[網站 Bāng-chām]

https://cho-kang-a-lang.github.io/

[Podcast]

SoundOn

https://bit.ly/ChKaL_SO

Spotify

https://spoti.fi/48jD2tI

KKBOX Podcast

https://bit.ly/ChKaL_KK

Apple Podcast

https://apple.co/3HZyfD3

Google Podcasts

https://ppt.cc/fpPKUx

YouTube Podcast

https://bit.ly/ChKaL_YT

[社交平台 Siā-kau Pêⁿ-tâi]

YouTube

https://bit.ly/ChKaL_YT

Facebook

https://bit.ly/ChKaL_FB

Instagram

https://www.instagram.com/chokangalang/

X (Twitter)

https://twitter.com/chokangalang

以下是故事ê白話字kah漢羅原稿，有需要ē-tàng參考。

Sî-kan chiong-kīn beh ji̍t-tàu, lāu a-kong--a chit-sî chhâ mā khioh hó--ah, taⁿ 2 tōa tàⁿ í-keng kiâⁿ beh kàu chhù. “Heh-heh! Án-ne to̍h bián hoân-ló chú-pn̄g hiâⁿ-hóe bô chhâ thang iōng--ā!” Lâng seng kiâⁿ ùi āu-mn̂g khì, kā hóe-chhâ ke-si-thâu-á siu kui-ūi, liâm-mi to̍h khì khòaⁿ chia̍h-pn̄g-toh ū siáⁿ thang chia̍h. “Ĕ! Soah bô chú? Nah ē án-ne?” Lâng oa̍t khì thiaⁿ--ni̍h, to̍h khòaⁿ tio̍h a-pô--ā the tī í-á téng teh chhoán-khùi, siān-tauh-tauh ê hêng, sim-lāi hoân-ló, sûi-sî to̍h mn̄g: “Taⁿ sī án-nóa--ah, lí thài ē tī hia ti̍t-ti̍t chhoán?” A-pô ìn kóng: “To khì mo͘h 1 lia̍p thô-á --tńg-lâi!” A-kong koh mn̄g: “Mo͘h 1 lia̍p thô-á ū châi-tiāu chhoán kah án-ne?” A-pô ìn: “Tī mn̂g-kháu-tiâⁿ lí ka-tī khòaⁿ.” A-kong--a kiâⁿ kàu mn̂g-kha-kháu, sûi to̍h khòaⁿ tio̍h hit lia̍p thô-á, chhoah 1 tiô tò-thè 3 pō͘, hiám poa̍h--tó, chhùi kóng “Nah…, nah ē hiah tōa…, taⁿ súi-bó͘--eh, che beh án-chóaⁿ khah hó?” A-pô ná kiâⁿ lâi mn̂g-kha-kháu ná ìn: “Góa to̍h chai-iáⁿ lí ē tio̍h kiaⁿ, góa mā sī m̄ chai beh án-chóaⁿ chhú-lí, chiah teh tán lí tńg-lâi beh chò-hóe chham-siông.” 2 ê lâng sio-siòng, koh chò-hóe khòaⁿ thô-á, koh sio-siòng, koh khòaⁿ thô-á, m̄ chai beh án-chóaⁿ. Hiông-hiông thiaⁿ-tio̍h 1 siaⁿ pak-tó͘ kū-kū kiò ê siaⁿ, a-pô--ā chhiò-chhiò-á kā a-kong kóng: “Iau--a hōⁿ?” A-kong--a pháiⁿ-sè pháiⁿ-sè, chhiú so pak-tó͘, chhiò leh ìn kóng: “Lâng sang--lo̍h-lâi, soah iau--khí-lâi.” A-pô kóng: “Góa thiám kah m̄ chai thang chú-pn̄g, bô lán lâi kā chit lia̍p thô-á thâi-thâi--leh, seng chí-iau--1-ē hó--bô? Lâi, lí lâi kā góa tàu lêng khì chia̍h-pn̄g-toh.”

