[官方網站 Koaⁿ-hong bāng-chām]

https://cho-kang-a-lang.github.io/

[Podcast]

SoundOn

https://bit.ly/ChKaL_SO

Spotify

https://spoti.fi/48jD2tI

KKBOX Podcast

https://bit.ly/ChKaL_KK

Apple Podcast

https://apple.co/3HZyfD3

Google Podcasts

https://ppt.cc/fpPKUx

YouTube Podcast

https://bit.ly/ChKaL_YT

[社交平台 Siā-kau Pêⁿ-tâi]

YouTube

https://bit.ly/ChKaL_YT

Facebook

https://bit.ly/ChKaL_FB

Instagram

https://www.instagram.com/chokangalang/

X (Twitter)

https://twitter.com/chokangalang

方格子

https://vocus.cc/salon/cho-kang-a-lang

以下是故事ê漢羅kah白話字原稿，有需要ē-tàng參考。

【漢羅版】

查某人行到桌á邊，手--ni̍h ê薰吹ùi桌頂輕輕á khà--1-ē，A郎in 2人chiah hiông-hiông回魂，知影ài注心聽人講話。Chit時查某人講：「聽講lín 2 ê無錢thang la̍p siàu？」Tang-sî-á chit ê查某人to̍h是雉雞姊，A郎in 2人趕緊khiā--起-來，A郎tāi先hōe失禮講：「雉雞姊，真失禮，goán食mi̍h-kiāⁿ進前無先探聽行情，食飽了後chiah知影goán錢無夠thang la̍p，a̍h是講，goán kha-báng內底koh有1 kóa ian魚kah chu̍t米丸á，kám ē-tàng the̍h來chhē-siàu？」應講：「Goán開店做生理to̍h是beh thàn錢，bē-tàng hō͘ lín the̍h mi̍h來tú siàu。」A明接落去講：「Kám ē-tàng拜托雉雞姊手紗giâ koân-koân，hō͘ gún機會，看有siáⁿ-mih辦法thang處理？Gún實在m̄知ē食kah hiah chē錢！」Che雉雞姊thó͘ 1口大khùi，薰吹the̍h起來pok--2-嘴，lia̍h A郎斟酌siòng--1-ē，koh lia̍h A明斟酌siòng--1-ē，想想--leh講：「Chit lō tāi-chì mā m̄是無thang參詳lah！Goán酒樓本底to̍h是庄á內siāng出名，用料實在，煮食ê手路mā kài要求，價siàu貴是應當。我看lín 2 ê是古意人，mā真誠意beh處理，無lín tī chia做工tú siàu，1 kang 1 ê人工錢10 kho͘，做5 kang tú好100，án-ne lín看好--無？」A郎in 2人mā無thang kéng，隨時to̍h應好。雉雞姊oa̍t頭叫走桌--ê來，吩咐講：「順祥--ā，Chit 2 ê人ùi今á日開始，ài tī咱chia做工tú siàu，你chhōa in去長工房kā行李hē--leh，有siáⁿ ē-tàng吩咐in做--ê，to̍h叫in去做，三頓kah咱ê脚手做夥食，其他ê tāi-chì交hō͘你phah派to̍h好。」自án-ne，A郎in 2人soah無張持變做做工á人。

酒樓生理ka-ia̍h，in 2人ài一直無閒到半暝chiah有thang歇睏，睏是tī長工房，土脚蓆á chhu--leh to̍h thèng-hó睏，2人準備beh睏ê時，A明講：「主公，m̄知tī chia做khang-khòe hiah thiám，外口人客歡喜teh用酒菜，咱tī內底piàⁿ kah汗流sám滴，chông起chông落，1時mā無thang停睏！」A郎應講：「有影，chín chiah知影外口ê人客ē-tàng hiah享受，lóng是ài有後場hiah chē人認真phah拚tàu支援，chiah有才調提供hiah好ê服務，in貴是貴tio̍h有道理，kan-na脚手to̍h chhiàⁿ kah hiah chē--ā，tio̍h--無？」A明koh應：「咱chiah phah拚，lóng是為tio̍h天下萬民lah！」「M̄是！咱是lak袋á袋磅子，去hông吊猴！」A郎無ka thuh臭心內實在bē爽快。

To̍h án-ne，in 2 ê人sòa--落-來ê 5 kang做人ê雜差á，破柴擔水，添柴顧火，洗菜切料，phâng菜款桌面，便nā順祥交帶，in to̍h做，脚手mé-lia̍h無拖砂，透早piàⁿ kah透暗。

