[官方網站 Koaⁿ-hong bāng-chām]

https://cho-kang-a-lang.github.io/

[Podcast]

SoundOn

https://bit.ly/ChKaL_SO

Spotify

https://spoti.fi/48jD2tI

KKBOX Podcast

https://bit.ly/ChKaL_KK

Apple Podcast

https://apple.co/3HZyfD3

Google Podcasts

https://ppt.cc/fpPKUx

YouTube Podcast

https://bit.ly/ChKaL_YT

[社交平台 Siā-kau Pêⁿ-tâi]

YouTube

https://bit.ly/ChKaL_YT

Facebook

https://bit.ly/ChKaL_FB

Instagram

https://www.instagram.com/chokangalang/

X (Twitter)

https://twitter.com/chokangalang

方格子

https://vocus.cc/salon/cho-kang-a-lang

以下是故事ê漢羅kah白話字原稿，有需要ē-tàng參考。

【漢羅版】

4 ê人chiūⁿ船了後，水泉伯--á kā人數siàu soah，大聲喝：「Tháu索！」碼頭邊ê工人sûi kā縛船ê大索tháu--開，2 ê水手脚手mé-lia̍h kā大索giú chiūⁿ船，款整齊了後sûi喝1聲「好！」水泉伯--á聽tio̍h聲koh喝：「起錠！」另外2 ê水手kāng款出力chhui，款好koh喝：「好！」Chit時船lê聲mā tòe leh響起。水泉伯--á koh喝：「Kò船。」Kúi-nā ê水手to̍h開始出力kò，船to̍h án-ne ta̍uh-ta̍uh-á離開碼頭，等到已經kò出港口，水泉伯--á koh喝：「起phâng！」負責ê水手sûi動作，siŭ--1-ē ê時間，phâng已經放好勢，kāng款喝1聲：「好！」今á日風透，phâng sûi食tio̍h風，船速jú chhui jú緊。水泉伯--á koh喝：「Tāi-kong，目標南島，出發！」喝了水泉伯--á to̍h開始唱歌：「八月十五hit 1 kang，船beh離開琉球港…。」歌聲滄桑實在kài好聽。瘦猴解說講，che是南洋ê流行歌，行船ê人講便nā beh出phâng，to̍h ài唱歌hō͘海神聽，海神nā心花開to̍h ē保庇行船平安，順風順phâng。Chit-lō tāi-chì，頭起先凡勢是teh講笑，久--來，jú來jú chē人beh出海mā lóng tòe leh唱，soah變慣勢，橫直歌好聽，加唱mā無敗害。A鳳kah A郎真有趣味，mā去請教水泉伯--á án-chóaⁿ唱，A明--leh，出海無jōa久to̍h hîn船hîn kah beh-sí-tōng-hāiⁿ，tó tī mn̂g床peh bē --起-來。

船beh駛到南島ài 3日ê久，A明一直hîn船，倒kui kang--ê，A郎kah A鳳是m̄-bat出過海，ta̍k hāng to hòⁿ玄，四界chhōe人問東問西，mā chhiāⁿ-chhiāⁿ去chhōe瘦猴開講，尤其是A鳳kah瘦猴in 2 ê kāng鄉，不時mā做夥teh話故鄉kah野球ê tāi-chì。瘦猴有chah bat-tah來，閒閒無tāi-chì to̍h teh練kòng球ê姿勢，講是船ē hián，對練腰kah脚腿真有幫贊。

Tī第4 kang chái起，水手喝講看tio̍h海鳥teh飛，南島beh到--ah，果然船koh行半晡，to̍h看tio̍h南島。進前tī船頂ê時，A郎in已經參詳好，A郎，A明，A鳳，瘦猴4 ê人做頭前落船，先去探聽，水手kah船長眾人留tī船頂顧船，萬不二phah輸beh走koh有退路。