2 ê lâng chiū án-ne 1 lâng 1 pêng, thô-á lêng--leh, “heh-sio͘h heh-sio͘h” kiâⁿ kah chàu-kha, kā thô-á chhāi tī toh téng, a-pô--ā the̍h 1 ki to beh hō͘ a-kong--a thâi, a-kong ka kóng: “Chit ki siuⁿ iù-siù--lah! The̍h siāng tōa ki--ê hit ki lâi!” To-á the̍h--tio̍h, 1 to to̍h phut--lo̍h-khì, thô-á bah chèng-keng ū kàu phang, tú phòa 1 sûn niâ, í-keng phīⁿ tio̍h thô-á bī, chhùi-lāi sûi seⁿ kah lóng chhùi-nōa, kín thun--lo̍h-khì, to-kheng chhi̍h--leh, tng beh chhut-la̍t koh phòa--lo̍h-khì ê sî, hiông-hiông thiaⁿ tio̍h sè-sè-siaⁿ-á ê khàu-siaⁿ.

A-pô--ā mn̄g: “Lí kám ū thiaⁿ--tio̍h?” Ìn kóng: “Ū neh! Kài-sêng gín-á teh khàu?!” 2 ê lâng chit-chūn koh thiaⁿ tio̍h “Thong, thong, thong” ê siaⁿ, siaⁿ kài-sêng sī ùi thô-á hia lâi--ê. Khàu-siaⁿ jú thiaⁿ jú bêng, “Thong, thong, thong” mā jú lâi jú tōa-siaⁿ. A-kong--a sim-lāi giâu-gî, kā a-pô--ā kóng “Kám kóng che thô-á lāi-té ū gín-á?” A-pô--ā ìn kóng: “Bô lán 2 ê lâi kā thô-á peh khui khòaⁿ-māi--leh.” To-á poe̍h--khài, 2 ê lâng 4 ki chhiú bô-êng chhih-chhih chò-hóe peh hit lia̍p thô-á, hiông-hiông phia̍k--1-ē, thô-á li̍h chò 2 pêng, lāi-té chin-chiàⁿ chhàng 1 ê âng-eⁿ-á, siang-kha siang-chhiú liòng--leh liòng--leh, tōa-siaⁿ teh háu, ū seⁿ

lān-chiáu-á, sī 1 ê oa̍h-thiàu-thiàu ê cha-po͘ gín-á. A-pô--ā hoaⁿ-hí kah beh tio̍h poa̍h, ná chhiò ná lâu ba̍k-sái, kóng: “Che it-tēng sī thiⁿ-kong-peh--à thiàⁿ-sioh--lán, beh sù lán chit ê hāu-seⁿ!” Mā m̄-koán gín-á kui seng-khu khì hō͘ thô-á-chiap kō kah liâm-thi-thi, liâm-mi to̍h kā gín-á phō tī heng-chêng ka tah. Gín-á khì hō͘ a-pô phō leh tah liáu-āu, hoān-sè sī kám-kak tio̍h ū lâng koan-sim ū lâng sioh, mā bô koh kè-sio̍k khàu--ah, ba̍k-chiu sì-kè khòaⁿ, kài-sêng kám-kak thô-á gōa-kháu ê hoa-hoa sè-kài kài sim-sek án-ne. Chit chūn a-pô--ā kā a-kong kóng: “Mài chhiūⁿ he chhâ-thâu ang-á chhāi tī hia, lí kín khì thàng-suh hiaⁿh 1 niá tōa niá ê pò͘-kin-á lâi, thang kā i pau--leh, góa kiaⁿ i kôaⁿ--tio̍h, sòa--lòe to̍h khì hiâⁿ kóa sio-chúi, hiâⁿ hó kā góa kiò, kín kā i sé-sé--leh i ē khah sóng-khoài!” A-kong--a ìn 1 siaⁿ “Hiò͘” sûi to̍h tín-tāng. Tāi-chì kau-tài soah, a-pô--ā oa̍t thâu ba̍k-chiu kim-kim lia̍h êⁿ-á chîn, kā gín-á kóng: “Lí ba̍k-chiu tōa-lúi îⁿ-kùn-kùn, phīⁿ-á seⁿ chò lêng-lêng-lêng, chhùi-kak khiàu-khiàu ná lêng-kak, tōa-hàn it-tēng kài iân-tâu! O͘h! Chhùi-khí í-keng hoat 2 ki--ah neh!” Jú khòaⁿ jú kó͘-chui, jú siòng jú khó-ài. Kòe bô jōa kú, to̍h thiaⁿ tio̍h khan-chhiú--ê teh hiu, iû-koh sī chông lâi chông khì, bô-êng chhih-chhih.

