ЖЕР ЭНЕ

2022-жылы Орусия Украинага басып кирип, согуш ачкандан бери Москванын тастыкталган жоготуулары 121 507 адамга жетти. Согушта набыт болгондордун аты-жөндөрү "Медиазона", Би-би-си радиосунун орус кызматы жана ыктыярчылар тарабынан ачык булактарга таянып такталган.

"Медиазонанын" эсептөөлөрүнө ылайык, өлгөндөрдүн саны болжол менен 165 000 адам болушу мүмкүн.

Ачык булактарда бардык каза болгондор тууралуу маалымат камтылбайт, ал эми жаңы түшкөн маалыматтарды ыктыярчылар жана журналисттер толук тактай элек болушу мүмкүн. Бул орус армиясынын согуштагы чыныгы жоготуулары мындан алда канча көп болушу ыктымал экенин билдирет.

Улуттук коопсуздук комитети (УКМК) Жогорку Кеңештин мурдагы депутаттары А.Ж. уулу менен М.М. Нарындагы көмүр кендеринин бирин мыйзамсыз басып алууга шек саналып камалганын билдирди. Аларга каршы арыз жазылганын маалымдады, бирок кимден түшкөнүн тактаган жок.

"Текшерүүнүн жүрүшүндө арыз ээсинин жүйөлөрү тастыкталып, кылмыш ишин козгоого негиз болду. Анда Жогорку Кеңештин мурдагы депутаттары А.Ж. уулу менен М.М. коркутуу, дагы башка мыйзамсыз ыкмаларды колдонуп, акча төлөбөстөн аталган көмүр кенин иштетип жаткан компаниянын акцияларынын контролдук пакетин берүүгө мажбурлашкан. Кылмышка шектүүлөр 31-июлда камалды жана аларга мыйзамда белгиленген мөөнөттө айып тагылат, сотто тергөө бүткүчө абакта калтыруу бөгөт чарасы тандалды"-деп жазылган маалыматта.

Сауд Арабия, Египет, Катар, Иордания өңдүү өлкөлөр кирген Араб мамлекеттер лигасы, Түркия жана Европа Биримдиги Газа тилкесиндеги жагдайга байланыштуу декларацияга кол коюшту.

Ош облусуна караштуу Өзгөн райондук сотунда Айзирек Эралиеванын өлтүрүлүшүнө байланыштуу иш карала баштады. Маркум келиндин кылмышка шектүү күйөөсүнө "адам өлтүрүү", куралды, ок-дарыларды мыйзамсыз жүгүртүү" беренеси менен кылмыш иши козголгон.

Эралиеванын жакындары анын өмүр бою эркинен ажыратылышын талап кылып жатат.

Улуттук коопсуздук комитети (УКМК) Ош шаарындагы жогорку окуу жайлардан сабакка катышпаган же академиялык карызы бар 13 295 студент чыгарылганын билдирди. Мыйзамсыз иштерге жол бергендерди аныктоо, алардын жоопкерчилигин кароо уланып жатканын маалымдады.

Кыргызстандын Орусиядагы элчилиги “Азаттыкка” берген маалымат боюнча, бул өлкөдө мыйзам бузууларга байланыштуу көзөмөлдөөчү реестрге ("кара тизме") кирген кыргызстандыктардын саны 103 миңге жетти. Алардын 30 пайызы балдар.

Элчилик ушул тапта Орусиянын аймактарында мигранттарга түшүндүрүү иштерин жүргүзүп жатканын кошумчалады.

20-июлга караган түнү Москванын түндүк-батышындагы Зеленоград району украиналык дрондордун чабуулуна туш болду. Маалыматтарга караганда, атып түшүрүлгөн учкучсуз учактардын сыныктары тийген эки машина күйүп кетти. Көп кабаттуу үй зыян тартты. Жараат калгандар тууралуу маалымат берилген жок.

Шаардын мэри Сергей Собяниндин айтымында, абадан коргонуу күчтөрү Москваны көздөй учкан 16 дронду атып түшүрдү. Дагы беш учкучсуз учак 19-июлда атып түшүрүлгөн. Калаа мэри 20-июлда эртең менен дагы дрондор атып түшүрүлгөнүн кабарлады.

Улуттук коопсуздук мамлекеттик комитети (УКМК ) Бишкек шаарынын мэринин мурдагы орун басары Ы.Ж.С. (Жамалбек Ырсалиев) эч жакка кетпөө жөнүндө тил каттын негизинде чыгарылганын билдирди. Атайын кызматтын 18-июлдагы маалыматына караганда, ал 2.9 миллион сом зыяндын ордун мамлекетке төлөп берди.

17-июлда УКМК Ырсалиевге "кызмат абалынан кыянаттык менен пайдалануу" беренеси менен иш козголгонун, атайын кызматтын тергөө абагына камалганын билдирген. Тунгуч кичи ройонундагы 1,5 миңдей чарчы метр жерди алты жыл бою "мыйзамсыз пайдаланылып келгенине тиешеси бар" экенин, анын негизинде мамлекетке үч миллион сомдой зыян келтирилгени аныкталганын кабарлаган. Ырсалиев менен кошо В.Н.А аттуу жаран да камалганы белгилүү болгон.

Бишкектеги Улуттук госпиталдын жамааты аталган оорукананын дарыгерлери сабалган окуяларга байланыштуу бийлик башчыларына видео кайрылуу жолдошту.

Оорукананын Фейсбуктагы баракчасына 18-июлда жарыяланган билдирүүдө медициналык кызматкерлерге басым жасалып, ур-токмокко алган учурлар көбөйгөнү, жабыркагандар өч алууга кабылуудан айбыгып арыз жазуудан баш тартууга мажбур экени, айрыкча кол көтөргөн күч органдарынын кызматкерлери жазасыз калып жатканы айтылат.

Жаза аткаруу кызматы өздөрүнө караштуу Кайтаруу жана конвой менен коштоп жүрүү бөлүгүнүн жоокери өз өмүрүнө кол салып, мерт болгонун ырастады. Бул фактыны Аскердик прокуратура тергеп жатканын билдирди жана толук маалымат кийинчерээк берилерин айтты.