A郎in 4 ê人落船，順路行無jōa久to̍h行到1 ê庄社，遠遠庄--ni̍h ê人to̍h看tio̍h A郎in，m̄-koh lóng sûi走轉去厝--ni̍h bih，門chhòaⁿ kah ân-ân。4 ê人心內奇怪，put-kò想beh問ho͘清楚mā chhōe無人。Chit-chūn A鳳講：「咱koh繼續行看māi--leh，凡勢chhōe有人thang問ho͘斟酌。」暫時mā無khah好ê法度，4 ê人to̍h繼續gōng-gōng-á行，koh行--1-tè-á，行到1塊khàng地á，看--起-來是chit庄teh集會ê所在，tú好有4 ê gín-á tī hia teh sńg。

瘦猴看tio̍h有人，趕緊走去beh問話，4 ê gín-á看tio̍h瘦猴行óa--過，lóng開始háu，beh走去bih，tú好1 ê gín-á poa̍h--倒，走bē赴，瘦猴行去hit ê gín-á邊--á，講：「Gín-á兄，你有要緊--無？A叔m̄是歹人。」Gín-á看tio̍h瘦猴ê面，tò目hia 1 khî長長到嘴角，頭毛khiû-khiû ná佛祖，笑--起-來比無笑koh khah恐怖，驚kah to強beh破膽，jú háu jú大聲。Chit時3 ê bih--起-來ê gín-á koh走--出-來，khiā tī離瘦猴遠遠ê所在喝hiu：「Mài欺負goán朋友--lah！」「Kā goán朋友放--走-lah！」「伊lóng無洗seng-khu，chiok臭，無好食，你mài ka食！」瘦猴喝講：「我食飯，無食人，我m̄是歹人--lah！」Gín-á 聽tio̍h朋友講ka-tī chiok臭，koh哭kah jú慘。Chit 4 ê gín-á lóng無beh聽瘦猴解說，罵--ê繼續罵，háu--ê繼續háu。Chit時A明nauh講，「害--ā害--ā，lín看瘦猴ê表情，伊kám是kiōng beh哭--出-來-ah，目屎含目墘án-ne，無無無，斟酌ka看，伊目屎已經流--落-來-ah neh，咱kám beh緊去ka救？」A郎mā細細聲á講：「He gín-á有夠gâu罵，1人1句罵bē停，看--起-來瘦猴已經受tio̍h真大ê心理創傷，chit-má已經跪leh雙手thuh土脚，頭鉤鉤teh háu--ah。」

3 ê人tng teh為難ê時，hiông-hiông聽tio̍h「Pn̆g-ǹg，Pn̆g-ǹg，Pn̆g-ǹg」ê聲，poa̍h--倒ê gín-á聽--tio̍h，m̄知tó位來ê勇氣，peh起來走去in 3 ê gín-á伴hia，A郎in 3 ê人mā sûi óa過瘦猴邊--á。Chit時2台o͘-tó͘-bái「Pn̆g-ǹg，Pn̆g-ǹg，Pn̆g-ǹg」kā A郎in 4 ê人當做中心，直直se̍h圓kho͘-á，土粉hō͘車輪絞kah四界飛，真eng-ia，se̍h kài chē lìn了後chiah停--落-來。過1時á，eng-ia落地，A郎in chiah看ē清chit 2 ê人生做siáⁿ款。1 ê kā烏頭mo͘ loa̍h做o͘-lú-bak-kuh，1 ê kā紅頭mo͘留kah長lò-sò，放ho͘ sàm-iā-iā，2 ê lóng掛烏仁目鏡，穿烏色ê phah鐵á褲kah烏色ê皮kah-á，kah-á無紐，胸前kah腹肚lóng hiàn-hiàn。烏mo͘--ê kah-á後壁繡1隻虎，紅mo͘--ê繡1隻豹。