Chhiâu-chhe̍k 1-chām-á liáu-āu, tāi-chì chóng-sǹg sī lóng khoán sūn-sī, lāu-kong-pô-á iû-koh iau--khí-lâi, 2 ê lâng kā gín-á phō--leh, óa khì pn̄g-toh-á hia khòaⁿ hit 2 pêng thô-á. Kóng--khí-lâi mā kài kî-koài, thô-á té 1 ê eⁿ-á, thô-á bah soah kài chèng-siông, kah it-poaⁿ ê sè-lia̍p thô-á thâi--khí-lâi kāng-khoán, to̍h sī ke chin phang. In ang-á-bó͘ khòaⁿ he thô-á bah n̂g-gìm-gìm, chúi-hun

pá-tīⁿ kah ē sih kim-kng, phang-khùi chhèng phīⁿ-khang, pak-tó͘ koh iau kah ē tân lûi-kong, chhùi-nōa chá to̍h m̄ chai-iáⁿ thun kúi chhùi lo̍h tō͘. Lāu-a-kong seng chhut-siaⁿ: “Bô góa seng lâi chhì 1-chhùi-á khòaⁿ-māi--leh…” Thng-sî-á the̍h--leh, khat 1-sut-á-kiáⁿ, to̍h hē lo̍h-khì chhùi--ni̍h, pō͘-pō͘--leh, thun--lo̍h-khì. A-pô--ā sī it-ti̍t chin chim-chiok teh koan-chhat a-kong--a chhì-chia̍h, khòaⁿ a-kong--a kā thô-á thun--lo̍h-khì, ka-tī mā tòe leh thun 1-chhùi chhùi-nōa. Koh lâi to̍h khòaⁿ tio̍h a-kong--a taⁿ thâu ǹg thiⁿ, ba̍k-chiu kheh-kheh, ba̍k-sái soah ti̍t-ti̍t lâu, hit-lō piáu-chêng, kúi cha̍p nî chêng a-pô--ā bat khòaⁿ kòe 1 piàn. Hit sî thô-á nâ ê thô-hoe khui kah chin chhiaⁿ-iāⁿ, hoe ia̍p lī hoe, hō͘ chhun-hong chhoe kah móa-thiⁿ iāⁿ-iāⁿ poe, to̍h sī hit tang-chūn, a-pô--ā tī thô-hoe chhiū-kha tah-èng beh hâm a-kong tàu-tīn 1-sì-lâng, a-kong--a ê bīn-á to̍h sī chit-lō piáu-chêng. “Sī thô-á….” Tùn--1-ē liáu-āu a-kong--a kā ba̍k-sái hôe tiāu kè-sio̍k kóng: “Sī chok hó chia̍h ê thô-á….” A-pô ìn: “Sī jōa hó chia̍h hō͘ lí kám-tōng kah án-ne?” A-kong ìn: “Chia̍h khòaⁿ-māi--leh lí to̍h chai!” A-pô kóaⁿ-kín ó͘ 1 thng-sî khǹg lo̍h chhùi, ta̍uh-ta̍uh-á pō͘. Chit sî, a-pô--ā ê piáu-chêng mā piàn--ah. Nā chún-kóng kan-na iōng phīⁿ--ê, he phang-bī chhin-chhiūⁿ chē tī mn̂g-kha-kháu nah-liâng ê sî chhiu-chhìn ê hong, pō͘--lo̍h-khì ê sî-chūn, soah chhin-chhiūⁿ kńg-lê-á-hong tī chhùi lāi ká bē thêng, kā ka-tī tùi phang-bī ê jīn-bat, ká-ká chò 1 hóe, lóng-chóng ián liáu-liáu, 1-sì-lâng m̄ bat chia̍h kòe hiah hó chia̍h ê mi̍h. 2 ê lâng chŏaⁿ 1 chhùi sòa 1 chhùi, ti̍t-ti̍t chia̍h, it-ti̍t chia̍h kah chia̍h bē--lo̍h-khì. Chhiú kah chhùi chiah thêng--lo̍h-lâi. Kàu chit-chūn, chiah siūⁿ tio̍h gín-á lóng bô chia̍h, kám-kak chiâⁿ pháiⁿ-sè, kóaⁿ-kín iōng thng-sî-á khat thô-á-chiap chhī eⁿ-á, eⁿ-á mā bô hoán-khòng, hoān-sè sī it-ti̍t tòa tī thô-á lāi-té, chá to̍h koàn-sì chit-lō khì-bī, to̍h it-ti̍t chia̍h kah pá chiah m̄ chia̍h.

