በወላይታ በተካሄደዉ ህዝበ ውሳኔ በውስን ጣቢያዎች ላይ ከአጋጠሙ አነስተኛ ችግሮች በስተቀር ሂደቱ በተሳካ ሁኔታ ተከናውኗል ሲሉ የብሄራዊ ምርጫ ቦርድ ገለፀ፡፡ ለህዝበ ውሳኔው በተዘጋጁ 1 ሺህ 812 ምርጫ ጣቢያዎች ላይ መራጮች በተያዘው የጊዜ ሠሌዳ መሠረት ድምጻቸውን መስጠታቸውም ተገልጿል።

ለአራት ወራት ተቋርጦ የነበረው የካማሽ ዞንና ምዕራብ ወለጋ ዞን ግምቢ መስመር የትራንስፖርት አገልግሎት ስራ መጀመሩ ተነገረ። መንገዱ በመዘጋቱ መሠረታዊ የፍጆታ ዕቃዎች ላይ ከፍተኛ የዋጋ ጭማሪ ተደርጎ እንደነበር ገልጸዋል፡፡ ከ3 ወራት በኃላ ተሽከርካሪዎች ወደ ዞኑ መግባታቸውን እና የምርት ዋጋ ላይ አሁንም ጭማሪ መታየቱንም ተናግረዋል፡፡

በኢትዮጵያ በተለይም በስፍት በማህበራዊ የመገናኛ ዘዴዎችን በመጠቀም የተሰራጨው የሀሰተኛ መረጃ እና የጥላቻ ንግግር ሁናቴ ጥናት ይፋ ሆነ፡፡ በኢትዮጵያ መገናኛ ብዙሃን ባለስልጣን ተጠንቶ ዛሬ ይፍ የተደረገው ዓመታዊ ጥናቱ፤ በሀሰትና ጥላቻ ላይ ተንተርሰው የተሰራጩ መረጃዎች አደገኝነትንም ገልጿል፡፡

የመገናኛ ብዙኃን ባለሙያዎችን ጨምሮ በእነ ዶ/ር ወንድወሰን አሰፋ መዝገብ በፌደራል ዐቃቤ ሕግ በሽብር ወንጀል ክስ የቀረበባቸው 51 ተከሳሾች ሦስተኛ የችሎት ውሎ ተካሂዷል። ተከሳሾቹ የፖለቲካ እና የርዕዮት አላማን ለማራማድ በማሰብ የሽብር ድርጊት ፈጽመዋል በሚል በዐቃቤ ሕግ ክስ ቀርቦባቸዋል።

በአዲስ አበባ ከተማ ዙሪያ ከአምስት ወራት በፊት በይፋ የተመሰረተው የሸገር ከተማ አስተዳደር በተያዘው ኣመት አከናወንኩ ባለው በህገወጥ መንገድ የተያዙ መሬቶችን የማጥራት ስራ ከሦስት ሺህ ሄክታር በላይ መሬት ወደ መንግስት መመለሱን አስታወቀ፡፡

በምስራቅ ወለጋ ዞን ኪረሙ ወረዳ ውስጥ ትናንት ከማለዳ ጀምሮ ታጣቂዎች ባደረሱት ጥቃት የስምንት ሰዎች ህይወት ማለፉን ነዋሪዎች ተናግረዋል፡፡ ታጣቂዎቹ ንብረት ላይም ጉዳት ማድረሳቸውን እና የቁም እንስሳት መዝረፋቸውንም ያነጋገርናቸው የኪረሙ ወረዳ ነዋሪዎች ገልጸዋል፡፡