第5 kang暗時，siōng尾1桌人客kiat-siàu了後，雉雞姊kā in 2 ê叫去伊ê辦公廳，好禮á請in坐--leh，泡茶請in lim，講：「Chit 5 kang，lín ê表現我lóng看在眼內，順祥mā o-ló lín真骨力，好chhe-kah，是好kha-siàu，我當初無看m̄ tio̍h，lín真正是古意人，我有leh想kóng beh留lín 2 ê落來做長工，khang-khòe ê內容咱ē-tàng ta̍uh-ta̍uh-á參詳，m̄知lín kám有意願留--落-來？」A明sûi應講：「我kah主公是為tio̍h天下萬民teh phah拚，gún koh有要緊ê tāi-chì ài做，你kám知影nā beh hō͘ ta̍k人lóng好gia̍h，lóng有飯thang食，頭起先to̍h ài…」Chit時A郎知影A明ê症頭koh beh giâ--起-來，趕緊插話，kā beh去南島phah歹人ê tāi-chì詳細講hō͘雉雞姊聽，便nā tú-tio̍h聽無清楚ê所在，雉雞姊koh ē繼續問kah lóng-chóng了解，對A郎in ê故事真有趣味ê款。3 ê人講kah心花tng開ê時，A郎mā kā厝--ni̍h chah--來ê chu̍t米丸á the̍h出來請雉雞姊食，雉雞姊食--tio̍h，o-ló kah ē tak舌，講：「無食m̄知影，食--tio̍h chiah知chán，kám ē-tàng kā goán教beh án-chóaⁿ做，che絕對ē-tàng當做鳳凰酒樓ê特產來賣！」A郎應講：「有四種口味ŏ͘！」A郎mā知影雉雞姊對in bē-bái，無kā in送官府，koh hō͘ in有機會thang做工還siàu，人kah人lóng ài互相，好來好去，to̍h kā做法詳細講hō͘雉雞知，mā無藏步，鋩鋩角角lóng詳細交帶。雉雞mā kā做法1步1步詳細抄--落-來，聽無真--ê koh斟酌問，筆記做好，叫順祥來，吩咐chit 2 kang叫總舖師照筆記做看māi，nā順sī，to̍h當做新產品鼓舞人客來交關。Koh kā A郎講，nā新產品pháng ē行，顧問費絕對bē chhìn-chhái。Hit暝3 ê人káng kah真投機，一直到真òaⁿ chiah soah鼓歇睏。

隔轉kang，A郎in早頓食了tng leh款行李準備beh起行ê時，雉雞姊來chhōe--in，面á素素mā無點胭脂，穿--ê mā m̄是in慣勢看--tio̍h ê hit niá khóng色洋裝，換做穿1領白色ê kah-á kah笑青色ê長褲，A明感覺奇怪，問講：「雉雞姊，你nah ē穿án-ne？Kám是今á日歇睏無beh顧店？」雉雞姊應講：「Chăng hâm lín 2 ê講話講kah kài投機，mā感覺lín beh做ê tāi-chì kài有意義，我決定beh chham lín做夥去！」A郎問講：「Án-ne你店beh án-chóaⁿ？」應講：「順祥tī chia做kài久--ah，人頂真koh老實，店交hō͘伊hōaⁿ應當是無siáⁿ問題。」A郎滾sńg笑講：「Án-ne hit kóa為tio̍h beh來看--你，ta̍k遍 --入-來lóng kan-na叫1項菜ê老主顧一定ē kài失望。」雉雞姊應講：「In lóng是好人客--lah，lóng kài斯文kài紳士，而且goán chiah-nī用心煮食，款待人客，相信in ē繼續來捧場chiah tio̍h。行lah！咱做陣去灶脚款kóa食mi̍h，thang tī路--ni̍h食。」

3 ê人去到灶脚，雉雞姊吩咐東吩咐西，che a̍h beh the̍h，he a̍h to̍h chah，路尾3 ê人ê行李soah變kah kui大堆，A郎kah A明有建議講mài chah hiah chē，雉雞姊真堅持，講：「Goán查某--ê無chhiūⁿ lín查埔--ê hiah chhìn-chhái，goán做tāi-chì khah幼路，本底出門to̍h ài chhoân khah chē mi̍h-kiāⁿ。」Koh kā in 2 ê查埔--ê拜托kiam ko͘-chiâⁿ。2 ê少年家nah ē kham-tit美女án-ne拜托kiam sai-nai，尾--á 2 ê人lóng ke tàu phāiⁿ chin chē mi̍h-kiāⁿ，mā為tio̍h án-ne ke舞kui半po͘，一直到中晝食飽，3 ê人chiah出發，大包細包tùi大路繼續行--落-去。