Gín-á chia̍h-pá--ah, to̍h khai-sí tuh-ku, a-pô--ā to̍h kā phō khì bîn-chhn̂g téng ho͘ tó--leh, gín-á khùn-sîn kàu, chin-kín to̍h khùn kah chok lo̍h-bîn, kàu taⁿ, in ang-á-bó͘ chóng-sǹg sī bô-êng kàu 1 ê khám-chām, ū châi-tiāu chē tī thiaⁿ--ni̍h ha 2-chhùi-á sio-tê.

“Ū kàu bô-êng, ū-kàu bô-êng, m̄-koh mā ū-kàu hoaⁿ-hí….” A-pô--ā seng khui chhùi. A-kong ìn kóng: “Hèⁿ--à, kin-á-ji̍t ke 1 ê kiáⁿ, lán ū hāu-seⁿ--a.” A-pô koh kóng: “Lán beh ka hō siáⁿ-mih miâ?” A-kong--a siūⁿ-siūⁿ--leh kóng: “Hóe-ōng hó--bô? Hō͘ lán hiuⁿ-hóe ōng-ōng-ōng!” A-pô--ā ìn kóng: “Taⁿ che siáⁿ-mih sî-tāi--ā, ka hō 1 ê khah ngá-khì ê miâ hó--bô?” A-kong--a siūⁿ-siūⁿ--leh koh kóng: “Bô, Chìn-châi--leh? Hō͘ i í-āu seng-oa̍h lóng bián hoân-ló!” A-pô--ā ìn: “Lán mā bô siáⁿ chîⁿ, ji̍t-chí m̄ sī kòe tio̍h siau-iâu koh chū-chāi, koh siūⁿ khòaⁿ-māi--leh-lah.” Sòa--lo̍h-lâi ê Thian-sù, Bûn-hiông, Kim-ōng, Kim-súi, Chì-bêng, a-pô lóng bô tông-ì. A-pô siūⁿ kóng “Kè i hiah kú--ah, lóng m̄ chai-iáⁿ i hō-miâ siàn-suh chiah-nī bái, góa nā lóng bô lâi thê ì-kiàn, tán--leh khì hō tio̍h góa bô kah-ì ê miâ, tāi-chì to̍h pháiⁿ siu soah.” Kóng: “Kì-jiân gín-á sī ùi thô-á chhut-sì--ê, kah thô-á hiah ū-iân, lán lâi kì-liām chit kiāⁿ tāi-chì, mā hō͘ i m̄-thang bē kì-tit i ê chhut-sin, lán ka hō chò thô thai…” Siáng chai a-pô--ā ōe kan-na kóng kàu 1 pòaⁿ, liân tē 3 tiāu to̍h iáu-bē phiat--lo̍h-khì ê sî, a-kong hiông-hiông chin kiông-sè chhah-chhùi: “Hó! Lán to̍h ka hō chò A-lông! To̍h án-ne!” A-pô m̄-chai a-kong sim-lāi ū siáⁿ-mih bē-tàng kóng-bêng ê in-toaⁿ, hiông-hiông to̍h beh kā tāi-chì án-ne koat--lo̍h-lâi, m̄-koh chêng siàu-liân sî, i to̍h chin kah-ì a-kong chit-lō khì-phek, tong-chho͘ tī thô-hoe-chhiū kha, mā sī saⁿh tio̍h i chit-lō khì-phek, chiah koat-tēng beh kè--i, koh-chài kóng, A-lông chit ê miâ hó kiò, hó thiaⁿ, koh hó kì, mā bô siáⁿ-mih lí-iû thang koh hoán-tùi, ìn kóng: “Hó--lah, lóng sûi-chāi--lí.” Kóng-ōe ê siaⁿ tài tām-po̍h-á sai-nai. Chit sî a-kong--a ùi í-á peh--khí-lâi, chhun chhiú kā a-pô--ā ùi í-á téng giú--khí-lâi, kóng: “Kiâⁿ, lán lâi-khì khòaⁿ A-lông khùn tio̍h ū sù-sī--bô?” Hoān-sè sī siūⁿ tio̍h siàu-liân sî tng teh loân-ài ê chêng-kéng, a-pô--ā hông giú--khí-lâi liáu-āu, sūn-sè to̍h nòa khì a-kong--a ê seng-khu, bīn-á sió-khóa âng-âng, kóng-ōe ê kháu-khì koh jú sai-nai: “Che mā lóng sûi-chāi--lí-lah”, a-kong--a mā chin chū-jiân kā a-pô--ā ê io lám--leh, 2 ê lâng to̍h án-ne chòe-tīn kiâⁿ khì pâng lāi….