Chit時A明細聲á講：「看in án-ne兇kài-kài，我看咱已經chhōe tio̍h歹人--ā。」A郎應講：「是熊是虎咱koh m̄知影，先問看māi--leh chiah phah算。」A郎tú想beh開嘴問話，烏mo͘--ê先出聲：「Lín chia外地á koh來teh蹧躂gín-á大細，膏膏纏，亂bē soah！」瘦猴大聲應講：「我siáⁿ lóng無做neh！」紅mo͘--ê笑笑á講：「Kā in chia ê害á phah ho͘ m̄敢來chiah講，免hâm in囉嗦lah！」A郎講：「Goán是beh來phah歹人，解救南島--ê！」紅mo͘--ê kài-sêng jú聽jú愛笑án-ne，笑笑應講：「Tio̍h！Tio̍h！Tio̍h！Goán to̍h是歹人！話免ke講，beh phah緊來！」雙手互相去tēⁿ另外1手ê拳頭bú，tēⁿ kah khia̍k-khia̍k叫，人iân-lō͘ ta̍uh-ta̍uh-á行--過-來。烏mo͘--ê看紅mo͘--ê tín動，人mā落車，ām-kún-á雙pêng choāiⁿ-choāiⁿ--leh，「khiăk，khiăk」2聲，mā tòe leh行--過-來。瘦猴看tio̍h烏mo͘--ê行--來，滿腹委屈無tè tháu，mā bē-giàn koh思考，bat-tah gia̍h leh拖土mā對烏mo͘--ê行--去，不時bat-tah nā lòng tio̍h石頭to̍h「khong」1聲，he表情看--起-來已經怨恨kah失理智，kan-na想beh相phah tháu-khùi。A鳳看對方已經無beh參詳--ā，kā A郎kah A明講：「Lín先退後，看範勢siáⁿ款，紅mo͘--ê我來處理！」Hun吹poe̍h--出-來mā對紅mo͘--ê行--去。

【Pe̍h-ōe-jī pán】

4 ê lâng chiūⁿ-chûn liáu-āu, Chúi-chôaⁿ-peh--á kā lâng-sò͘ siàu soah, tōa-siaⁿ hoah: “ Tháu soh!” Bé-thâu piⁿ ê kang-lâng sûi kā pa̍k chûn ê tōa-soh tháu--khui, 2 ê chúi-chhiú kha-chhiú mé-lia̍h kā tōa-soh giú chiūⁿ-chûn, khoán chéng-chê liáu-āu sûi hoah 1 siaⁿ “Hó!” Chúi-chôaⁿ-peh--á thiaⁿ tio̍h siaⁿ koh hoah: “Khí-tiàⁿ!” Lēng-gōa 2 ê chúi-chhiú kāng-khoán chhut-la̍t chhui, khoán hó koh hoah: “Hó!” Chit sî chûn-lê siaⁿ mā tòe leh hiáng khí. Chúi-chôaⁿ-peh--á koh hoah: “Kò chûn.” Kúi-nā ê chúi-chhiú to̍h khai-sí chhut-la̍t kò, chûn to̍h án-ne ta̍uh-ta̍uh-á lī-khui bé-thâu, tán-kàu í-keng kò chhut káng-kháu, Chúi-chôaⁿ-peh--á koh hoah: “Khí-phâng!” Hū-chek ê chúi-chhiú sûi tōng-chok, siŭ--1-ē ê sî-kan, phâng í-keng pàng hó-sè, kāng-khoán hoah 1 siaⁿ: “Hó!” Kin-á-ji̍t hong-thàu, phâng sûi chia̍h tio̍h hong, chûn-sok jú chhui jú kín. Chúi-chôaⁿ-peh--á koh hoah: “Tāi-kong, bo̍k-phiau Lâm-tó, chhut-hoat!” Hoah liáu Chúi-chôaⁿ-peh--á to̍h khai-sí chhiùⁿ-koa: “Peh goe̍h cha̍p-gō͘ hit 1 kang, chûn beh lī-khui Liû-khiû káng….” Koa siaⁿ chhong-song si̍t-chāi kài hó thiaⁿ. Sán-kâu kái-soeh kóng, che sī Lâm-iûⁿ ê liû-hêng koa, kiâⁿ-chûn ê lâng kóng piān nā beh chhut-phâng, to̍h ài chhiùⁿ-koa hō͘ hái-sîn thiaⁿ, hái-sîn nā sim-hoe-khui to̍h ē pó-pì kiâⁿ-chûn pêng-an, sūn-hong sūn-phâng. Chit-lō tāi-chì, thâu-khí-seng hoān-sè sī teh kóng-chhiò, kú--lâi, jú lâi jú chē lâng beh chhut-hái mā lóng tòe leh chhiùⁿ, soah piàn koàn-sì, hoâiⁿ-ti̍t koa hó thiaⁿ, ke chhiùⁿ mā bô pāi-hāi. A-hōng kah A-lông chin ū chhù-bī, mā khì chhéng-kàu Chúi-chôaⁿ-peh--á án-chóaⁿ chhiùⁿ, A-bêng--leh, chhut-hái bô-jōa-kú to̍h hîn-chûn hîn kah beh-sí-tōng-hāiⁿ, tó tī mn̂g-chhn̂g peh bē--khí-lâi.

