Koɗo men hannde

Senegal, ko balɗe 30 tan heddii ɗoo fuɗɗagol fijooji olempik sukaaɓe. Ngal kawrital fijooji mawngal waɗan gila 31 lewru 10ɓuru haa 13 lewru 11ɓuru. Ko faati e heɓlo, ardiiɓe Senegal nantini wonndema mahanteeriiji jaɓɓotooɗi ɗii fijooji fow gaynaama darneede walla wattiteede. Ko ngol wontata laawol aranol yo ɗi waɗu e nder duunde Afrik. Ko ɗum holli, ɗii
ko fijooji taariikayankooji, laatantooɗi ateletɓe afrikyankooɓe hoolaare ngam dañugol mbuuñaaji, ko ɗum anndini Oumou Souleymane Kane, komiserjo CAF, ardiiɗo kiɗɗo fuku koyngal rewɓe e nder fedde Mauritanie toppitiinde Lato Balon. Ko kanko woni koɗo men hannde. Himo jaaboo laamnde Ibrahima Timbi Bah

Burkina Faso, waɗii hannde duuɓi 4 gila kapiteen Ibrahima Traoré liɓi laamu kolonel Paul-Henri Sandaogo Damiba. Kapiteen Traoré foduno wonndema o ɓooyata e laamu. Kono lebbi seeɗa caggal ɗum, o jonni hoore makko manda timmuɗo mo rewnaaka e suɓngooji. O fusi pelle politik ɗee fow, o rawɗike lunndiiɓe laamu, o soki walla o majjini woɓɓe. E nder ɗii
duuɓi 4 ŋakkere ndeenaagu yaaraali caggal hay si tawi Ibrahima Traoré nantini eɓɓooje ɓamtaare rewnaanɗe e waylugol jawle iriiɗe Burkin Faso, semmbingol jannde leydi ndii. Ngam taskagol ɗii duuɓi 4 ɗi Kapiteen Traoré ardii Burkina Faso, hiɗen jáɓɓii Dr Mamadou Gaani Sow jannginowo Iniwersite hertorɗo Sahel. Himo jaaboo laamnde Ibrahima Timbi Bah

Guinee :Hankin 28 lewru 9 ɓuru 2026, Pelle daraniiɗe hakke neɗanke FIDH, OGDH, AVIPA wurnintini duuɓi17 warngooji 28 settambur 2009, pankare ko yimɓe ko ɓuri 150 maayi, woɓɓe barmina, rewɓe ko ɓuri temedere doola. E hitande 2024, horeeɓe kununkoɓe no tawa e ɓen ardinooɗo leydi ndin on saayi captaine Moussa Dadis Camara fawano jukkooje sabu
warnedanke. Duuɓi ɗiɗi feƴƴi lorriɓe go hetti hakke mun, woɓɓe hino habbi hettugol hakkemun, hiɓe lanndi yo ñaawore nodditaande nden waɗu. Hiɗen jaɓɓi Asmaou Diallo hooreejo gomu lorriɓe AVIPA. Himo e faandu haala Mamadou Adama Diall

Hulɓineede, nanngeede sokee, leepteede e majjineede... Boneeji fewtinteeɗi e jaayndeyankooɓe hino mawni e nduu adunaaru. E nder diiwal Sahel e leyɗe goɗɗe e nder Afrik, jaayndeyankooɓe wonnduɓe e sifa ɗee caɗeele hino ɗuuɗi. Wurin heewɓe e maɓɓe ndogii njalti e nder leyɗe maɓɓe ngam hiwgol wonki maɓɓe. Ko ardiiɓe ɗee leyɗe e pelle jogiiɗe kaɓirɗe woni caggal ɗii boneeji. E ngal ñallal hannde hertanaangal keɓal kabaaru kuuɓuɗo, hiɗen njaɓɓii Yero Amel Ndiaye, jaayndeyankeejo Mauritanie. E faandu haala Ibrahima Timbi Bah, o arti e caɗeele ɗe kanko e gollidiiɓe makko njogii. Heɗoɗen...

Mbatu hooreeɓe leyɗe to Dental Adunaaru ONU hino jokki. Piile laatiiɗe annde nduu adunaaru hino yewteede e nder ndee jonnde. Gila e kareeli e nder diiwal "Moyen Orient" haa e hare wonnde waɗde Ukraine, hay huunde accaaka. Kono hikka toɓɓere wonnde hino nanngi hakkille mawɓe nduu adunaaru. Ndeen ko alhaali Hakkille Tafaaɗe. Yi’annde mawɓe leyɗe
ɗee hino serti. Si Europnaaɓe wonndude e Canada e Australie hino faala yo sarti huɓindiiɗo IA yo waɗe, Etats Unis kañum yaada e ndeen eɓɓoore. E bi’ol Donald Trump, si ndeen feere laati, ɓamtaare hakkille tafaaɗe ŋakkay e nder Dawlaaj Ndenuɗi Amerik. Ko laaɓi koon, hannde Hakkille Tafaaɗe ko karallaagal maapinngal toowa ganndalɓe woɓɓe. Sabu e
yi’annde maɓɓe, si ndee jannde heyre huɓindaaka hinde waawi saabaade bone mawɗo. Ko holɗum saabi ngol kulol ? Taw si no woodi ko ngol feŋii ? Ko holto jannde hakkille tafaaɗe tolni hannde e nder Afrique? Koɗo men hannde ko Mamadou Saidou Diallo, hertorɗo IA. Himo jaaboo laamnde Ibrahima Timbi Bah