【Pe̍h-ōe-jī pán】

Cha-bó͘-lâng kiâⁿ kàu toh-á piⁿ, chhiú--ni̍h ê hun-chhoe ùi toh-téng khin-khin-á khà--1-ē, A-lông in 2 lâng chiah hiông-hiông hôe-hûn, chai-iáⁿ ài chù-sim thiaⁿ lâng kóng ōe. Chit sî cha-bó͘-lâng kóng: “Thiaⁿ kóng lín 2 ê bô-chîⁿ thang la̍p siàu?” Tang-sî-á chit ê cha-bó͘-lâng to̍h sī Thī-ke-

ché

. A-lông in 2 lâng kóaⁿ-kín khiā--khí-lâi, A-lông tāi-seng hōe-sit-lé kóng: “Thī-ke-

ché, chin sit-lé, goán chia̍h mi̍h-kiāⁿ chìn-chêng bô seng thàm-thiaⁿ hâng-chêng, chia̍h-pá liáu-āu chiah chai-iáⁿ goán chîⁿ bô-kàu thang la̍p, a̍h-sī kóng, goán kha-báng lāi-té koh ū 1-kóa ian-hî kah chu̍t-bí-oân-á, kám ē-tàng the̍h lâi chhē-siàu?” Ìn kóng: “Goán khui-tiàm chò seng-lí to̍h sī beh thàn-chîⁿ, bē-tàng hō͘ lín the̍h mi̍h lâi tú siàu.” A-bêng chiap-lo̍h-khì kóng: “Kám ē-tàng pài-thok Thī-ke-ché chhiú-se giâ koân-koân, hō͘ gún ki-hōe, khòaⁿ ū siáⁿ-mih pān-hoat thang chhú-lí? Gún si̍t-chāi m̄-chai ē chia̍h kah hiah chē chîⁿ!” Che Thī-ke-ché thó͘ 1 kháu tōa-khùi, hun-chhoe the̍h khí-lâi pok--2-chhùi, lia̍h A-lông chim-chiok siòng--1-ē, koh lia̍h A-bêng chim-chiok siòng--1-ē, siūⁿ-siūⁿ--leh kóng: “Chit lō tāi-chì mā m̄-sī bô-thang chham-siông lah! Goán chiú-lâu pún-té to̍h sī chng-á lāi siāng chhut-miâ, iōng liāu si̍t-chāi, chú-chia̍h ê chhiú-lō͘ mā kài iau-kiû, kè-siàu kùi sī èng-tong. Góa khòaⁿ lín 2 ê sī kó͘-ì lâng, mā chin sêng-ì beh chhú-lí, bô lín tī chia chò-kang tú siàu, 1 kang 1 ê lâng kang-chîⁿ 10 kho͘, chò 5 kang tú-hó 100, án-ne lín khòaⁿ hó--bô?” A-lông in 2 lâng mā bô-thang kéng, sûi-sî to̍h ìn hó. Thī-ke-ché oa̍t-thâu kiò cháu-toh--ê lâi, hoan-hù kóng: “Sūn-siông--ā, chit 2 lâng ùi kin-á-ji̍t khai-sí, ài tī lán chia chò-kang tú siàu, lí chhōa in khì tn̂g-kang-pâng kā hêng-lí hē--leh, ū siáⁿ ē-tàng hoan-hù in chò--ê, to̍h kiò in khì chò, saⁿ-tǹg kah lán ê kha-chhiú chò-hóe chia̍h. Kî-thaⁿ ê tāi-chì kau hō͘ lí phah-phài to̍h hó.” Chū án-ne, A-lông in 2 lâng soah bô-tiuⁿ-tî piàn-chò chò-kang-á-lâng.