Chûn beh sái kàu Lâm-tó ài 3 ji̍t ê kú, A-bêng it-ti̍t hîn-chûn, tó kui kang--ê, A-lông kah A-hōng sī m̄-bat chhut kòe hái, ta̍k hāng to hòⁿ-hiân, sì-kè chhōe lâng mn̄g-tang-mn̄g-sai, mā chhiāⁿ-chhiāⁿ khì chhōe Sán-kâu khai-káng, iû-kî sī A-hōng kah Sán-kâu in 2 ê kāng hiong, put-sî mā chò-hóe teh ōe kò͘-hiong kah iá-kiû ê tāi-chì. Sán-kâu ū chah bat-tah lâi, êng-êng bô tāi-chì to̍h teh liān kòng kiû ê chu-sè, kóng sī chûn ē hián, tùi liān io kah kha-thúi chin ū pang-chān.

Tī tē 4 kang chái-khí, chúi-chhiú hoah kóng khòaⁿ tio̍h hái-chiáu teh poe, Lâm-tó beh kàu--ah, kó-jiân chûn koh kiâⁿ pòaⁿ po͘, to̍h khòaⁿ tio̍h Lâm-tó. Chìn-chêng tī chûn-téng ê sî, A-lông in í-keng chham-siông hó, A-lông, A-bêng, A-hōng, Sán-kâu 4 ê lâng chò thâu-chêng lo̍h-chûn, seng-khì thàm-thiaⁿ, chúi-chhiú kah chûn-tiúⁿ chèng-lâng lâu tī chûn-téng kò͘ chûn, bān-put-jī phah su beh cháu koh ū thè-lō͘.

A-lông in 4 ê lâng lo̍h-chûn, sūn lō͘ kiâⁿ bô-jōa-kú to̍h kiâⁿ kàu 1 ê chng-siā, hn̄g-hn̄g chng--ni̍h ê lâng to̍h khòaⁿ tio̍h A-lông in, m̄-koh lóng sûi cháu tńg-khì chhù--ni̍h bih, mn̂g chhòaⁿ kah ân-ân. 4 ê lâng sim-lāi kî-koài, put-kò siūⁿ beh mn̄g ho͘ chheng-chhó mā chhōe bô lâng. Chit-chūn A-hōng kóng: “Lán koh kè-sio̍k kiâⁿ khòaⁿ-māi--leh, hoān-sè chhōe ū lâng thang mn̄g ho͘ chim-chiok.” Chām-sî mā bô khah hó ê hoat-tō͘, 4 ê lâng to̍h kè-sio̍k gōng-gōng-á kiâⁿ, koh kiâⁿ--1-tè-á, kiâⁿ kàu 1 tè khàng-tē-á, khòaⁿ--khí-lâi sī chit chng teh chi̍p-hōe ê só͘-chāi, tú hó ū 4 ê gín-á tī hia teh sńg.