Chit mê, in ang-á-bó͘ 1 lâng khùn 1 pêng, A-lông khùn tiong-ng. 2 lâng pêng-cheng ê seng-oa̍h koh chài-lâi ke 1 ê gín-á it-tēng ke chin lāu-jia̍t, jîn-seng mā koh ke 1 ê ǹg-bāng, 2 ê lāu-kong-pô chhiú khan chhiú, sim-lāi kám-kek koh hoaⁿ-hí, bî-bî-á chhiò, bô-êng kui kang, í-keng kài thiám, bô jōa-kú in 2 ê to̍h lóng khùn--khì-ah. Tāi-khài, che to̍h sī hēng-hok ê chu-bī.

時間將近beh日晝，老a公--a這時柴mā khioh好--ah，taⁿ 2大tàⁿ已經行beh到厝。「Heh-heh！Án-ne to̍h免煩惱煮飯hiâⁿ火無柴thang用--ā！」人seng行ùi後門去，kā火柴家私頭á收kui位，liâm-mi to̍h去看食飯桌有siáⁿ thang食。「Ĕ！Soah無chú？Nah ē án-ne？」人oa̍t去廳--ni̍h，to̍h看tio̍h a婆--ā the tī椅á頂teh喘氣，siān-tauh-tauh ê形，心內煩惱，隨時to̍h問：「Taⁿ是án-nóa--ah，你thài ē tī hia直直喘？」A婆應講：「To去mo͘h 1粒桃á --轉-來！」A公koh問：「Mo͘h 1粒桃á有才調喘kah án-ne？」A婆應：「Tī門口埕你ka-tī看。」A公--a行到門脚口，sûi to̍h看tio̍h hit粒桃á，chhoah 1 tiô倒退3步，險poa̍h--倒，嘴講「Nah…，nah ē hiah大…，taⁿ súi-bó͘--eh，che beh án-chóaⁿ khah好？」A婆ná行來門脚口ná應：「我to̍h知影你ē tio̍h驚，我mā是m̄知beh án-chóaⁿ處理，chiah teh等你轉來beh做夥參詳。」2 ê人sio-siòng，koh做夥看桃á，koh sio-siòng，koh看桃á，m̄知beh án-chóaⁿ。Hiông-hiông聽tio̍h 1聲腹肚kū-kū叫ê聲，a婆--ā笑笑á kā a公講：「Iau--a hōⁿ？」A公--a歹勢歹勢，手so腹肚，笑leh應講：「人sang--落-來，soah iau--起-來。」A婆講：「我thiám kah m̄知thang煮飯，無咱來kā chit粒桃á thâi-thâi--leh，seng止iau--1-ē好--無？來，你來kā我tàu lêng去食飯桌。」

2 ê人chiū án-ne 1人1 pêng，桃á lêng--leh，「heh-sio͘h heh-sio͘h」行kah灶脚，kā桃á chhāi tī桌頂，a-婆--ā the̍h 1枝刀beh hō͘ a公--a thâi，a公ka講：「Chit枝siuⁿ幼秀--lah！The̍h siāng大枝--ê hit枝來！」刀á the̍h--tio̍h，一刀to̍h phut--落-去，桃á肉正經有夠phang，tú破1 sûn niâ，已經鼻tio̍h桃á味，嘴內sûi生kah lóng chhùi-nōa，緊吞--落-去 ，刀kheng chhi̍h--leh，tng beh出力koh破--落-去ê時，hiông-hiông聽tio̍h細細聲á ê哭聲。

