Hannde, kaalaten ko e “kanseer prostate”. Ko ñawu heɓoongu ujunnaaje ujunnaaje worɓe, kono heewɓe ina kersa anndinde wonde eɓe ngonndi e maggu. Kono, so tawii waɗaama gila e law yeewndo “depistage’ e ɗemngal fransire, ngam anndude so tawi ñawu ngu nana e maɓɓe walla alaa, ɗum ina waawi hisnude ɓe.

E nder yeewtere men hannde altine 01 lewru 12ɓuru, ma en eto faamde holko waɗi heewɓe ina calo haalde, wonde eɓe ngonndi e kanseer prostate? Kadi holno worɓe kaani wallireede walla hirjineede mbele eɓe cuusa waɗoyde yeewndo ngo? Njeewtitten ko e Pr Lamine NIANG, heertorɗo kaanser Prostate

Yeewtere Cellal ko Ngala, yeewtata hannde ko ñawu wi'eteengu "Drepanocytose", jaaliingu sanne e nder Afrik. Holko woni nguu ñawu? Holko ngu waawi battinde e dafaaɗo o? Holno ngu safrorte?

Njeewtitten ko e Pr Indou Deme LY...

Jabet ko ñawu yaajngu e nder winndere ndee. E nder Afrik tan ko ɓuri yimɓe 24 miliyoŋ no ngonndi e ñawu ngu. Ko ñannde aljuma ɓennuɗo o, woni 14 lewru ndu hono no woowiri n hitaande kala e ndu lewru 11ɓuru, oo ñalawma ina heertananaa ñawu jabet. Hol caɗeele gooɗɗe ngam haɓaade ñawu nguu? Hol no ñawɓe ɓe e ɓesnguuji mum en nguurdi e ɗeen caɗeele? Holno doktoreeɓe ɓe ngoni e jagganorde ɓe? Ko ɗum njeewtaten hannde e taskaram men Cellal ko Ngallu, e oo altine 17 lewru 11ɓuru.

Hannde, en kaalat ko faati e ñawu tesketeengu e nguru ɓandu neɗɗo wi’eteengu e fransire « psoriasis ». Ngam faamde nguu ñawu e anndude sabaabuuji e safaara maggu, en njokkondirat e telefon e Dr Fatoumata Ly, kertoriiɗo ñabbuuji nguru ɓanndu neɗɗo, no wi’e « dermatologue » e fransire

Eɗen njeewta ko faati e balle ɗe njuɓɓudi noddirteendi Baby-Box, waɗanta neeniraaɓe e cukuloñ mum. Ko rewɓe ɗiɗo Afriknaaɓe cosii nde, gila duuɓi keewɗi, Baby-Box no walla ngam ustugol maayde neeniraaɓe nde ɓee jibbina, e ɓee mballa kadi e ustugol mayde cukuloñ keccoñ woɓɓe mbi’a tiggu.

Golle maɓɓe ina njiye e nder diiwe keewɗe Senegal, teeŋti noon Matam e Kolda. Diwanuuji ɗi ɓee jogii joɗaniiɓe ɓe ton. Enen njaɓɓo Fatou Seydi, joɗaniiɗo Baby-Box to diiwaan Kolda worgo Senegal, e Hawa Ly, joɗaniiɗo Baby-Box to diiwaan Matam e wuro no wi’ee Dumnga Rindiaw.

Lewru 10ɓuru hitaande kala, no yuɓɓine cofte jeertingol alhaali kanseer enɗi. Nduu lewru no noddiree « Octobre Rose » e ɗemngal fransire. Ko lewru nduu yimɓe mbaawi humpitaade alhaali rafi o, ndu dente keewɗe mbaɗate e mum, wonndude kadi e noddude reewɓe ɓeeɓyeewtoo ɓalli maɓɓe ɗum no wi’ee « depistage ». So tawii ƴeewndo ngoo waɗaama, anndaama wonnde debbo no wonndi e nguu ñawu, ko holɗum o haani wallireede?

Ko holɗum haani jokkude hakkunde jeertingol e tambitagol walla ñawndugol mo ? Ko ɗum njeewteten hannde e altine 27 lewru 10ɓuru e taskaram Cellal ko Ngallu. Yaadude hen e Dr Aissata DIA, kertorɗo ñawu kanseer, to suudu safrirdu Dalal Jam wonndu Dakar,

laamorgo Senegal.