Sán-kâu khòaⁿ tio̍h ū lâng, kóaⁿ-kín cháu-khì beh mn̄g-ōe, 4 ê gín-á khòaⁿ tio̍h Sán-kâu kiâⁿ óa--kòe, lóng khai-sí háu, beh cháu-khì bih, tú hó 1 ê gín-á poa̍h--tó, cháu bē-hù, Sán-kâu kiâⁿ khì hit ê gín-á piⁿ--á, kóng: “Gín-á-hiaⁿ, lí ū iàu-kín--bô? A-chek m̄ sī pháiⁿ-lâng.” Gín-á khòaⁿ tio̍h Sán-kâu ê bīn, tò ba̍k hia 1 khî tn̂g-tn̂g kàu chhùi-kak, thâu-mo͘ khiû-khiû ná pu̍t-chó͘, chhiò--khí-lâi pí bô chhiò koh khah khióng-pò͘, kiaⁿ kah to kiōng beh phòa-táⁿ, jú háu jú tōa-siaⁿ. Chit sî 3 ê bih--khí-lâi ê gín-á koh cháu--chhut-lâi, khiā tī lī Sán-kâu hn̄g-hn̄g ê só͘-chāi hoah-hiu: “Mài khi-hū goán pêng-iú--lah!” “Kā goán pêng-iú pàng--cháu-lah!” “I lóng bô sé seng-khu, chiok chhàu, bô hó-chia̍h, lí mài ka chia̍h!” Sán-kâu hoah kóng: “Góa chia̍h pn̄g, bô chia̍h lâng, góa m̄ sī pháiⁿ-lâng--lah!” Gín-á thiaⁿ tio̍h pêng-iú kóng ka-tī chiok chhàu, koh khàu kah jú chhám. Chit 4 ê gín-á lóng bô beh thiaⁿ Sán-kâu kái-soeh, mē--ê kè-sio̍k mē, háu--ê kè-sio̍k háu. Chit sî A-bêng nauh kóng, “Hāi--ā hāi--ā, lín khòaⁿ Sán-kâu ê piáu-chêng, i kám sī kiōng beh khàu--chhut-lâi-ah, ba̍k-sái kâm ba̍k-kîⁿ án-ne, bô bô bô, chim-chiok ka khòaⁿ, i ba̍k-sái í-keng lâu--lo̍h-lâi-ah neh, lán kám beh kín khì ka kiù?” A-lông mā sè-sè-siaⁿ-á kóng: “He gín-á ū kàu gâu mē, 1 lâng 1 kù mē bē thêng, khòaⁿ--khí-lâi Sán-kâu í-keng siū tio̍h chin tōa ê sim-lí chhòng-siong, chit-má í-keng kūi leh siang-chhiú thuh thô͘-kha, thâu kau-kau teh háu--ah.”

3 ê lâng tng teh ûi-lân ê sî, hiông-hiông thiaⁿ tio̍h “Pn̆g-ǹg, pn̆g-ǹg, pn̆g-ǹg” ê siaⁿ, poa̍h--tó ê gín-á thiaⁿ--tio̍h, m̄ chai tó-ūi lâi ê ióng-khì, peh khí-lâi cháu-khì in 3 ê gín-á phōaⁿ hia, A-lông in 3 ê lâng mā sûi óa kòe Sán-kâu piⁿ--á. Chit sî 2 tâi o͘-tó-bái “Pn̆g-ǹg, pn̆g-ǹg, pn̆g-ǹg” kā A-lông in 4 ê lâng tòng-chò tiong-sim, ti̍t-ti̍t se̍h îⁿ-kho͘-á, thô͘-hún hō͘ chhia-lián ká kah sì-kè poe, chin eng-ia, se̍h kài chē lìn liáu-āu chiah thêng--lo̍h-lâi. Kòe 1-sî-á, eng-ia lo̍h tē, A-lông in chiah khòaⁿ ē chheng chit 2 ê lâng seⁿ-chò siáⁿ-khoán. 1 ê kā o͘-thâu-mo͘ loa̍h chò o͘-lú-bak-kuh, 1 ê kā âng-thâu-mo͘ lâu kah tn̂g-lò-sò, pàng ho͘ sàm-iā-iā, 2 ê lóng kòa o͘-jîn-ba̍k-kiàⁿ, chhēng o͘-sek ê phah-thih-á-khò͘ kah o͘-sek ê phôe-kah-á, kah-á bô liú, heng-chêng kah pak-tó͘ lóng hiàn-hiàn. O͘-mo͘--ê kah-á āu-piah siù 1 chiah hó͘, âng-mo͘--ê siù 1 chiah pà.

