[網站 Bāng-chām]

https://cho-kang-a-lang.github.io/

[Podcast]

SoundOn

https://bit.ly/ChKaL_SO

Spotify

https://spoti.fi/48jD2tI

KKBOX Podcast

https://bit.ly/ChKaL_KK

Apple Podcast

https://apple.co/3HZyfD3

Google Podcasts

https://ppt.cc/fpPKUx

YouTube Podcast

https://bit.ly/ChKaL_YT

[社交平台 Siā-kau Pêⁿ-tâi]

YouTube

https://bit.ly/ChKaL_YT

Facebook

https://bit.ly/ChKaL_FB

Instagram

https://www.instagram.com/chokangalang/

X (Twitter)

https://twitter.com/chokangalang

方格子

https://vocus.cc/salon/cho-kang-a-lang

以下內容是漢羅kah白話字原稿，有需要歡迎ta̍k-ke來參考。

【漢羅版】

今á日咱beh紹介ê語詞是tū水，頭起seng咱seng來紹介chit字tū。

Tū有that-tiâu--leh ê意思，像講「痰sàu bē --出-來，tū tī嚨喉，人to̍h去--ah。」Che to̍h是leh講，che痰害人bē喘氣soah失去性命。Koh親像「Hit日大水真恐怖，水tū到beh chi̍t chàn樓hiah koân，goán kui家夥á lóng走去2樓等水退。」Chia to̍h是leh講水淹kah真koân。Koh像講「便nā連假，車to̍h真gâu tū tī高速公路，bē-tín-bē動。」Chit句to̍h是teh形容that車that kah真嚴重。

Tū，koh有另外1 ê意思，to̍h是浸入去水--ni̍h ê意思。親像「Che菜頭，皮khau-khau--leh，切ho͘ 1角1角，thang好tū鹹。」To̍h是按算beh sīⁿ菜頭--ā。「Chit尾魚á seng lia̍h去水--ni̍h tū--leh，mî-á-chài chiah beh thâi。」To̍h是leh講，beh kā魚á暫時飼tī水--ni̍h，後手chiah koh繼續處理。

最後，咱翻頭轉來講tū水，相信ta̍k-ke已經lóng了解是siáⁿ意思，to̍h是人去hō͘水淹去，無法度喘氣án-ne，m̄-koh tū水kám一定ē死，che to無的確，凡勢有人去ka救，運氣nā好，koh有thang食kah百二，nā beh表示chit ê人是淹--死-ê，咱ē-tàng講tū--死，nā án-ne形容是khah tàu-tah。

台語ê動詞kài幼路，有人講動詞是台語siāng kài歹學ê部分，nā有機會，咱chiah koh做夥來研究。

【Pe̍h-ōe-jī pán】

Kin-á-ji̍t lán beh siāu-kài ê gí-sû sī tū-chúi, thâu-khí-seng lán seng lâi siāu-kài chit jī tū.

Tū ū that-tiâu--leh ê ì-sù, chhiūⁿ kóng “Thâm sàu bē--chhut-lâi, tū tī nâ-âu, lâng to̍h khì--ah.” Che to̍h sī leh kóng, che thâm hāi-lâng bē chhoán-khùi soah sit-khì sìⁿ-miā. Koh chhin-chhiūⁿ “Hit ji̍t tōa-chúi chin khióng-pò͘, chúi tū kàu beh chi̍t chàn lâu hiah koân, goán kui-ke-hóe-á lóng cháu-khì 2 lâu tán chúi thè.” Chia to̍h sī leh kóng chúi im kah chin koân. Koh chhiūⁿ kóng “Piān nā liân-ká, chhia to̍h chin gâu tū tī ko-sok kong-lō͘, bē-tín-bē-tāng.” Chit kù to̍h sī teh hêng-iông that-chhia that kah chin giâm-tiōng.

Tū, koh ū lēng-gōa 1 ê ì-sù, to̍h sī chìm ji̍p-khì chúi--ni̍h ê ì-sù. Chhin-chhiūⁿ “Che chhài-thâu, phôe khau-khau--leh, chhiat ho͘ 1 kak 1 kak, thang hó tū kiâm.” To̍h sī àn-sǹg beh sīⁿ chhài-thâu--ā. “Chit bóe hî-á seng lia̍h khì chúi--ni̍h tū--leh, mî-á-chài chiah beh thâi.” To̍h sī leh kóng, beh kā hî-á chiām-sî chhī tī chúi--ni̍h, āu-chhiú chiah koh kè-sio̍k chhú-lí.

Chòe-āu, lán hoan-thâu tńg-lâi kóng tū-chúi, siong-sìn ta̍k-ke í-keng lóng liáu-kái sī sáⁿ ì-sù, to̍h sī lâng khì hō͘ chúi im khì, bô-hoat-tō͘ chhoán-khùi án-ne, m̄-koh tū-chúi kám it-tēng ē sí, che to bô-tek-khak, hoān-sè ū lâng khì ka kiù, ūn-khì nā hó, koh ū thang chia̍h kah pah jī, nā beh piáu-sī chit ê lâng sī im--sí-ê, lán ē-tàng kóng tū--sí, nā án-ne hêng-iông sī khah tàu-tah.

Tâi-gí ê tōng-sû kài iù-lō͘, ū lâng kóng tōng-sû sī Tâi-gí siāng kài pháiⁿ o̍h ê pō͘-hūn, nā ū ki-hōe, lán chiah koh chò-hóe lâi gián-kiù.

--

Hosting provided by SoundOn