A婆--ā問：「你kám有聽--tio̍h？」應講：「有neh！Kài-sêng gín-á teh哭？！」2 ê人chit-chūn koh聽tio̍h「Thong，thong，thong」ê聲，聲kài-sêng是ùi桃á hia來--ê。哭聲jú聽jú明，「Thong，thong，thong」mā jú來jú大聲。A公--a心內憢疑，kā a婆--ā講「Kám講che桃á內底有gín-á？」A婆--ā應講：「無咱2 ê來kā桃á peh開看māi--leh。」刀á poe̍h--khài，2 ê人4 ki手無閒chhih-chhih做夥peh hit粒桃á，hiông-hiông phia̍k--1-ē，桃á li̍h做2 pêng，內底真正chhàng 1 ê紅嬰á，雙脚雙手liòng--leh liòng--leh，大聲teh háu，有生lān鳥á，是1 ê活跳跳ê cha-po͘ gín-á。A婆--ā歡喜kah beh tio̍h poa̍h，ná笑ná流目屎，講：「Che一定是天公伯--à疼惜--lán，beh賜咱chit ê hāu-seⁿ！」Mā m̄-koán gín-á kui seng-khu去hō͘桃á汁kō kah黏thi-thi，liâm-mi to̍h kā gín-á抱tī胸前ka tah。Gín-á去hō͘ a婆抱leh tah了後，凡勢是感覺tio̍h有人關心有人惜，mā無koh繼續哭--ah，目睭四界看，kài-sêng感覺桃á外口ê hoa-hoa世界kài心適án-ne。Chit chūn a婆--ā kā a公講：「Mài chhiūⁿ he柴頭尪á chhāi tī hia，你緊去thàng-suh hiaⁿh 1 niá大niá ê布巾á來，thang kā伊包--leh，我kiaⁿ伊寒--tio̍h，sòa--lòe to̍h去hiâⁿ kóa燒水，hiâⁿ好kā我叫，緊kā伊洗洗--leh伊ē khah爽快！」A公--a應1聲「Hiò͘」sûi to̍h tín動。Tāi-chì交帶soah，a婆--ā oa̍t頭目睭金金lia̍h eⁿ-á chîn，kā gín-á講：「你目睭大蕊圓kùn-kùn，鼻á生做lêng-lêng-lêng，嘴角翹翹ná菱角，大漢一定kài緣投！O͘h！嘴齒已經發2 ki--ah neh！」Jú看jú古錐，jú相jú可愛。過無jōa久，to̍h聽tio̍h牽手--ê teh hiu，iû-koh是chông來chông去，無閒chhih-chhih。

Chhiâu-chhe̍k 1-chām-á了後，tāi-chì總算是lóng款順sī，老公婆á iû-koh iau--起-來，2 ê人kā gín-á抱--leh，óa去飯桌á hia看hit 2 pêng桃á。講--起-來mā kài奇怪，桃á té 1 ê eⁿ-á，桃á肉soah kài正常，kah一般ê細粒桃á thâi--起-來kāng-khoán，to̍h是ke真phang。In ang-á-bó͘看he桃á肉黃gìm-gìm，水分飽tīⁿ kah ē sih金光，phang-khùi chhèng鼻khang，腹肚koh iau kah ē tân雷公，嘴nōa早to̍h m̄知影吞幾嘴lo̍h tō͘。老a公seng出聲：「無我先來試1嘴á看māi--leh…」湯匙á the̍h--leh，khat 1-sut-á-kiáⁿ，to̍h hē落去嘴--ni̍h，pō͘-pō͘--leh，吞--落-去。A婆--ā是一直真斟酌teh觀察a公--a試食，看a公--a kā桃á吞--落-去，ka-tī mā tòe leh吞1嘴嘴nōa。Koh來to̍h看tio̍h a公--a taⁿ頭ǹg天，目睭kheh-kheh，目屎soah直直流，hit-lō表情，幾十年前a婆--ā bat看過1遍。Hit時桃á林ê桃花開kah真chhiaⁿ-iāⁿ，花ia̍p lī花，hō͘春風吹kah滿天iāⁿ-iāⁿ飛，to̍h是hit tang-chūn，a婆--ā tī桃花樹脚答應beh hâm a公鬥陣1世人，a公--a ê面á to̍h是chit-lō表情。「是桃á…。」Tùn--1-ē了後a公--a kā目屎hôe掉繼續講：「是chok好食ê桃á…。」A婆應：「是jōa好食hō͘你感動kah án-ne？」A公應：「食看māi--leh你to̍h知！」A婆趕緊ó͘ 1湯匙khǹg落嘴，ta̍uh-ta̍uh-á pō͘。Chit時，A婆--ā ê表情mā變--ah。Nā準講kan-na用鼻--ê，he phang味親像坐tī門脚口nah涼ê時chhiu-chhìn ê風，pō͘--落-去ê時chūn，soah親像卷螺á風tī嘴內ká bē停，kā ka-tī對phang味ê認bat，ká-ká做1夥，lóng總ián了了，1世人m̄ bat食過hiah好食ê mi̍h。2 ê人chŏaⁿ 1嘴sòa 1嘴，直直食，一直食kah食bē --落-去。手kah嘴chiah停--落-來。到chit-chūn，chiah想tio̍h gín-á lóng無食，感覺chiâⁿ歹勢，趕緊用湯匙á khat桃á汁飼eⁿ-á，eⁿ-á mā無反抗，凡勢是一直tòa tī桃á內底，早to̍h慣勢chit-lō氣味，to̍h一直食kah飽chiah m̄食。