Chit sî A-bêng sè-siaⁿ-á kóng: “Khòaⁿ in án-ne hiong-kài-kài, góa khòaⁿ lán í-keng chhōe tio̍h pháiⁿ-lâng--ā.” A-lông ìn kóng: “Sī hîm sī hó͘ lán koh m̄ chai-iáⁿ, seng mn̄g khòaⁿ-māi--leh chiah phah-sǹg.” A-lông tú siūⁿ beh khui-chhùi mn̄g-ōe, o͘-mo͘--ê seng chhut-siaⁿ: “Lín chia gōa-tē-á koh lâi teh chau-that gín-á tōa-sè, ko-ko-tîⁿ, loān bē soah!” Sán-kâu tōa-siaⁿ ìn kóng: “Góa siáⁿ lóng bô chò neh!” Âng-mo͘--ê chhiò-chhiò-á kóng: “Kā in chia ê hāi-á phah ho͘ m̄-káⁿ lâi chiah kóng, bián hâm in lo-so lah!” A-lông kóng: “Goán sī beh lâi phah pháiⁿ-lâng, kái-kiù Lâm-tó--ê!” Âng-mo͘--ê kài-sêng jú thiaⁿ jú ài chhiò án-ne, chhiò-chhiò ìn kóng: “Tio̍h! Tio̍h! Tio̍h! Goán to̍h sī pháiⁿ-lâng! Ōe bián ke kóng, beh phah kín lâi!” Siang-chhiú hō͘-siōng khì tēⁿ lēng-gōa 1 chhiú ê kûn-thâu-bú, tēⁿ kah khia̍k-khia̍k-kiò, lâng iân-lō͘ ta̍uh-ta̍uh-á kiâⁿ--kòe-lâi. O͘-mo͘--ê khòaⁿ âng-mo͘--ê tín-tāng, lâng mā lo̍h-chhia, ām-kún-á siang-pêng choāiⁿ-choāiⁿ--leh, “khiăk, khiăk” 2 siaⁿ, mā tòe leh kiâⁿ--kòe-lâi. Sán-kâu khòaⁿ tio̍h o͘-mo͘--ê kiâⁿ--lâi, móa-pak úi-khut bô tè tháu, mā bē-giàn koh su-khó, bat-tah gia̍h leh thoa-thô͘ mā tùi o͘-mo͘--ê kiâⁿ--khì, put-sî bat-tah nā lòng tio̍h chio̍h-thâu to̍h “khong” 1 siaⁿ, he piáu-chêng khòaⁿ--khí-lâi í-keng oàn-hūn kah sit lí-tì, kan-na siūⁿ beh sio-phah tháu-khùi. A-hōng khòaⁿ tùi-hong í-keng bô beh chham-siông--ā, kā A-lông kah A-bêng kóng: “Lín seng thè-āu, khòaⁿ pān-sè siáⁿ-khoán, âng-mo͘--ê góa lâi chhú-lí!” Hun-chhoe poe̍h--chhut-lâi mā tùi âng-mo͘--ê kiâⁿ--khì.

--

Hosting provided by SoundOn