360 Heilsa

Stress eða streita á ekki bara við um stress vegna vinnu eða skóla. Streitan kemur að okkur úr öllum áttum og því skiptir máli að auka meðvitund á því hvernig mismunandi andlit streitu líta út og mynda sér þaðan streitustjórnunar aðferðir til að halda kerfinu í jafnvægi. Í þessum þætti spjalla ég við Snædísi Evu Sigurðardóttir sem er menntaður sálfræðingur, með streitu og kulnun sem sérsvið. Snædís starfar í Heilsuborg og segir að yfir 50% af hennar skjólstæðingum séu að kljást við streitutengd vandamál. Í þættinum ræðum við um allt það helsta sem tengist streitu og Snædís kemur með ansi áhugaverða vinkla varðandi málefnið!

Í þessum þætti langar mig að fara yfir svefninn aðeins. Svefn er að mínu mati bæði vanmetið og misskilið fyrirbæri. Svefn er ekki bara svefn heldur skipta gæði svefnsins höfuðmáli. Þessvegna langar mig að fara yfir með þér 7 leiðir til að bæta svefngæðin.

Þú finnur síðan upplýsingar um allt sem ég tala um í þættinum á www.360heilsa.is/svefn

Í þessum þætti ræddi ég við Ævar Austfjörð sem hefur tileinkað sér svokallað carnivore mataræði. En það snýr að því að neyta aðeins dýraafurða. Þetta mataræði hjálpaði honum að vinna á ýmsum heilsufarsvandamálum en á sama tíma þykir það afar umdeilt. Við ræddum um mataræðið, áhrif þess á heilsu og umhverfið,hans skoðanir á vegan mataræði, game changers myndina og margt fleira.

Í þessum þætti spjalla ég við íslenska ísmanninn Andra Iceland. Andri hefur frá magnaðri sögu að segja þar sem hann vann bug á krónískum taugaverkjum með ísböðum. Við förum yfir allt það helsta sem þarf að hafa í huga þegar kemur að ísböðum, hugarfarið sem Andri hefur tileinkað sér, áhrif streitu á líkamann o.fl.

Í þessum þætti spjalla ég um eina áhugaverðustu bók sem ég hef lesið. Fyrsta bókin sem ég las um mataræði, sem varpaði ljósi á raunverulegar afleiðingar vestræns mataræðis á heilsuna okkar. Bókin heitir Nutrition and Physical Degeneration og er skrifuð árið 1939 af tannlækni sem hét Dr. Weston Price. Sagan er vægast sagt mögnuð og gefur okkur innsýn í það hvernig frumbyggjasamfélög höguðu mataræði sínu og hvernig þau viðhéldu framúrskarandi heilbrigði.

Ragnar Freyr Ingvarsson er gesturinn í þessum þætti. Ragnar er betur þekktur af mörgum sem Læknirinn í eldhúsinu. Hann er sérfræðingur í gigtarlækningum og starfar við það á daginn en hefur á sama tíma gríðarlega ástríðu fyrir eldamennsku. Hann hefur gefið út 3 frábærar uppskriftarbækur, haldið fyrirlestra um mataræði og síðan er hann einnig með blogg á netinu þar sem hann heldur utan um ævintýrin í eldhúsinu. Við Ragnar spjölluðum um ýmis mál tengd heilsu, mataræði og eldamennsku.

Í þessum fyrsta þætti langar mig að kynna fyrir þér conceptið mitt 360° heilsa. Hvað þýðir það og hvernig getur það hjálpað þér að ná betri árangri og betri tökum á eigin heilsu.