Gín-á食飽--ah，to̍h開始tuh-ku，a婆--ā to̍h ka抱去眠床頂ho͘倒--leh，gín-á睏神到，真緊to̍h睏kah chok落眠，到taⁿ，in ang-á-bó͘總算是無閒到1 ê khám-chām，有才調坐tī廳--ni̍h ha 2嘴á燒茶。

「有夠無閒，有夠無閒，m̄-koh mā有夠歡喜…。」A婆--ā先開嘴。A公應講：「Hèⁿ--à，今á日ke 1 ê kiáⁿ，咱有hāu-seⁿ--a。」A婆koh講：「咱beh ka號siáⁿ-mih名？」A公--a想想--leh講：「火旺好--無？Hō͘咱香火旺旺旺！」A婆--ā應講：「Taⁿ che siáⁿ-mih時代--ā，ka號1 ê khah雅氣ê名好--無？」A公--a想想--leh koh講：「無，進財--leh？Hō͘伊以後生活lóng免煩惱！」A婆--ā應：「咱mā無siáⁿ錢，日子m̄是過tio̍h消遙koh自在，koh想看māi--leh-lah。」Sòa--落-來ê天賜，文雄，金旺，金水，志明，a婆lóng無同意。A婆想講「嫁伊hiah久--ah，lóng m̄知影伊號名ê siàn-suh chiah-nī bái，我nā lóng無來thê意見，等--leh去號tio̍h我無kah意ê名，tāi-chì to̍h pháiⁿ收soah。」講：「既然gín-á是ùi桃á出世--ê，kah桃á hiah有緣，咱來紀念chit件tāi-chì，mā hō͘伊m̄-thang bē記得伊ê出身，咱ka號做桃thai…」Siáng知A婆--ā話kan-na講到1半，連tē 3調to̍h iáu-bē撇--落-去ê時，a公hiông-hiông真強勢插嘴：「好！咱to̍h ka號做A郎！To̍h án-ne！」A婆m̄知a公心內有siáⁿ-mih bē-tàng講明ê in-toaⁿ，hiông-hiông to̍h beh kā tāi-chì án-ne koat--落-來，m̄-koh chêng少年時，伊to̍h真kah意a公chit-lō氣魄，當初tī桃花樹脚，mā是saⁿh tio̍h伊chit-lō氣魄，chiah決定beh嫁--伊，koh再講，A郎chit ê名好叫，好聽，koh好記，mā無siáⁿ-mih理由thang koh反對，應講：「好--lah，lóng隨在--你。」講話ê聲tài淡薄á sai-nai。Chit時a公--a ùi椅á peh--起-來，chhun手kā a婆--ā ùi椅á頂giú--起-來，講：「行，咱來去看A郎睏tio̍h有sù-sī--無？」凡勢是想tio̍h少年時tng teh戀愛ê情境，a婆--ā hông giú--起-來了後，順勢to̍h nòa去a公--a ê seng-khu，面á sió-khóa-á紅紅，講話ê口氣koh jú sai-nai：「Che mā lóng隨在--你lah」，a公--a mā真自然kā a婆--ā ê腰攬--leh，2 ê人to̍h án-ne做tīn行去房內…。

Chit mê，in ang-á-bó͘ 1人睏1 pêng，A郎睏中央。2人平靜ê生活koh再來ke 1 ê gín-á一定ke真lāu-jia̍t，人生mā koh ke 1 ê ǹg望，2 ê老公婆手khan手，心內感激koh歡喜，微微á笑，無閒kui kang，已經kài thiám，無jōa久in 2 ê to̍h lóng睏--去-ah。Tāi-khài，che to̍h是幸福ê滋味。

--

Hosting provided by SoundOn