E nder yeewtere men hannde altine 20 lewru 10ɓuru, njewtuten ko e ñabuuli tesketeeɗi e dabaaji walla jawdi ndii bawɗe addande neɗɗo ñabuuli goɗɗi. En tawtoraama jonnde faatunde e mum to wuro no wi’e Gamadje Saare. Ngo woni ko e nder departama mbo Podor, diiwal Saint Louis rewo Senegal. En njeewtidii e aynooɓe ɗiɗo, Kadiata Demba Ba, jeyaaɗo Gamaaje Saare e Mohamed Alel Diallo jeyaaɗo Loumbi Ferɓe wongo e nder commune Doumnga lawo. Ɓee ngandinii en ñabuuli keewɗi bawɗe heɓde jawdi ndi.

Kono hade men arde e maɓɓe, addotoɗen haalde ko e ngu ñawu wi’eteengu “Fievre de la Vallée du Rift”. E ngu teska hannde nder Senegal, teeŋti nder diiwal Saint Louis et to leydi Mauritanie kadi. Dr Fatima Wone, cafroowo keertoriiɗo raffiiji dabooji, ma o anndin en jooni holno ngu ñawu heɓorte e holno ngu safrorte? Mohamed Alel Diallo

Toɓɓere yeewtere men Cellal ko Ngalu, altine hannde 13 lewru 10ɓuru, ko sahaa mo neɗɗo foti hulande cellal hakkile mum. No jeya e rafiiji hakkille ko wi’etee ngoƴa ɓernde, ɗuytagol hakkile, ngaanuma e callu-gite walla ŋakkeere ɗoyngol ... Ɗeen caɗeele ina keewi deƴƴeede, walla wonnduɓe e mum ina keewi welsindaade-ɗe. Ngam ɗum ɓura laaɓde, en njaɓɓoto e jonnde men ndee hannde, Dr Binta Ramata BA, ko cafroowo rafiiji hakkile woni e farayse psychatre. Omo anndina en e hol tuma neɗɗo oo haani hulde wonannde cellal hakkille mum ?

En njokkat e yeewtude haa jooni e ngu ñawu "bilharziose" nde tawno engu jaali sanne e nder gure dowri bannge rewo Senegaal. E nder yoga e ɓesnguuji, ñawu nguu wonti caɗeele muusɗe. Ngu yahi haa ngu jibinani ɓeen sukaaɓe, wonnduɓe e maggu, ñabbuuli goɗɗi hono ñawu ɓooƴe woni e ko wi’etee e ɗemngal farayse "Insuffisance renale". Ko ɗeen caɗeele njeewtaten e oo altine hannde 06 lewru 10ɓuru hitaande 2025 e nder ndee toɓɓere ɗimmere ko faati e ñawu "bilharziose". Eɗen ɗoo hannde e nder wuro, wi'eteengo Guede Santier. Njeewtidten  ko e Assane Mandiaye DIOP, ɓiyiiko ɗañɗo duuɓi 14 wonnduno ko e bilharziose caggal ɗum wontaniimbo rafi ɓooye

Yeewtere men Cellal Ko Ngallu, nawi en hannde ko to Thille Boubacar e Thiangaye. Ɗee gure ɗiɗi no tawe e nder falnde Podor, diiwaan Saint-Louis, rewo Senegal. Ina teskaa ɗoon ñawu wi’eteengu "bilharziose", nde tawno ɗeen gure ina ɓatti walla ina takki maayo. Ñawu nguu noon ɓuri teskeede ko e sukaaɓe e yimɓe golloɓe e majje walla ɓulli ndiyam. Hay so tawi no waɗe oorngal jeertino e sahaa kala ngam haɓaade e reentinde nguu ñawu "bilharziose", engu jokki. Holko waɗi ɗum? Holno yimɓe ɓee kaani reentiraade nguu ñawu? Ko ɗum woni ko njeewtuten hannde e Cellal ko Ngallu. Ngadotoɗen jaɓaade ko Adama Sy, suka taweteeɗo e nder wuro Thille Boubacar, gonnduɗo e nguu ñawu "bilharziose", wonndude e neene makko Adama Sall. Nguu ñawu kadi, ina jaali to Thiagaye, ɗo woɗɗaani Thille Boubacar. Toon en njiydii e Dr BA.