Chiú-lâu seng-lí ka-ia̍h, in 2 lâng ài it-ti̍t bô-êng kàu pòaⁿ-mê chiah ū thang hioh-khùn, khùn sī tī tn̂g-kang pâng, thô͘-kha chhio̍h-á chhu--leh to̍h thèng-hó khùn, 2 lâng chún-pī beh khùn ê sî, A-bêng kóng: “Chú-kong, m̄-chai tī chia chò khang-khòe hiah thiám, gōa-kháu lâng-kheh hoaⁿ-hí teh ēng chiú-chhài, lán tī lāi-té piàⁿ kah kōaⁿ-lâu-sám-tih, chông khí chông lo̍h, 1 sî mā bô thang thêng-khùn!” A-lông ìn kóng: “Ū-iáⁿ, chín chiah chai-iáⁿ gōa-kháu ê lâng-kheh ē-tàng hiah hiáng-siū, lóng sī ài ū āu-tiûⁿ hiah chē lâng jīn-chin phah-piàⁿ tàu chi-oān, chiah ū châi-tiāu thê-kiong hiah hó ê ho̍k-bū, in kùi sī kùi tio̍h ū tō-lí, kan-na kha-chhiú to̍h chhiàⁿ kah hiah chē--ā, tio̍h--bô?” A-bêng koh ìn: “Lán chiah phah-piàⁿ, lóng sī ūi tio̍h thian-hā-bān-bîn lah!” “M̄-sī! Lán sī lak-tē-á tē pōng-chí, khì hông tiàu-kâu!” A-lông bô ka thuh-chhàu sim-lāi si̍t-chāi bē sóng-khoài.

To̍h án-ne, in 2 ê lâng sòa--lo̍h-lâi ê 5 kang chò lâng ê cha̍p-chhe-á, phòa chhâ taⁿ chiú, thiⁿ chhâ kò͘ hóe, sé chhài chhiat liāu. phâng chhài khoán toh-bīn, piān-nā Sūn-siông kau-tài, in to̍h chò, kha-chhiú mé-lia̍h bô thoa-soa, thàu-chá piàⁿ kah thàu-àm.

Tē 5 kang àm-sî, siōng bóe 1 toh lâng-kheh kiat-siàu liáu-āu, Thī-ke-ché kā in 2 ê kiò khì i ê pān-kong-thiaⁿ, hó-lé-á chhiáⁿ in chē--leh, phàu-tê chhiáⁿ in lim, kóng: “Chit 5 kang, lín ê piáu-hiān góa lóng khòaⁿ chāi gán-lāi, Sūn-siông mā o-ló lín chin kut-la̍t, hó chhe-kah, sī hó kha-siàu, góa tong-chho͘ bô khòaⁿ m̄ tio̍h, lín chin-chiàⁿ sī kó͘-ì lâng, góa ū leh siūⁿ kóng beh lâu lín 2 ê lo̍h-lâi chò tn̂g-kang, khang-khòe ê lōe-iông lán ē-tàng ta̍uh-ta̍uh-á chham-siông, m̄-chai lín kám ū ì-goān lâu--lo̍h-lâi?” A-bêng sûi ìn kóng: “Góa kah chú-kong sī ūi-tio̍h thian-hā-bān-bîn teh phah-piàⁿ, gún koh ū iàu-kín ê tāi-chì ài chò, lí kám chai-iáⁿ nā beh hō͘ ta̍k lâng lóng hó-gia̍h, lóng ū pn̄g thang chia̍h, thâu-khí-seng to̍h ài…” Chit sî A-lông chai-iáⁿ A-bêng ê chèng-thâu koh beh giâ--khí-lâi, kóaⁿ-kín chhah-ōe, kā beh khì Lâm-tó phah pháiⁿ-lâng ê tāi-chì siông-sè kóng hō͘ Thī-ke-ché thiaⁿ, piān-nā tú-tio̍h thiaⁿ bô chheng-chhó ê só͘-chāi, Thī-ke-ché koh ē kè-sio̍k mn̄g kah lóng-chóng liáu-kái, tùi A-lông in ê kò͘-sū chin ū chhù-bī ê khoán. 3 ê lâng kóng kah sim-hoe tng khui ê sî, A-lông mā kā chhù--ni̍h chah--lâi ê chu̍t-bí-oân-á the̍h chhut-lâi chhiáⁿ Thī-ke-ché chia̍h, Thī-ke-ché chia̍h--tio̍h, o-ló kah ē tak-chi̍h, kóng: “Bô chia̍h m̄ chai-iáⁿ, chia̍h --tio̍h chiah chai chán, kám ē-tàng kā goán kà beh án-chóaⁿ chò, che choa̍t-tùi ē-tàng tòng-chò Hōng-hông Chiú-lâu ê tek-sán lâi bē!” A-lông ìn kóng: “Ū 4 chióng kháu-bī ŏ͘!” A-lông mā chai-iáⁿ Thī-ke-ché tùi in bē-bái, bô kā in sàng koaⁿ-hú, koh hō͘ in ū ki-hōe thang chò-kang hêng-siàu, lâng kah lâng lóng ài hō͘-siōng, hó-lâi-hó-khì, to̍h kā chò-hoat siông-sè kóng hō͘ Thī-ke chai, mā bô chhàng-pō͘, mê-mê-kak-kak lóng siông-sè kau-tài. Thī-ke mā kā chò-hoat 1 pō͘ 1 pō͘ siông-sè chhau--lo̍h-lâi, thiaⁿ bô chin--ê koh chim-chiok mn̄g, pit-kì chò hó, kiò Sūn-siông lâi, hoan-hù chit 2 kang kiò chóng-phò͘-sai chiàu pit-kì chò khòaⁿ-māi, nā sūn-sī, to̍h tòng-chò sin sán-phín kó͘-bú lâng-kheh lâi kau-koan. Koh kā A-lông kóng, nā sin sán-phín pháng ē kiâⁿ, kò͘-būn hùi choa̍t-tùi bē chhìn-chhái. Hit mâ 3 ê lâng káng kah chin tâu-ki, it-ti̍t kàu chin òaⁿ chiah soah-kó͘ hioh-khùn.

