള്‍ നീരാടുന്ന പൗര്‍ണമി രാത്രിയില്‍, കേട്ടപ്പോള്‍ കിനാവെന്ന് തോന്നി കണ്ടപ്പോള്‍ സ്വപ്‌ന സുന്ദരം. കാടും മേടും നിലാവില്‍ നീരാടി നില്‍ക്കുന്ന രാത്രിയില്‍ ആനകള്‍ കൂട്ടത്തോടെ കുളിര്‍ച്ച് തിമിര്‍ക്കാനെത്തുന്ന ഒരിടം. പത്തും പന്ത്രണ്ടും ആനകള്‍ അടങ്ങുന്ന സംഘം ഒന്നിന് പുറമെ ഒന്നായി നീരാടാന്‍ എത്തും. ഒരു കൂട്ടത്തിന്റെ കുളി കഴിഞ്ഞാല്‍ അടുത്ത കൂട്ടം. ഇത് കണ്ട് നമുക്ക് എത്ര നേരം വേണമെങ്കിലും കരയില്‍ ഇരിക്കാം. ജി.ജ്യോതിലാലിന്റെ യാത്രാവിവരണം യാത്രാവാണി.
Anakulam yathravani Podcast

ശിവരാത്രി നാളില്‍ ഫോര്‍വീലര്‍ ജീപ്പില്‍ കാനന പാതിയിലൂടെ നടത്തിയ ഒരു യാത്രയുടെ ഓര്‍മ്മയില്‍. യാത്രാവാണി ജി ജ്യോതിലാല്‍ | സൗണ്ട് മിക്‌സിങ്; പ്രണവ് പി.എസ്