Hannde neɗanke faamii wonnde, ɓamtaare waawaa laataade e hoore leydi ndin, si tawii o waylaani noone no o wuuriri e dow mayri. Ngam yo o waawu foolude mbayliigu weeyo, caɗeele taariindi, nguleendi e kokke, ko maa o wayla noone ngurdam makko. Awa ko wiide tan wonnde  neɗɗanke no humii e hunndaari mum sabu ko e mayri o ittata  ko o wuura.Tedduɓe on bi'aama bismilla mon e Kiwal Taarindi. E oo ɗoo taskaram men yewtay ko faati e tuuɗe woɓɓe wi’a ɗum kurujuru teskaaɗum e jeereeji ɓurɗi mawnude e yoga e laamorɗe e goɗɗe e nder Afrik . Wano Nuwaakshoot, Bamako, Konakiri walla Dakaar. Ɗum no addande jamaa on tiiɗallaaji, tuunina taarindi men. Ɗuuɗuɓe e dillayɓe on fannu hollii mettu maɓɓe, kono kadi ɓe holli pehe haanaaɗe ƴetteede ngam haɓude ɗee tuuɗe. Ngam yewtude e dow ndee toɓɓere en bismoto Sonna Kalabiri Helene arɗiiɗo fedde nde wonaa laamuyankoore waylaynde tuuɗe wi'eteende " Amavac",  Madaani Si gooto e ardiiɓe fedde sennddikaaɓe renndinde gollooɓe e on fannu ɗon. Kono ko adii ɗum en heɗoto jantoore nultondiraaɗo men to Nuwaakshot. Ka joofingol en jaɓɓoto Kadi JALLO gollanoowo hoore mum jeyaaɗo Gine ginenaajo.