Keh-tńg-kang, A-lông in chá-tǹg chia̍h liáu tng leh khoán hêng-lí chún-pī beh khí-kiâⁿ ê sî, Thī-ke-ché lâi chhōe--in, bīn-á sò͘-sò͘ mā bô tiám ian-chi, chhēng--ê mā m̄ sī in koàn-sì khòaⁿ--tio̍h ê hit niá khóng-sek iûⁿ-chong, ōaⁿ chò chhēng 1 niá pe̍h-sek ê kah-á kah chhiò-chheⁿ sek ê tn̂g-khò͘, A-bêng kám-kak kî-koài, mn̄g kóng: “Thī-ke-ché, lí nah ê chhēng án-ne? Kám sī kin-á-ji̍t hioh-khùn bô beh kò͘-tiàm?” Thī-ke-ché ìn kóng: “Chăng hâm lín 2 ê kóng-ōe kóng kah kài tâu-ki, mā kám-kak lín beh chò ê tāi-chì kài ū ì-gī, góa koat-tēng beh chham lín chò-hóe khì!” A-lông mn̄g kóng: “Án-ne lí tiàm beh án-chóaⁿ?” Ìn kóng: “Sūn-siông tī chia chò kài kú--ah, lâng téng-chin koh láu-si̍t, tiàm kau hō͘ i hōaⁿ èng-tong sī bô siáⁿ būn-tê.” A-lông kún-sńg-chhiò kóng: “Án-ne hit kóa ūi tio̍h beh lâi khòaⁿ--lí, ta̍k-piàn--ji̍p-lâi lóng kan-na kiò 1 hāng chhài ê lāu-chú-kò͘ it-tēng ē kài sit-bōng.” Thī-ke-ché ìn kóng: “In lóng sī hó lâng-kheh--lah, lóng kài su-bûn kài sin-sū, jî-chhiáⁿ goán chiah-nī iōng-sim chú-chia̍h, khoán-thāi lâng-kheh, siong-sìn in ē kè-sio̍k lâi phâng-tiûⁿ chiah tio̍h. Kiâⁿ lah! Lán chò-tīn khì chàu-kha khoán kóa chia̍h-mi̍h, thang tī lō͘--ni̍h chia̍h.

3 ê lâng khì kàu chàu-kha, Thī-ke-ché hoan-hù tang hoan-hù sai, che a̍h beh the̍h, he a̍h to̍h chah, lō͘-bóe 3 ê lâng ê hêng-lí soah piàn kah kui tōa-tui, A-lông kah A-bêng ū kiàn-gī kóng mài chah hiah chē, Thī-ke-ché chin kian-chhî, kóng: “Goán cha-bó͘--ê bô chhiūⁿ lín cha-po͘--ê hiah chhìn-chhái, goán chò tāi-chì khah iù-lō͘, pún-té chhut-mn̂g to̍h ài chhoân khah chē mi̍h-kiāⁿ.” Koh kā in 2 ê cha-po͘--ê pài-thok kiam ko͘-chiâⁿ. 2 ê siàu-liân-ke nah ē kham-tit bí-lú án-ne pài-thok kiam sai-nai, bóe--á 2 ê lâng lóng ke tàu phāiⁿ chin chē mi̍h-kiāⁿ, mā ūi-tio̍h án-ne ke bú kui pòaⁿ-po͘, it-ti̍t kàu tiong-tàu chia̍h-pá, 3 ê lâng chiah chhut-hoat, tōa-pau sè-pau tùi tōa-lō͘ kè-sio̍k kiâⁿ--lo̍h-khì.

--

Hosting provided by SoundOn