Etats Unis, gila Donald Trump arti e laamu, ɗanniyankooɓe 25 000 yaltinaama e nder ndii leydi. Heewɓe e maɓɓe ko e leyɗe woɗɗitiiɗe leydi maɓɓe wonaa e naɓeede e hoore doole. Ko ɗum wiɗto ngo rfi e meejaaji goɗɗi waɗi feññini. Ngoo wiɗto anndini ko holno, Washington woni huutorde leyɗe goɗɗe wonndude e pelle adunayankooje hono HRC e OMI ngam yaltingol
ɗanniiɓe e nder Etats Unis. E biol Mamadou Adama Diallo, jannginoowo Iniwersite, hertorɗo politik Amerique, ko diplomasi e kaalisi laamu Trump woni e gollirde ngam tabintinngol ndee eɓɓoore makko raɗornde hoɓɓe. Ko kanko woni koɗo men ahnnde himo jaaboo laamnde ibrahima Timbi Bah

Hannde ko koɗo mawɗo jaɓɓiɗen. Kylian Mbappe, kapitenjo ɗiɗɗal France fuku-koyngal. Kanko tigi o holli wonndema ko kanko woni fijoowo balon ɓurɗo mawnude e oo saaha e nduu adunaaru. E oo subaka hannde, Kylian Mbappe holli yi’annde mun e toɓɓe heewɗe : Ndee balonre kaŋŋe, ɓamtaare fuku-koyngal Afrique, suɓegol Zinedine Zidane eltugol ɗiɗɗal
France... Ko Olivier Pron, banndiraawo amen rfi fransiire waɗi ndee yewtere. Heɗoɗen...

Benin, ɗuɗe janngirɗe ɗeen udditi gila ñannde 14 nduu lewru 9ɓuru. Kono wonaa e nder ndii leydi fow ɗii lekkolji udditi. E nder kominaaji goɗɗi no woodi ɗuɗe ɗe maɓɓitaaka. Sabaabu on, ko ŋakkere ndeenaagu. Ardiiɓe Benin ɓamii pellital sottinirgal walla egginirgal duɗe wonɗe e nder kominaaji wonɗi e keerol Nigeria, Niger e Benin sabu boneeji kuliyankooɓe, JNIM.

Aliou Dembo, heertorɗo pelle kuliyankooje waɗiino wiɗto e nder ɗii nokkeeli ɗi kuliyankooɓe woni e saabaade fitinaaji. Ko kanko woni koɗo men hannde. Himo jaaboo laamnde Ibrahima Timbi Bah

Cameroun, yimɓe 3 waraama, 4 barminaama e nder Bamenda Rewo naayaade hirnaange leydi ndin. Ko ngoomuuji jogiiɗi kaɓirɗe woni e saabaade ɗii fitinaaji e nder ngal diiwal wowlayngal Angeleere. E ndee yontere faltiinde ɗiin goomuuji wonuɗi e ƴamude jewtaare ngal diiwal, waruno kadi polisiijo. E ɗii dumunnaaji sakkitiiɗi ɗoo, ɗii fitinaaji hino ɓeydi ndee nokkuure. Ko holɗum saabii ɗum ? Ko woni sabaabe ndee hare ? Ko yimɓe honɓe woni caggal mayre ? Koɗo men hannde ko Dr Fabilou, jannginoowo to Iniwersite Garoua. Himo jaaboo laamnde Ibrahima Timbi Bah…

Nigeria, suɓngooji hooreyaaku waɗan ñannde 16 lewru 1ɓuru hitaande 2027. Ko kanndidaaɓe 18 tawete e majji. E ɓen no jeyaa Bola Ahmed Tinubu, hooreejo leydi ndin. Himo ɗaɓɓude manda ɗiɗaɓo. O jippiray e Atiku Atiku Abubakar, lunndiiɗomo mawɗo wonndude e Peter Obi, arnooɗo tataɓo e suɓngooji faltiiɗi. Taw si Bola Ahmed Tinubu hino waawi tippude e golle
makko e nder ɗii ɗuuɓi 4 ngam heɓugol manda ɗiɗaɓo? Mbele lunndiiɓe laamu ɓee, no jogii fartanŋe hay so tawi ɓe fottaali ɓaawo kandidaajo gooto? Ko holɗum caɗeele faggudu e ndeenaagu jaaliiɗe Nigeria battinta e ɗii suɓngooji ? Koɗo men hannde ko Professeur Aboubacar Abba TAHIR janginoowo to Prime University Abuja. Himo jaaboo laamnde Ibrahima Timbi Bah.